ދެފުށް ފެނުމާއި އަދުލުގެ އުސޫލުތައް ނެގެހެއްޓުމަކީ މުސްލިމު ގައުމުތަކަށް ވާޖިބެއް: އިހުސާން
އިސްލާމީ އަގީދާ ނިޔާކުރާ ގޮތުން ދެފުށްފެނުމާއި އަދުލުވެރިކަމުގެ އަސާސްތަައް ނެގެހެއްޓުމަކީ މުސްލިމު ގައުމުތަކުގެ ޒިންމާއެއް ކަމުގައި މިނިސްޓަރު އިހުސާން ވިދާޅުވި އެވެ.
ދެފުށް ފެނުމާއި އަދުލާއި އިތުބާރު ނެގެހެއްޓުމަކީ އިސްލާމްދީނުގައި ލާޒިމުކުރައްވާފައިވާ ފަދައިން މުސްލިމު ގައުމުތަކުގެ ޒިންމާއެއްކަމަށް މިނިސްޓާ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެ އެވެ.
އޯއައިސީގެ މެންބަރު ގައުމުތަކުގެ އެންޓި-ކޮރަޕްޝަން ލޯ އެންފޯސްމެންޓު އިދާރާތަކުގެ ވަޒީރުންގެ ބައްދަލުވުމުގައި ދެއްވި ތަގުރީރުގައި މިނިސްޓަރު ވިދާޅުވީ ކޮރަޕްޝަން ނުވަތަ އިދާރީ ފަސާދައަކީ މުޖުތަމައުތަކުގެ ފޭރާން ހަލާކުކޮށްލައި، ތަރައްގީއަށް ހުރަސްއަޅައި ވެރިކަން ހިންގުން ބަލިކަށިކުރާ ކަމެއް ކަމަށެވެ.
އަދި އިސްލާމީ އަގީދާ ނިޔާކުރާ ގޮތުގެ މަތިން ދެފުށް ފެނުމުގެ އުސޫލުތަކާއި، އަދުލާއި އިތުބާރު ނެގެހެއްޓުމަކީ އިސްލާމީ ގައުމުތަކުގެ ޒިންމާއެއް ކަމުގައި އިހުސާން ވިދާޅުވި އެވެ. އަދި އެކަމުގެ މައްޗަށް ސޫރަތުއް ނިސާގެ 29 ވަނަ އާޔަތުން ދަލީލު ދެއްކެވި އެވެ.
އެ އާޔަތުގައި މާތްﷲ ސުބްހާނަހޫ ވަތައާލާ އަމުރުކުރައްވާފަައިވަނީ އެއްބަޔަކު އަނެއްބައެއްގެ ތަނަވަސްކަން ބޭއިންސާފުން ނުކެއުމަށެވެ.
ރާއްޖެ އޮތީ ހުރިހާ ފަންތިއެއްގައި ކޮރަޕްޝަނާ ދެކޮޅަށް މަސައްކަތްކުރަން ތައްޔާރަށްކަން ފާހަގަކުރައްވައި އިހުސާން ވިދާޅުވީ ކޮރަޕްޝަނާ ދެކޮޅަށް ކުރާ މަސައްކަތަކީ ދެމެހެއްޓެނެވި ތަރައްގީ ހާސިލުކުރުމަށާއި ރައްޔިތުންގެ ދުޅަހެޔޮކަން ޔަގީންކުރުމަށް މުހިއްމު މަސައްކަތެއްކަން ދިވެހި ސަރުކާރުން ގަބޫލުކުރާ ކަމަށެވެ.
އިތުރަށް އިހުސާން ވިދާޅުވީ ކޮރަޕްޝަނާ ދެކޮޅަށް ގައުމުތަކުން ކުރާ މަސައްކަތްތައް ކާމިޔާބުކުރެވޭނީ ހުރިހާ ގައުމުތަކެއްގެ މެދުގައި ރަނގަޅު ފެންވަރެއްގައި އެއްބާރުލުންދީގެން އެކުގައި މަސައްކަތްކުރެވޭނެ ގޮތްތަކެއް އިންތިޒާމު ކުރެވިގެން ކަމަށެވެ.
އޯއައިސީއަކީ އިސްލާމީ ގައުމުތަކަށް އެއްބައެއްގެ ގޮތުގއި މަސައްކަތްކޮށް، ވަސީލަތްތައް އެއްކޮށް ކޮރަޕްޝަނާ ދެކޮޅު މަސައްކަތުގެ ތަޖުރިބާތައް ހިއްސާކުރުމަށް ވަރަށް ފުރިހަމަ ޕްލެޓުފޯމެއް ކަމުގައި މިނިސްޓަރު ވިދާޅުވި އެވެ. ޕާޓްނާޝިޕުތައް ބިނާކޮށް، އޮނިގަނޑުތައް އެކުލަވައިލާ ގާބިލުކަން އިތުރުކުރުމުގެ މަސައްކަތްކޮށްގެން މުއައްސަސާތައް އިތުރަށް ހަރުދަނާކޮށް ކޮރަޕްޝަނުން ސަލާމަތްވުމަށް މަސައްކަތްކުރެވޭނެ ކަމުގައި އިހުސާން ފާހަގަކުރެއްވި އެވެ.
އަދި ކޮރަޕްޝަނާ ދެކޮޅަށް ކުރާ މަސައްކަތުގައި އައު އީޖާދުތަކާއި ޓެކްނޮލޮޖީގެ މުހިއްމުކަން ފާހަގަކުރައްވައި އިހުސާން ވިދާޅުވީ ޑިޖިޓަލް ޓްރާންސްޕޭރެންސީ މެކޭނިޒަަމްތަކާއި އީގަވަނެންސް މަންސަތަކާއި ޖަވާބުދާރީކުރުމުގެ އާންމު ނިޒާމުތަކަކީ ކޮރަޕްޝަނަށް އޮންނަ ފުރުސަތުތައް މަދުކުރަން މުހިއްމު ވަސީލަތްތަކެއް ކަމަށެވެ.
އިތުރަށް އޭނާ ވިދާޅުވީ ކޮރަޕްޝަނާ ދެކޮޅު މަސައްކަތުގައި ޒުވާނުންގެ ދައުރުވެސް މުހިއްމު ކަމަށެވެ. ޒުވާނުންގެ ހިތްތަކުގައި ނަޒާހަތްތެރިކަމާއި އަދުލުވެރިކަން އަށަހގެންނެވުމަކީ ވިލުންތެރި އަހުލާގީ ގޮތުން ހެޔޮ ވެރިކަމެއް ކުރުމަށް ތައްޔާރު މުޖުތަމައުތަކެއް އުފެއްދުމަށް ކުރެވޭނެ މުހިއްމު ކަމެއް ކަމުގައި މިނިސްޓަރު ވިދާޅުވި އެވެ.
ކޮމެންޓް
Republic of Maldives