ބަންޑާރަނައިބުގެ އޮފީސް ސިވިލް ސާވިސްއިން ވަކިކުރަން ބިލެއް ހުށަހަޅައިފި
އެ އޮފީސް ގާއިމުކުރުމާއެކު އެ އޮފީހުގައި މަސައްކަތްކުރާ މުވައްޒަފުންނާ ގުޅޭ އުސޫލުތައް ކަނޑައެޅުމަކީވެސް ބިލު ހުށަހެޅުމުގެ މަގުސަދެއްގެ ގޮތުގައި ބަޔާންކޮށްފައިވެ އެވެ.
ބަންޑާރަނައިބުގެ އޮފީސް ސިވިލް ސާވިސްއިން ވަކިކުރުމަށް ސަރުކާރުގެ ފަރާތުން ގާނޫނެއް އެކުލަަވައިލާ ރައްޔިތުންގެ މަޖިލީހަށް ފޮނުވައިފި އެވެ.
މި ބިލު މަޖިލީހަށް ހުށަހެޅުއްވީ ޕީއެންސީއަށް ނިސްބަތްވެވަޑައިގަންނަވާ މާފަންނު ދެކުނު ދާއިރާގެ މަޖިލިސް މެންބަރު އަބްދުﷲ ރިފާއު (ބޮޗޭ) އެވެ.
އެ ބިލުގެ މަގުސަދެއްގެ ގޮތުގައި ބިލުގައި ބަޔާންކޮށްފަައިވަނީ ބަންޑާރަނައިބުގެ މަގާމަށް އައްޔަންކުރެވޭ މީހެއްގެ ކިބައިގައި ހުންނަންޖެހޭ ޝަރުތުތަކާއި ބަންޑާރަނައިބުގެ ގާނޫނީ ޒިންމާތަކާއި މަސްއޫލިއްޔަތުތައް ބަޔާންކުރުމާއެކު، އެ މަސްއޫލިއްޔަތުތައް އަދާކުރުމުގައި ބަންޑާރަނައިބު ހިފަހައްޓަންޖެހޭނެ އުސޫލުތަކާއި ހަމަތައް ބަޔާންކުރުން ކަމަށެވެ.
އަދި ބިލުގެ ދަށުން ބަންޑާރަނައިބުގެ މަސްއޫލިއްޔަތުތައް އަދާކުރުމުގައި އެހީތެރިވުމަށް ބަންޑާރަނައިބުގެ އޮފީހުގެ ނަމުގައި ދިވެހި ސިވިލް ސާވިސްގައި ނުހިމެނޭ ވަކި އޮފީހެއް ގާއިމުކުރުމަކީވެސް ބިލުގެ މަގުސަދެއްގެ ގޮތުގައި ބަޔާންކޮށްފައިވެ އެވެ.
އެ އޮފީސް ގާއިމުކުރުމާއެކު އެ އޮފީހުގައި މަސައްކަތްކުރާ މުވައްޒަފުންނާ ގުޅޭ އުސޫލުތައް ކަނޑައެޅުމަކީވެސް ބިލު ހުށަހެޅުމުގެ މަގުސަދެއްގެ ގޮތުގައި ބަޔާންކޮށްފައިވެ އެވެ.
ބަންޑާރަނައިބުގެ އޮފީހަކީ މިހާރު ސިވިލް ސާވިސްގެ ދަށުން ހިންގަމުން އަންނަ އޮފީހެކެވެ.
ފާއިތުވި ދައުރުގައި ހާރިޖީވުޒާރާވެސް ސިވިލް ސާވިސްގެ ދަށުން ވަކިކޮށް ފޮރިން ސާވިސްގެ ނަމުގައި ހާރިޖީ ހިދުމަތްތައް މުޅިން ވަކިން ގާއިމުކޮށް އެ ދާއިރާ ހިންގުމުގެ އުސޫލުތައް ގާނޫނެއްގައި އެކަށައަޅާފައިވެ އެވެ.
ކޮމެންޓް
Republic of Maldives