ޖޯ ބައިޑެން ދަރިކަލުންނަށް މައާފުދެއްވީ، އޭނާގެ ދަރިކަލުން މައްޗަށް އަންނަ ހުކުމެއް ލުއިކުރެއްވުމަށް ރިޔާސީ ބާރުތައް ބޭނުންނުކުރައްވާނެކަމަށް ވައުދުވެވަޑައިގަތުމަށްފަހު އެ ބަސްފުޅާ ހިލާފަށެވެ.
ރިޔާސީ ބާރު ބޭނުންކުރައްވައިގެން ދަރިކަލުން ހަންޓާ ބައިޑަންއަށް މައާފު ނުދެއްވާނެކަމަށް ވިދާޅުވުމަށްފަހު، ހަންޓާގެ މައްޗަށް ހުކުމްކުރުމުގެ ކުރިން އޭނާއަށް މައާފު ދެއްވުމަށް އެމެރިކާގެ ރައީސް ޖޯ ބައިޑެން ނިންމަވައިފި އެވެ.
އާދީއްތަދުވަހު ބައިޑެން ވިދާޅުވީ ހަންޓާގެ މައްޗަށް ދައުވާކޮށްފައިވަނީ އަދުލު އިންސާފުން ބޭރުން އޭނާގެ އާއިލީ ނަމުގެ ސަބަބުން އަމާޒުފަތްގަނޑަކަށް ހަދައިގެން ސިޔާސީ ގޮތުން ކަމަށެވެ.
ވައިޓްހައުސްއިން ނެރުނު ބަޔާނެއްގައި ބައިޑެން ވިދާޅުވީ ހަންޓާ ފުނޑައިލުމަށް ގިނަ މަސައްކަތްތަކެއް ފާއިތުވި ފަސް އަހަރު ކުރި ނަމަވެސް އޭނާ ހުރީ މަސްތުވާތަކެތިން މިންޖުވެގެން ސަލާމަތުން ކަމަށެވެ.
"ހަންޓާ ފުނޑައިލުމަށް ކުރި މަސައްކަތުގެ ތެރެެއިން އަޅުގަނޑު ފުނޑައިލުމަށްވެސް އެމީހުން މަސައްކަތްކޮށްފި. އަދި އެ މަސައްކަތްތައް މިހާ ހިސާބުން ހުއްޓައިލާނެކަމަަށް ބަލަންޖެހޭ ސަބަބެއް ނެތް. ނަމަވެސް ފުދޭވަރުވެއްޖެ،" ބައިޑެންގެ ބަޔާނުގައި ވިދާޅުވި އެވެ.
ޝަރުއީ ނިޒާމަށް އިތުބާރުކުރެއްވި ނަމަވެސް ހަންޓާގެ މައްޗަށް ހިންގި ޝަރީއަތުގެ ތެރެއަށް ސިޔާސީ ކަންކަން ވަދެ މުޅި އިޖުރާއާތު ކިލަނބުވެފައިވާކަމަށް ދެކެވަޑައިގަންނަވާ ކަމަށާއި، އޭނާ ކުށްވެރިވެއްޖެކަމަށް ކަނޑައެޅި ނިޔާއަކީ އަދުލު އިންސާފުން ބޭރުން އިއްވާފައިވާ ނިޔާއެއްކަމަށް ގަބޫލުކުރައްވާކަމަށް ވިދާޅުވެ ބައިޑަން އެދިވަޑައިގަތީ އެމެރިކާ ރައްޔިތުން އޭނާ އެފަދައިން ނިންމެވި ސަބަބު ވިސްނައިގަތުމަށެވެ.
"އަޅުގަނޑުގެ އުންމީދަކީ ބައްޕައެއް އަދި ރައީސެއް މި ނިންމުން ނިންމި ސަބަބުން އެމެރިކާ ރައްޔިތުންނަށް ވިސްނޭނެކަމަށް،" ބައިޑެން ވިދާޅުވި އެވެ.
ހަންޓާގެ މައްޗަށް ހުކުމް ކުރަން އޮތް މައްސަލައަކީ ބަނޑިއެއް ގަތްއިރު ބެކްގުރައުންޑް ޗެކްކުގައި މަސްތުވާތަކެތި ބޭނުންނުކުރާކަމަށް ވިދާޅުވެ އިތުރުފުޅުހައްދަވާފައިވާތީއާއި، 1.4 މިލިއަން ޑޮލަރު ޓެކުްސްގެ ގޮތުގައި ނުދައްކަވާ އޮތް މައްސަލައެއްގަ އެވެ.
އެމެރިކާގެ އިންތިހާބީ ރައީސް ޑޮނާލްޑް ޖޭ ޓުރަމްޕު ސިފަކުރެއްވި ގޮތުގައި ބައިޑެން އޭނާގެ ދަރިކަލުންނަށް މައާފު ދެއްވުމަކީ މުޅި ނިޒާމު ނަހަމަ ގޮތުގައި ބޭނުންކުރެއްވުމެވެ. އަދި މިއީ ވެރިޔަކު ކުރައްވައިގެންވާނެ ކަމެއް ނޫންކަމަށްވެސް ވިދާޅުވި އެވެ.
ޓެކްސް މައްސަލާގައި އެންމެ ދިގުވެގެން 25 އަހަަރު އަދި ހަތިޔާރު ގަތުމުގައި އޮޅުވައިލުމުގެ މައްސަލާގައި ދިގުވެގެން 17 އަހަރުގެ ހުކުމެއް ހަންޓާ މައްޗަށް އައުން އެކަށީގެންވެ އެވެ.