މިނިސްޓަރު ވިދާޅުވި ގޮތުގައި ފުލުހުންގެ މި އޮޕަރޭޝަންތަކުގައި މައްސަލައާ ގުޅުންހުރި އިލެކްޓްރޯނިކް ސާމާނާއި ލިޔެކިޔުން ހޯދާފައިވެ އެވެ.
ފިއުލް ސަޕްލައި މޯލްޑިވްސް (އެފްއެސްއެމް)ގެ މުވައްޒަފުންތަކެއް އެ ކުންފުނީގެ ތެލުން ވައްކަންކޮށް އެއިން ފައިސާ ހޯދައި އެ ފައިސާ ލޯންޑާކުރިކަމަށް ތުހުމަތުވާ މައްސަލައެއް ފުލުހުން ތަހުގީގުކުރަން ފަށައިފި އެވެ.
މި މައްސަލަ ފުލުހުން ބަލަމުންދާކަން ހާމަކުރެއްވި ހޯމްލޭންޑް ސެކިއުރިޓީ މިނިސްޓަރު އަލީ އިހުސާނު މިރޭ އެކްސްގައި ޝާއިއުކުރެއްވި ޕޯސްޓެއްގަ އެވެ. އިހުސާން ވިދާޅުވީ އެފްއެސްއެމްގެ މުވައްޒަފުންތަކެއް ކުންފުނީގެ ތެލުން ވައްކަންކޮށް އެ ވައްކަމުން ހޯދާ ފައިސާ ލޯންޑާކުރަމުންދާ ކަމަށް ޝައްކުވާ މައްސަލައެއް ފުލުހުން ތަހުގީގުކުރަން ފަށާފައިވާ ކަމަށެވެ.
އިތުރަށް އިހުސާން ވިދާޅުވީ އެ މައްސަލައާ ގުޅިގެން ފުލުހުން މިހާތަނަށް 10 މީހަކާއި ދެ ގެއާއި ތެޔޮ އުފުލާ ދެ ބާޖު ބަލައިފާސްކޮށްފައިވާ ކަމަށެވެ. މިނިސްޓަރު ވިދާޅުވި ގޮތުގައި ފުލުހުންގެ މި އޮޕަރޭޝަންތަކުގައި މައްސަލައާ ގުޅުންހުރި އިލެކްޓްރޯނިކް ސާމާނާއި ލިޔެކިޔުން ހޯދާފައިވެ އެވެ.
އިހުސާން އިތުރަށް ވިދާޅުވީ މައްސަލައިގެ ތަހުގީގު ކުރިއަށްދާ މިންވަރަކުން އެ މައްސަލައާ ގުޅުންހުރި އިތުރު ތަފުސީލުތައް ހާމަކުރައްވާނެ ކަމަށެވެ.
މިނިސްޓަރު ވިދާޅުވެފައިވަނީ އެފަދަ މައްސަލަތައް ލަސްނުކޮށް ވީހާވެސް އަވަހަކަށް ފުރިހަމައަށް ތަހުގީގުކޮށް ވަކި މީހަކު އިސްތިސްނާކުރުމެއް ނެތި ގާނޫނީ ފިޔަވަޅު އެޅުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަރަށް ބޮޑަށް އިސްކަންދެއްވާ ކަމެއް ކަމުގަ އެވެ.
މިފަދަ މައްސަލައެއް ތަހުގީގުކުރަން ފަށާފައިވާއިރު އެފްއެސްއެމްގެ އެމްޑީގެ މަގާމުގައި ހުންނެވި އިސްމާއީލް ސުހައިލުވަނީ އެ މަގާމުން އިސްތިއުފާދެއްވާފަ އެވެ. އޭނާ އިސްތިއުފާދެއްވީ ބޮޑެތި ކޮރަޕްޝަނުގެ ތުހުމަތުތައް އަމާޒުވެފައިވާތާ ދުވަސްތަކެއް ވެފައިވަނިކޮށެވެ.