ކެބިނެޓަށް ބަދަލު ގެންނަން އުޅޭ ވާހަކަ އަކީ ދޮގެއް: ރައީސް އޮފީސް
"ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައިނުވާ ވާހަކަ ދަންނަވަން،" ސޯޝަލް މީޑިއާގައި މިހާރު ދެކެވެމުންދާ ވާހަކަތަކާއި ގުޅިގެން ހީނާ ދެންމެ ވިދާޅުވި އެވެ.
ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައިނުވާ ކަމަށް ރައީސުލްޖުމްހޫރިއްޔާގެ އޮފީހުން ބުނެފި އެވެ.
ރައީސް އޮފީހުން މިހެން ބުނެފައި ވަނީ ކެބިނެޓަށް ބޮޑެތި ބަދަލުތަކެއް ގެންނަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފި ކަމަށް ބުނެ ދެކެވޭ ވާހަކަތަކާއި ގުޅިގެންނެވެ. ރައީސުލްޖުމްހޫރިއްޔާގެ އޮފީހުގެ ތަރުޖަމާން ހީނާ ވަލީދު ދެންމެ ވިދާޅުވީ ކެބިނެޓަށް ބަދަލު ގެންނަން ނިންމި ކަމަށް ބުނާ ވާހަކަ އަކީ ދޮގެއް ކަމަށެވެ.
"ކެބިނެޓަށް އެއްވެސް ބަދަލެއް ގެންނަވަން ރައީސުލްޖުމްހޫރިއްޔާ ނިންމަވާފައިނުވާ ވާހަކަ ދަންނަވަން،" ހީނާ ވިދާޅުވި އެވެ.
ވާހަކަތައް ފެތުރުނީ ޔޫތު މިނިސްޓަރު އިބްރާހިމް ވަހީދު (އަސްވާޑު) މަގާމުން ވަކިކުރަން ނިންމައިފި ކަމަށެވެ. އޭގެ ބަދަލުގައި ޔޫތު މިނިސްޓަރު ކަަމަށް ޓޫރިޒަމް މިނިސްޓަރު އިބްރާހިމް ފައިސަލް އައްޔަނު ކުރަން ނިންމާފައިވާ ކަމަށެވެ. ޓޫރިޒަމް މިނިސްޓަރު ކަމަށް އައްޔަނު ކުރަން ނިންމާފައި ވަނީ ފިނޭންސް މިނިސްޓަރު މޫސާ ޒަމީރު ކަމަށް ވެސް ވާހަކަތައް ދަނީ ފެތުރެމުންނެވެ.
ފިނޭންސް މިނިސްޓަރު ކަމަށް ގެންނަން ނިންމާފައި ވަނީ ފިނޭންސް މިނިސްޓްރީގެ އެޑްވައިޒަރަކަށް ހުންނެވި ކުރީގެ ގަވަރުނަރު އަހުމަދު ނަސީރެވެ. ނަސީރު މިހާރު ހުންނެވީ ފޮރިން މިނިސްޓްރީގަ އެވެ. މިނިސްޓަރުގެ ފެންވަރުގައި އެޑްވައިޒަރުކަން ދިން ނަސީރު ހަމަޖައްސާފައި ވަނީ އެމްބެސެޑާ އެޓް ލާޖްގެ މަގާމަށެވެ.
ކޮމެންޓް
Republic of Maldives