އިންޑިޔާއިން ރާއްޖެއަށް އައި ފަތުރުވެރިންގެ އަދަދު ލައްކައިން މައްޗަށް

އިންޑިޔާއިން ރާއްޖެއަށް އަންނަ ފަތުރުވެރިންގެ އަދަދު އިތުރުވެ މި ނޮވެންބަރު 24 ވަނަ ދުވަހުގެ ނިޔަލަށް އެ ގައުމުން އައި ފަތުރުވެރިންގެ އަދަދު 110،001 އަށް އަރައިފި އެވެ. 

މި އަހަރު ކުރީ ކޮޅުގައި ތިން ނައިބުވަޒީރަކު އިންޑިޔާގެ ބޮޑުވަޒީރު ނަރެންދުރަ މޯދީއާ މުހާތަބުކޮށް ފުރައްސާރައިގެ ބަސްތަކެއް ބޭނުންކުރުމާ ގުޅިގެން އިންޑިޔާގެ ބޮޑެތި ފިލްމީ ތަރިންނާއި ސިޔާސީން ހިމެނޭ ގޮތަށް ރާއްޖެ ބޮއިކޮޓުކުރަން ގޮވައިލާ ކެމްޕެއިނެއް ހިންގި އެވެ. އެއަށްފަހު އިންޑިޔާއިން ރާއްޖެއަށް އަންނަ ފަތުރުވެރިންގެ އަދަދު ވަރަށް ބޮޑަށް މަދުވި އެވެ. 

ނަމަވެސް ރައީސް މުއިއްޒު އިންޑިޔާއަށް ކުރެއްވި ދަތުރުފުޅަށްފަހު އެ ގައުމުން ފަތުރުވެރިން އަންނަ މިންވަރުވަނީ އިތުރުވެފަ އެވެ. އިންޑިޔާ މާކެޓުގައި ރާއްޖެ އިޝްތިހާރުކުރަން ޓޫރިޒަމް މިނިސްޓްރީއާއި އެމްއެމްޕީއާރުސީ ގުޅިގެން ހާއްސަ ހަރަކާތްތަކެއް ކުރިއަށްގެންގޮސްފައިވެ އެވެ. 

އެގޮތުން ރައީސްގެ ދަތުރުފުޅުގެ ތެރެއިން ބޮލީވުޑުގެ ތަރިންތަކެއްގެ ބައިވެރިވުމާއެކު ރާައްޖެ ޕްރޮމޯޓުކުރުމަށް ހާއްސަ ހަރަކާތެއް ބޭއްވި އެވެ. އޭގެ އިތުރުން އިންޑިޔާގެ މުހިއްމު ބައެއް ސިޓީތަކުގައި ރޯޑް ޝޯތައް ބާއްވައި އެގައުމުގެ ފެއާތަކުގައި އެމްއެމްޕީއާރުސީން ބައިވެރިވެފައިވެ އެވެ. 

ޓޫރިޒަމް މިނިސްޓްރީގެ ސްޓޭޓު މިނިސްޓަރު މުހައްމަދު ނިހާދު ވިދާޅުވީ ސަރުކާރުން ކުރި މަސައްކަތްތަކާއެކު އިންޑިޔާ މާކެޓުން ޓޫރިސްޓުން އަންނަ މިންވަރު ވަރަށް ބޮޑަށް އިތުރުވެފައިވާ ކަމަށެވެ. އަދި ކުރިއަށް އޮތް އަހަރު އެ އަދަދު ދެގުނައަށް އިތުރުވާނެ ކަމަށްވެސް ނިހާދު ވިދާޅުވި އެވެ. 

ނިހާދު އިތުރަށް ފާހަގަކުރެއްވި ގޮތުގައި އިންޑިޔާއިން އަންނަ ފަތުރުވެރިންގެ އިތުރަށް ގިނަ އަދަދަކަށް އިންޑިޔާ މީހުން ދިރިއުޅޭ މެދުއިރުމަތީގެ ގައުމުތަކުން އަންނަ އިންޑިޔާ ފަތުރުވެރިންގެ އަދަދުވެސް މިއަހަރުވަނީ 18 އިންސައްތަ އިތުރުވެފަ އެވެ. 

މި އަހަރުގެ މިހާތަނަށް އިންޑިޔާގެ އިތުރަށް ތިން ގައުމަކުން ލައްކައަކަށްވުރެ ގިނަ ފަތުރުވެރިން އައިސްފައިވާއިރު އެންމެ ގިނަ ފަތުރުވެރިން ރާއްޖެއަށް އައި ދެ ގައުމުކަމަށްވާ ޗައިނާއާއި ރަޝިޔާއިން އައި ފަތުުރުވެރިންގެ އަދަދު ދެ ލައްކައަށްވުރެ އިތުރުވެފައިވެ އެވެ.