ފިސްކަލް ޒިންމާގެ ބިލާއެކު މުހިންމު ބިލުތަކެއް ފާސްކޮށްފި

ފިސްކަލް ޒިންމާގެ ބިލާއެކު މިއަދު ރައްޔިތުންގެ މަޖިލީހުން މުހިންމު ހަތަރު ބިލެއް ފާސްކޮށްފި އެވެ.

މަޖިލީހުން މިއަދު ފާސްކޮށްފައިވާ އިތުރު ބިލުތަކަކީ އާބަން ޑިވެލޮޕްމެންޓް ބިލާއި ދައުލަތުގެ ދަރަންޏާ ބެހޭ ބިލުގެ އިތުރުން ކުޅިވަރުގެ ގާނޫނަށް އިސްލާހު ހުށަހަޅާފައިވާ ބިލެވެ.

ފިސްކަލް ޒިންމާގެ ބިލުގައިވާ ގޮތުން، އެ ބިލު ހުށަހެޅީ ދައުލަތުގެ ފިސްކަލް ކަންކަން ހިންގަނީ ފިސްކަލް ޑިސިޕްލިން ހާސިލު ކުރެވޭނެ ގޮތަށް، ދެފުށް ފެންނަ ޒިންމާދާރު ގޮތެއްގައިކަން ކަމަށަވަރު ކުރުމަށް ކަމަށެވެ. 

ތުލުސްދޫ ދާއިރާގެ މެންބަރު އިބްރާހިމް ނަސީމް ހުށަހަޅުއްވާފައިވާ އެ ބިލު މަޖިލީހުން ފާސްކޮށްފައި ވަނީ 81 މެންބަރުންގެ ވޯޓުންނެވެ.

ދަރަންޏާ ބެހޭ ބިލަކީ ދައުލަތުން ދަރަނި ނަގައި ބަލަހައްޓަނީ ގައުމުގެ އިގްތިސޯދަށާއި މުސްތަގްބަލުގެ ޖީލުތަކަށް ކުރާނެ އަސަރު ވަޒަންކުރެވި ގައުމުގެ އިގްތިސޯދީ ފުދުންތެރިކަމާއި ދައުލަތުގެ މާލިއްޔަތުގެ ނިޒާމް ދިގު މުއްދަތަކަށް ދެމެހެއްޓޭނެ ގޮތެއްގެ މަތިންކަން ކަށަވަރުކުރުމަށްޓަކައި އަލަށް ތައާރަފްކުރާ ގާނޫނެކެވެ. މި ބިލު މަޖިލީހަށް ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު މަމްދޫހެވެ. މި ބިލު ވެސް ފާސްކޮށްފައި ވަނީ 81 މެންބަރުންގެ ވޯޓުންނެވެ.

ސަރުކާރުގެ ފަރާތުން ވިލިނގިލީ ދާއިރާގެ މެންބަރު އާޒިމް އަބްދުލްއަޒީޒު ހުށަހަޅުއްވާފައިވާ އާބަން ޑިވެލޮޕްމެންޓްގެ ބިލު މަޖިލީހުން މިއަދު ފާސްކޮށްފައި ވަނީ 70 މެންބަރުންގެ ވޯޓުންނެވެ. އެމްޑީޕީއަށް ނިސްބަތްވާ 11 މެންބަރުން ވަނީ މި ބިލާ ދެކޮޅަށް ވޯޓު ދެއްވާފަ އެވެ.

މި ބިލުގެ މަގުސަދެއް ކަމުގައި ބަޔާންކޮށްފައިވަނީ ރާއްޖޭގެ އާބަން ސަރަހައްދުތައް ކަނޑައެޅުމާއެކު، އެފަދަ ސަރަހައްދުތައް ގިންތިކުރާނެ ގޮތާއި، އެ ސަރަހައްދުތަކުގެ ބިންތއް ބޭނުންކުރާނެ ގޮތުގެ އުސޫލުތައް ބަޔާންކުރުން ކަމަށެވެ. އަދި އާބަން ޑިވެލޮޕްމެންޓު މަޝްރޫއުތައް އެއް މިންގަނޑެއްގެ ތެރެއިން ކުރިއަށްގެންދެވޭކަން ކަށަވަރުކޮށް އެފަދަ ސަރަހައްދުތައް ތަރައްގީކުރުމުގެ އަސާސީ މިގަނޑުތައް ބަޔާންކުރުން ކަމަށެވެ.

ކުޅިވަރުގެ ގާނޫނަށް ހުށަހެޅި އިސްލާހު ވެސް ފާސްކޮށްފައި ވަނީ 81 މެންބަރުންގެ ވޯޓުންނެވެ.