މި އަހަރުގެ ބަޖެޓު ހުސްވުމާ ގާތަށް | ބާކީ ހަ ބިލިއަން

އަހަރު ނިމުމަކާ ގާތަށް ގޮސްފައިވާއިރު މި އަހަރަށް ލަފާކޮށް ސަރުކާރުން ހުށަހެޅި ބަޖެޓުގައި ބާކީ މި ވަގުތު ހުރީ ހަ ބިލިއަން ރުފިޔާ އެވެ. 

ފިނޭންސުން ނެރުނު ހަފުތާގެ މާލީ ހިސާބުތައް ދައްކާ ގޮތުގައި މިދިޔަ މަހުގެ 21 ވަނަ ދުވަހުގެ ނިޔަލަށް ބަޖެޓުން މިހާތަނަށް 40,8 ބިލިއަން ރުފިޔާ ވަނީ ހަރަދު ކުރެވިފަ އެވެ. މިދިޔަ އަހަރުގެ ހަރަދު ހުރީ 40,5 ބިލިއަން ރުފިޔާގަ އެވެ. އަދި މި އަހަރު ހަރަދު ކުރަން 47,6 ބިލިއަން ރުފިޔާ ފާސްކޮށްދީފައިވެ އެވެ. މިއީ ފަހުން ފާސްކުރި ފަސް ބިލިއަން ރުފިޔާގެ ސަޕްލިމެންޓްރީ ބަޖެޓާއެކު މިހާތަނަށް ހަރަދުވެފައިވާ މިންވަރެވެ. 

މި އަހަރުގެ މިހާތަނަށް މި އަހަރު މުސާރަ އާއި ޕެންޝަނަށް 11.2 ބިލިއަން ރުފިޔާ ވަނީ ހަރަދުކޮށްފަ އެވެ. މިދިޔަ އަހަރު މި އަދަދު ހުރީ  9,9 ބިލިއަން ރުފިޔާގަ އެވެ. މި އިތުރުވުން އައިސްފައިވަނީ ސަރުކާރު މުވައްޒަފުންގެ މުސާރަ ބޮޑު ކުރުމާއެކު މުވައްޒަފުން އިތުރު ވުމުގެ ސަބަބުންނެވެ. އަދި މި އަހަރުގެ މިހާތަނަށް މި އަހަރު އެޑްމިން އޮޕަރޭޝަން ހަރަދުތަކުގެ ގޮތުގައި 17,2 ބިލިއަން ހޭދަކޮށްފައިވެ އެވެ. މިދިޔަ އަހަރު މި އަދަދު ހުރީ 17.1 ބިލިއަން ރުފިޔާގަ އެވެ. އަދި ކެޕިޓަލް އިކްއިޕްމަންޓް ހޯދުމަށް މި އަހަރު 924.8 މިލިއަން ރުފިޔާ ވަނީ ހަރަދުކޮށްފަ އެވެ. މިދިޔަ އަހަރު މި އަދަދު ހުރީ 449.4 މިލިއަން ރުފިޔާގަ އެވެ. އަދި އިންފްރާސްޓްރަކްޗާ އަށް 5.2 ބިލިއަން މި އަހަރު ހަަރަދު ކުރިއިރު މިދިޔަ އަހަރު މި އަދަދު ހުރީ 6.6 ބިލިއަން ރުފިޔާގަ އެވެ. 

މި ބަދަލާއެކު މި އަހަރުގެ ބަޖެޓުގެ ޖުމްލަ ދަރަނި ވަނީ 10,9 ބިލިއަން ރުފިޔާއަށް އިތުރުވެފަ އެވެ. މިދިޔަ އަހަރު ވެސް ހުރީ މިވަރުގަ އެވެ. މި އަހަރު ހުންނާނެ ކަމަށް އަންދާޒާ ކުރެވެނީ 14 ބިލިއަން ރުފިޔާގަ އެވެ.