މަގުމައްޗަށް ވެއްޓިފައި އޮއްވާ ފެނުނު މީހާއަށް ފަރުވާ ދެނިކޮށް މަރުވެއްޖެ

މިއަދު ހެނދުނު މަގުމައްޗަށް ވެއްޓުނު މީހަކު ހޮސްޕިޓަލަށް ގެންގޮސް ފަރުވާ ދެމުން ދަނިކޮށް މަރުވެއްޖެ އެވެ.

އުމުރުން 53 އަހަރުގެ އައްޑޫ ހިތަދޫއަށް ނިސްބަތްވާ އަހުމަދު ޝަރީފް މިއަދު ހެނދުނު 8:56 ހާއިރު މަގުމައްޗަށް ވެއްޓުނީ އާޓިފިޝަލް ބީޗު ކައިރިންނެވެ. އެވަގުތު ފުލުހުން އެޓެންޑްވެ، އޭނާ ވަނީ ވަގުތުން ހޮސްޕިޓަލަށް ގެންގޮސްފަ އެވެ. 

މިއަދު ހެނދުނު މިހާދިސާ ހިނގި ތަނުގެ ބައެއް ވީޑިއޯތައް ވަނީ ސޯޝަލް މީޑިއާގައި އާންމުވެފަ އެވެ. ވީޑިއޯ އިން ފެންނަ ގޮތުގައި އެމީހާ ހޮސްޕިޓަލަށް ގެންދިޔައީ ޕިކަޕަކަށް އަރުވައިގެންނެވެ. ޕިކަޕުގައި އާއިލާގެ ދެ މީހަކާއި ފުލުހުން ތިބި މަންޒަރު ފެނެ އެވެ.

ފުލުހުން ބުނީ އަހުމަދު ޝަރީފް މަރުވެފައި ވަނީ އޭޑީކޭ ހޮސްޕިޓަލުގައި ފަރުވާ ދެމުން ދަނިކޮށް ހެނދުނު 10:03 ހާއިރު ކަމަށެވެ. މި ހާދިސާއާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް ވެސް ފުލުހުން ބުންޏެވެ.