އޯފެކްގެ ނިންމުމަށް ތާއީދު ކުރުމުގައި ނުފޫޒެއް ނެތް: ސަަރުކާރު
އެ ގްރޫޕުން ބުނަނީ ދުނިޔޭގެ އިގްތިސޯދު މަޑުޖެހެމުން ދާތީ ތެލުގެ އަގުތައް ވެއްޓެން ފަށާފައިވާ ކަމަށާއި ތެލުގެ އެކްސްޕޯޓް މަދު ކުރީ އެއް ހަމައެއްގައި އަގުތައް ބަހައްޓާން ވެގެން ކަމަށެވެ. "އޯޕެލް ޕްލަސް" އިން ނިންމާފައި ވަނީ އަންނަ މަހުން ފެށިގެން ދުވާލަކު ދެ މިލިއަން ފީފާއަށް ތެޔޮ އުފައްދާ މިންވަރު މަދު ކުރާށެވެ.
ތެޔޮ އުފައްދާ މިންވަރު މަދުކުރަން "އޯޕެކް ޕްލަސް" ގައި ހިމެނޭ ގައުމުތަކުން ނިންމި ބޮޑު ނިންމުމަށް ދިވެހި ސަރުކާރުން ތާއީދު ކުރީ އެއްވެސް ބައެއްގެ ނުފޫޒެއް އެގޮތަށް ނިންމުމަށް އޮވެގެން ނޫން ކަމަށް ސަރުކާރުން ބުނެފި އެވެ.
އޯޕެކް ޕްލަސްގެ އެ ނިންމުމާ ގުޅިގެން އެމެރިކާ އާއި ޔޫރަޕުގެ ގައުމުތަކުން ސައުދީއަށް ފާޑުކިޔުން އަމާޒުކުރަމުން ދަނިކޮށް ރާއްޖެއިން ވަނީ ބަޔާނެއް ނެރެ، އެ ނިންމުމަށް ތާއީދު ކުރާކަން ހާމަކޮށްފައެވެ.
ދުނިޔެއަށް މިވަގުތަށް ވަރަށް މުހިންމު އެ ފިޔަވަޅާ ގުޅިގެން ދިވެހި ސަރުކާރުން ބުނެފައި ވަނީ ތެޔޮ އުފެއްދުން ލިމިޓު ކުރީ އިގްތިސާދީ ހާލަތުގެ އިތުރުން ޓެކްނިކަލް ބައެއް ކަންކަމަށް ރިއާޔަތް ކުރުމަށް ފަހު ކަމަށް ގަބޫލުކުރާ ކަމަށެވެ. އަދި ދުނިޔޭގެ ހަކަތައިގެ ބާޒާރުގައި ހަމަޖެހުމުން ގާއިމުވެފައި އޮތުން ރާއްޖެ ފަދަ ތެލަށް ބަރޯސާވެފައިވާ ކުޑަ ގައުމަކަށް މުހިންމު ކަމަށެވެ.
ރާއްޖެއިން އެ ނިންމުން ނިންމުމުގައި ބައެއްގެ / ގައުމެއްގެ ނުފޫޒެއް އޮތްތޯ މިއަދު އޮތް ނޫސްވެރިންގެ ބައްދަލުވުމުގައި ސުވާލުކުރުމުން ސަރުކާރުގެ ފަރާތުން ރައީސުލްޖުމްހޫރިއްޔާގެ އޮފީހުގެ ތަރުޖަމާން މިއުވާން މުހައްމަދު ވިދާޅުވީ އެއްވެސް ގައުމެއްގެ ނުފޫޒުގައި ދިވެހި ސަރުކާރުން ނިންމުމެއް ނުނިންމާނެ ކަމަށެވެ. ރާއްޖެއިން އެ ނިންމުން ނިންމީ ތެލުގެ އަގު މާކެޓުގައި ނުހިފެހެއްޓިއްޖެނަމަ ރާއްޖެއަށް ވެސް ބޮޑު ގެއްލުމެއް ލިބިދާނެތީ ކަމަށެވެ. ބައެއް ގައުމުތަކުން އެއީ ސިޔާސީ ނިންމުމެއް ކަމަށް ސިފަ ކުރި ނަމަވެސް އެއީ ސިޔާސީ ނިންމުމެއް ނޫން ކަމަށް ސަރުކާރުން ވަނީ ބުނެފައެވެ.
މިއުވާން އިތުރަށް ވިދާޅުވީ ރާއްޖެއަކީ މުޅީން ވެސް ތެޔޮ އިމްޕޯޓް ކުރާ ގައުމެއް ކަމުން ލިބިދާނެ ބޮޑު ގެއްލުމަކަށް ވިސްނަން ޖެހޭނެ ކަމަށެވެ. ތެލުގެ މާކެޓުގައި އަގު ހިފަހައްޓަން އޯޕެކުން ކުރާ މަސައްކަތްތަކަށް ސަރުކާރުން މަރުހަބާ ކިޔާނެ ކަމަށް ވެސް ވިދާޅުވެފައިވެ އެވެ.
އެ ގްރޫޕުން ބުނަނީ ދުނިޔޭގެ އިގްތިސޯދު މަޑުޖެހެމުން ދާތީ ތެލުގެ އަގުތައް ވެއްޓެން ފަށާފައިވާ ކަމަށާއި ތެލުގެ އެކްސްޕޯޓް މަދު ކުރީ އެއް ހަމައެއްގައި އަގުތައް ބަހައްޓާން ވެގެން ކަމަށެވެ. "އޯޕެލް ޕްލަސް" އިން ނިންމާފައި ވަނީ އަންނަ މަހުން ފެށިގެން ދުވާލަކު ދެ މިލިއަން ފީފާއަށް ތެޔޮ އުފައްދާ މިންވަރު މަދު ކުރާށެވެ.
ކޮމެންޓް
Republic of Maldives