އެމްޑީޕީގެ އެކްޓިވިސްޓަކު ފުލުހަށް ހާޒިރުކުރާ ސަބަބު މިނިސްޓަރު ސާފުކޮށް ދެއްވައިފި

އެކްސް ގައި ކުރި ޕޯސްޓަކާއި ގުޅިގެން އިދިކޮޅު އެމްޑީޕީގެ އެކްޓިވިސްޓަކު ފުލުހުންގެ އިދާރާއަށް ހާޒިރުވާން އެންގި އެންގުމާއި ގުޅިގެން އެމްޑީޕީގެ ޗެއާޕާސަން ފައްޔާޒު އިސްމާއީލް (ފައްޔަ) ގެ ކަންބޮޑުވުންތަކަށް ހޯމް ލޭންޑް އެންޑް ސެކިއުރިޓީ މިނިސްޓަރު އަލީ އިހުސާން ޖަވާބު ދެއްވައިފި އެވެ.

އެކްސް ގައި ކުރި ޕޯސްޓަކާއި ގުޅިގެން ފުލުހަށް ހާޒިރުވާން އަންގާފައި ވަނީ ހއ. ތުރާކުނު ނިޔަދުރުމާގެ ހުސައިން ޝާފިއު އަށެވެ. މިއީ އޭނާގެ އެކްސް އެކައުންޓުން ކުރި ޕޯސްޓެއް ގައި ހަޑިހުތުރު ބަސް ބޭނުންކޮށް ބިރުވެރިކަން އުފެދޭ ގޮތަށް ލިޔެފައިވާ މައްސަލައާ ގުޅިގެން އެންގި އެންގުމެއް ކަމަށް ވެސް ބުނެފައިވެ އެވެ.

އެކަމާއި ގުޅިގެން ފައްޔާޒު ވިދާޅުވީ ޓްވީޓު ކުރާތީ ފުލުސް އޮފީހަށް ހާޒިރުވާން ޝާފިއުއަށް އަންގައިފި ކަމަށެވެ. އަދި ވިދާޅުވީ ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި ކަމަށާ ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށެވެ.

ރައްޔިތުންގެ އަޑު ކަނޑުވާލާ ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ ކަމަށް ވެސް ފައްޔާޒު ވިދާޅުވި އެވެ.

"ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ،" 

ފައްޔާޒުގެ އެ ވާހަކަތަކާއި ގުޅިގެން މިނިސްޓަރު އިހުސާން ވަނީ ޝާފިއު ފުލުހަށް ހާޒިރުކުރާ ސަބަބު ވަރަށް ބޮޑަށް ސާފު ކޮށްދެއްވާފަ އެވެ. ވިދާޅުވީ އޭނާގެ ޕޯސްޓުގައި ލިޔެފައި އޮތް -- "މަށަށް ކަލޭ މަގެއްމަތިން ނުފެއްނާތި" މި ޖުމްލައިން ކޮންމެވެސް މީހަކަށް ނިސްބަތްކޮށް އެމީހަކު މަގެއްމަތިން ފެނިއްޖެނަމަ އެމީހަކަށް ޖިސްމާނީގޮތުން ގެއްލުމެއް ދީފާނެ ކަމަށް ދޭހަވާގޮތަށް އޮތުމުން މިކަމުގެ ތަފްސީލު ހޯދާ މިކަން ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަން ޖެހޭ ކަމެއް ކަމަށެވެ.

"މާދަމާ މީހަކު މިފަދަ އިބާރާތެއް މަނިކުފާނަށް ނިސްބަތްކޮށް ނުވަތަ ދޭހަވާގޮތަށް ބުނެފިނަމަ އެއީ ހިޔާލުފާޅުކުރީ ކަމަށް ބަލާ އަޅާނުލާ ތިބެންވީތޯ؟ އަދި އެހެން ތިއްބާ މަނިކުފާނު މަގެއްމަތިން ފެނި ޖިސްމާނީ އަނިޔާއެއް ދީފިނަމަ އެއީ ފާޅުކުރި ހިޔާލު އިތުރަށް ސާފުކޮށް ދިނީ ކަމަށް ބަލާ އަޅާނުލާ ތިބެންވީތޯ؟ މިއީތޯ މަނިކުފާނުގެ ޒައާމަތެއްގައި މިގައުމުގައި ކަންކަން އޮންނާނެ ގޮތަކީ،" ފައްޔާޒަށް އަމާޒު ކުރައްވާ މިނިސްޓަރު އިހްސާން ސުވާލު ކުރެއްވި އެވެ.

މިނިސްޓަރު އިތުރަށް ވިދާޅުވީ ޔަގީނުން ވެސް މި ސަރުކާރުގައި އެއްވެސް ބޭފުޅެއް އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރި ކުރެވޭނެ ހުރިހާ ފިޔަވަޅެއް އަޅާނެ ކަމަށެވެ. އަދި ރާއްޖޭގެ ގާނޫނުތަކާއި ގަވާއިދުތަކުގެ އިމުގެތެރޭގައި ހިޔާލުފާޅު ކުރެވޭނެ އެންމެ ފުޅާމިނަށް އެކަން ކުރެވޭނެ މަގު އޮންނާނީ އަބަދުވެސް ހުޅުވިފައި ކަމަށެވެ.

"ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ވަރަށް ޢައިރު ޒިންމާދާރު ކަމެއް،" މިނިސްޓަރުގެ ޕޯސްޓް ގައި ވިދާޅުވި އެވެ.