އަލަށް ރިޓަޔާކުރާ މީހުންނަށް މަހުން މަހަށް ދޭ އިނާޔަތް ކަނޑައިނުލަން ނިންމަވައިފި

ސަރުކާރުގެ ބައެއް އިދާރާތަކުގައި މަސައްކަތްކުރާ މުވައްޒަފުން ރިޓަޔާކުރުމުން އެ އިދާރާތަކުން ޕެންޝަނުގެ ގޮތުގައި މަހުން މަހަށް ދެމުން އައި ފައިސާ އަންނަ އަހަރުން ފެށިގެން އަލަށް ރިޓަޔާކުރާ މުވައްޒަފުންނަށް ނުދޭން ނިންމައި އިދާރާތަކަށް އެންގި އެންގުން ބާތިލުކުރަން ނިންމައިފި އެވެ. 

އަންނަ އަހަރަށް ލަފާކުރާ ދައުލަތުގެ ބަޖެޓާ ގުޅޭ ގޮތުން ނޫސްވެރިންނަށް މައުލޫމާތު ދިނުމަށް ފިނޭންސް މިނިސްޓްރީން ބޭއްވި ބައްދަލުވުމެއްގައި އެ މިނިސްޓްރީން ބުނި ގޮތުގައި ޑަބަލް ޕެންޝަނުގެ މައްސަލައަކީ މުސްތަގުބަލުގައި ވަރަށް ބޮޑަށް ބޮޑުވާނެ މައްސަލައެކެވެ. 

އެގޮތުން އެ މިނިސްޓްރީން ފާހަގަކުރި ގޮތުގައި މިހާރު އަވަހަށް ރިޓަޔާކުރާ ބައެއް މުވައްޒަަފުންނަށް ރިޓަޔަމެންޓު ޕެންޝަނުގެ ގޮތުގައި އެއްފަހަރާ ފައިސާގެ ޕެކޭޖެއް ދިނުމަށްފަހު މަހުން މަހަށް ޕެންޝަން އެލަވެންސެއް ދެމުންދާއިރު އެ މުވައްޒަފުން ފަހުން އެހެން އިދާރާތަކުގައި މަސައްކަތްވެސް ކުރާ ކަމަށެވެ. 

މިފަދަ ކަންބޮޑުވުންތަކާ ގުޅިގެން ބައިނަލްއަގުވާމީ މާލީ އިދާރާތަކުން އަންނަނީ ޕެންޝަން ސްކީމު އިސްލާހުކޮށް އިދާރާތަކުން ވަކިން ދެމުން އަންނަ ޕެންޝަންތައް ކަނޑައިލުމަށް ސަރުކާރަށް ލަފާދެމުންނެވެ. މިހާތަނަށް އެއްވެސް ސަރުކާރަކުން އެ ފިޔަވަޅުތައް އަޅާފައިނުވެ އެވެ. 

އަންނަ އަހަރު ޕެންޝަން ސްކީމު އިސްލާހުކުރުމުގެ ގޮތުން މިފަދައިން އިދާރާތަކުން ދެމުން އައި ރިޓަޔަމެންޓު ޕެންޝަން ފައިސާގެ ތެރެއިން މަހުން މަހަށް ދެމުން އައި ފައިސާ ދިނުން ހުއްޓައިލަަން ފިނޭންސް މިނިސްޓްރީން އަންގާފައިވެ އެވެ. އެއިރު ނިންމާފައިވަނީ މިހާރު އެ އިނާޔަތް ލިބޭ ފަރަތްތަކަށް އިނާޔަތް ދެމުންގެންދިޔަ ނަމަވެސް އެކެއް ޖަނަވަރީން ފެށިގެން ރިޓަޔާކުރާ ފަރާތްތަކަށް އިނާޔަތް ނުދިނުމަށެވެ. 

މި ބަދަލަށް އަމަލުކުރަން އެންގި އެންގުން ބާތިލުކުރައްވަން ރައީސް ޑރ.މުހައްމަދު މުއިއްޒު ނިންމެވީ އެ ބަދަލާ ގުޅިގެން އެކި ފަރާތްތަކުން ފާހަގަކުރަމުންދާ ކަންބޮޑުވުންތަކަށް ރިއާޔަތްކުރައްވައި، ރައްޔިތުން ބޭނުންވާ ގޮތަކީ މިވަގުތަށް އެ ބާވަތުގެ ރިޓަޔަމެންޓު އެލަވަންސްތައް ކަނޑައިލުން ނޫންކަމަށް ފެނިވަޑައިގަންނަވާތީކަމަށް ރައީސް އޮފީހުން ބުނެ އެވެ. 

އައު މުސާރައިގެ އޮނިގަނޑަށް ބަދަލުވާ ފަރާތްތަކުގެ ރިޓަޔަމެންޓު ޕެންޝަނުގެ ކަންކަން މިހާރެކޭ އެއްގޮތަށް ކުރިއަށްގެންދިއުމަށް އަދި އޮނިގަނޑު ތެރެއަށް ނުވަންނަ މުވައްޒަފުން އޮނިގަނޑަށް ބަދަލުވުމާ ހަމައަށް ރިޓަޔާމެންޓު ޕެންޝަނާ ގުޅޭ ކަންކަން މިހާރެކޭ އެއްގޮތަށް ކުރިއަށްގެންދަން ރައީސް ނިންމެވި އެވެ.