އިސްރާއީލުން ނުފައިބާނެކަމުގެ އަލާމާތެއް | ޣައްޒާގެ މެދުގައި ބޭސްތަކެއް ގާއިމުކުރަނީ

ޣައްޒާގެ މެދުތެރޭގައި ހުރި ފަލަސްތީނުގެ އެތައް އިމާރާތްތަކެއް ސުންނާފަތިކޮށްލުމަށްފަހު އެ ސަރަހައްދުގައި އިސްރާއީލުގެ ބޭސްތަކެއް ހަދަމުންދާކަން ސެޓެލައިޓު ފޮޓޯތަކާއި އިސްރާއީލުގެ މަސްއޫލުވެރިންގެ އިއުތިރާފުން ސާފުވެއްޖެ އެވެ. 

އިސްރާއީލުން ޣައްޒާގެ މެދު ތެރޭގައި އަސްކަރީ ބޭސްތައް ގާއިމުކޮށް ފަލަސްތީނުގެ އިމާރާތްތައް ސުންނާފަތިކުރަމުންދާ ދިއުމަށް ބަލާއިރު ކުރިއަށް އޮތް ތަނުގައި ދިގު މުއްދަތަކަށް ޣައްޒާގައި އިސްރާއީލު އަސްކަރިއްޔާ ގާއިމުވެ އޮތުމުގެ އިހުތިމާލު އެބައޮތްކަމަށް މުހައްލިލުން ދެކެވަޑައިގަންނަނަވަ އެވެ.

ޣައްޒާއަށް އިސްރާއީލު އަރައިގަތުމާއެކު ޣައްޒާގެ ދެފަޅީގެ ދެމެދުގައި އޮންނަ ހަތަރު މޭލު ދިގު މަގެއް އިސްރާއީލު ސިފައިން އަންނަނީ ހިފަހައްޓަމުންނެވެ. ނެޓްޒަރިމް ކޮރިޑޯގެ ނަމުން އިސްރާއީލުން ނަން ދީފައިވާ މި މަގުގައި އިސްރާއީލު ސިފައިން ގާއިމުވެގެން ތިބުމުގެ ބޭނުމަކީ ހަމަލާތަކުގެ ސަބަބުން އުތުރު ޣައްޒާ ދޫކޮށް ދިޔަ އެތައް ލައްކަ މީހުންނަށް އަނބުރާ ރުޖޫއަވިޔަނުދީ ހިފަހެއްޓުމެވެ. މަޑުމަޑުން އެ ސަރަހައްދު ފުޅާކޮށް އިސްރާއީލުގެ އަސްކަރިއްޔާއިން 19 އަކަމޭލުގެ ސަރަހައްދެއް ގާއިމުކޮށްފައިވާކަން ސެޓެލައިޓު ފޮޓޯތަކާއި ވީޑިޔޯއިން މިހާރު ފެނެ އެވެ. 

ނިއުޔޯކް ޓައިމްސްއިން ރިޕޯޓުކުރި ގޮތުގައި ފާއިތުވި ތިން މަސްދުވަހު އިސްރާއީލު ސިފައިންވަނީ އެ މަގުގެ ވަށައިގެން ހުރި 600 އަށްވުރެ ގިނަ އިމާރާތް ސުންނާފަތިކޮށްފަ އެވެ. މިއީ ބަފާ ޒޯނެއް ގާއިމުކުރުމަށް ކުރާ މަސައްކަތެއް ކަމުގައި ބެލެވެ އެވެ. އަދި އެ މަގުގައި އައުޓްޕޯސްޓުތަކުގެ ވިއުގައެއް ގާއިމުކޮށް އެތަންތަން ރައްކާތެރިކުރެވޭނެ އިންތިޒާމުތައް ގާއިމުކޮށް މުވާސަލާތީ ޓަވަރުތައްވަނީ ހަދާފަ އެވެ. 

މީގެ ކުރިން ޣައްޒާގައި އިސްރާއީލުން ސަރަހއްދުތަކެއް ހިސާރުކޮށްފައި ނެތްނަމަވެސް މި ފިޔަވަޅުތަކާއެކު ބެލެވެނީ ކުރިއަށް އޮތް ތަނުގައި އިސްރާއީލުން ޣައްޒާގެ ބައެއް ބިންތަކުގައި ގާއިމުވެގެން ތިބެން ނިންމާފައިވާ ކަމަށެވެ. އިސްރާއީލު އަސްކަރިއްޔާއިން ބުނަމުންދަނީ މިފިޔަވަޅަކީ އޮޕަރޭޝަނަލް ބޭނުންތަކަށް އަޅާފަައިވާ ފިޔަވަޅެއް ކަމަށެވެ. 

އިސްރާއީލުގެ ލީޑަރުންވަނީ ހަނގުރާމަ ނިމުމަށްފަހުވެސް  ޣައްޒާގެ މައްޗަށް ސަލާމަތީ ކޮންޓުރޯލު ދަމަހައްޓަވާނެ ކަމުގެ ޔަގީންކަން ދެއްވާފަ އެވެ. ނަމަވެސް މިހާތަނަށް ޣައްޒާގެ ސަލާމަތީ ކޮންޓުރޯލު އިސްރާއީލުގެ އަތްމަތީގައި ބާއްވާނެ ގޮތެއް ވިދާޅުވެނުދެއްވަ އެވެ. 

1967 ވަނަ އަހަރުގެ އަރަބި އިސްރާއީލު ހަނގުރާމާގައި އިސްރާއީލުން ޣައްޒާ ހިފި އެވެ. އަދި އެތަނުގައި ޔަހޫދީ އާބާދުކުރުންތައް ގާއިމުކޮށް އަސްކަރީ ބޭސްތައް އެޅިވެސްމެ އެވެ. ނަމަވެސް 2005 ވަނަ އަހަރު އިސްރާއީލުންވަނީ އެ ސަރަހައްދުން އިސްރާއީލު އަސްކަރިއްޔާ ނެރެ، އެތަނުގައި ތިބި ޔަހޫދީ އާބާދުވެރިންވެސް ބޭރުކޮށްފަ އެވެ. 

ނެޓްޒަރިމް ކޮރިޑޯއަށް ނަން ދީފައިވަނީ ކުރިން އެ ސަރަހައްދުގައި ގާއިމުކޮށްފައި އޮތް އިސްރާއީލުގެ އާބާދުކުރުމެއްގެ ނަމުންނެވެ. ނިއުޔޯކު ޓައިމްސްއިން ހޯދާފައިވާ ސެޓެލައިޓު ފޮޓޯތަކުން ފެންނަ ގޮތުގައި އެ ކޮރިޑޯގައި އިސްރާއީލުގެ 19 ބޮޑު އަސްކަރީ ބޭސް ގާއިމުކޮށްފައިވެ އެވެ. މި ބޭސްތަކުގެ ތެރެއިން 12 ތަނެއް ގާއިމުކުރީ ނުވަތަ ގާއިމުކުރުމުގެ މަސައްކަތް ހަލުއިކޮށް ނިންމައިލީ ފާއިތުވި ސެޕްޓެންބަރު މަހުގެ ކުރީ ކޮޅުން ފެށިގެންނެވެ. 

އިސްރާއީލު އަސްކަރިއްޔާގެ ތަރުޖަމާނެއް ކަމުގައިވާ ކާނަލް ނަދާވް ސޮޝާަނީ ވިދާޅުވެފައިވަނީ މި އަސްކަރީ ބޭސްތަކަކީ ހަމައެކަނި އޮޕަރޭޝަނަލް ބޭނުންތަކަށް ގާއިމުކޮށްފަައިވާ ތަންތަންކަމަށާއި، އެ ސަރަހައްދުގައި އަޅާފައިވާ ކޮންމެ ބޭސްއަކީ އެންމެ ދުވަހަަކުންވެސް ނަގައިލެވޭ ގޮތަށް އަޅާފައިވާ ތަންތަން ކަމަށެވެ. 

ނަމަވެސް މިތަންތަނުގެ ވަށައިގެން ގާއިމުކޮށްފައިވާ ދިފާއުތަކަށް ބަލާއިރު އިސްރާއީލުން އެ ސަރަހައްދުގައި ދިގު މުއްދަތަކަށް ދެމި ތިބެން ގަސްތުކުރާކަން ސާފުވެ އެވެ. އިސްރާއީލު ސަރުކާރުގެ ވަޒީރެއްކަމުގައިވާ އަވީ ޑިޗާ ވިދާޅުވެފައިވަނީ "އިސްރާއީލު ޣައްޒާގައި ދިގު މުއްދަތަކަށް ދެމި އޮންނާނެ،" ކަމަށެވެ. 

"އަދި ނިމުމުގެ ފެށުމަކަށްވެސް ވާސިލުނުވެވޭ. [ޣައްޒާގައި] ރަން ހުރި މަސައްކަތްތައް ބައިވަރު،" ނޫސްވެރިންނަށް މައުލޫމާތު ދެއްވަމުން ޑިޗާ ވިދާޅުވި އެވެ. 

މި އަހަރުގެ ސެޕްޓެންބަރު ތިންވަނަ ދުވަހުން ފެށިގެން 21 ނޮވެންބަރާ ދެމެދު އިސްރާއީލުންވަނީ ޣައްޒާގެ 620 އިމާރާތެއް ބިމާ ހަމަކޮށްފަ އެވެ. އެގޮތުން އިސްރާއީލު އަސްކަރިއްޔާގެ 749 ވަނަ ކޮމްބެޓް އިންޖިނިއަރިން ބެޓަލިއަންއިންވަނީ ސުންނާފަތިކޮށްލާފައިވާ ބައެއް އިމާރާތްތައް ބިމާހަމަކުރި މަންޒަރު ފެންނަ ވީޑިޔޯތައް އާންމުކޮށްފަ އެވެ. 

އިސްރާއީލު އަސްކަރިއްޔާއިން ބުނާ ގޮތުގައި އެ އިމާރާތްތަކުގެ ތެރެއިން ބައެއް ތަންތަނަކީ ހަމާސް ހަނގުރާމަވެރިން ބޭނުންކުރަމުން އައި ތަންތަނެވެ. އެ ތަންތަން ބިމާހަމަކޮށްލި މަގުސަދަކީ ނެޓްޒަރިމް ކޮރިޑޯގައި ހަރަކާތްތެރިވާ އިސްރާއީލު ސިފައިންނަށް ވަންހަނާވެގެން ތިބެ ހަމަލާދިނުމުގެ ފުރުސަތު ފަލަސްތީނުގެ ހަނގުރާމަވެރިންނަށް ބަންދުކުރުން ކަމަށްވެސް ކާނަލް ޝޮޝާނީ ވިދާޅުވި އެވެ.