ހުޅުމާލޭގައި ހިނގި ނުރައްކާތެރި އެކްސިޑެންޓް: އިކްރާމް ކުށަށް އިއުތިރާފުވެއްޖެ
އެކްސިޑެންޓްގައި އަނިޔާވި މީހާ ފަރުވާއަށް ރާއްޖޭން ބޭރަށް ދިޔުމަށް ހަރަދުވި 4،000 ރުފިޔާ އާއި ބޭސްފަރުވާއަށް ކުރާ ހަރަދުތައް ތިން މީހުންގެ އަތުން ނަގައިދޭން ވެސް ދައުލަތުން ވަނީ އެދިފަ އެވެ.
ހުޅުމާލެ ދެ ވަނަ ފިޔަވަހީގައި ޖުލައި ފަހު ދުވަހު ހިނގި ނުރައްކާތެރި އެކްސިޑެންޓާއި ގުޅިގެން ދައުވާކޮށްފައިވާ މ. ލޭންޑްއޮފްގާޑްން، އިބްރާހިމް އިކްރާމް ކުށަށް އިއުތިރާފުވެއްޖެ އެވެ.
ހުޅުމާލެ ހިޔާ އަވަށް -- ވިނަރަސް ފްލެޓް ސަރަހައްދު ގައި މި އެކްސިޑެންޓް ހިނގީ ބާރު ސްޕީޑްގައި ދުއްވާފައި އައި ރޭސް ކާރެއް ކޮންޓްރޯލް ނުވެގެނެވެ. އެނބުރެމުން އެނބުރެމުން އައި ރަތްކުލައިގެ އެ ކާރުން ޖެހުނީ އެވަގުތު މަގުގެ އެއް ފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގަ އެވެ. އެކްސިޑެންޓަށްފަހު ކާރުގައި ތިބި މީހުން ފިލީ އެވެ.
މި މައްސަލައިގައި އިކުރާމުގެ އިތުރުން ދެން ދައުވާ ކޮށްފައި ވަނީ ހ. ނޫރަންމާގެއާގޭ އިކްރާމުއްރަހުމާނާއި ގއ. ކަނޑުހުޅުދޫ އާޒާދު، ޖިނާހު އިސްމާއީލަށެވެ.
ކްރިމިނަލް ކޯޓުގައި މިއަދު އޮތް އަޑުއެހުމުގައި ތިން މީހުންގެ މައްޗަށް އުފުލާފައިވާ ދައުވާތައް ދައުލަތުން ވަނީ އިއްވާފަ އެވެ. އެކްސިޑެންޓްގައި އަނިޔާވި މީހާ ފަރުވާއަށް ރާއްޖޭން ބޭރަށް ދިޔުމަށް ހަރަދުވި 4،000 ރުފިޔާ އާއި ބޭސްފަރުވާއަށް ކުރާ ހަރަދުތައް ތިން މީހުންގެ އަތުން ނަގައިދޭން ވެސް ދައުލަތުން ވަނީ އެދިފަ އެވެ.
ދައުވާތައް އިއްވުމުން އިކްރާމްގެ ވަކީލް އިބްރާހިމް ޒާހިދު އެދިވަޑައިގެންފައި ވަނީ ދައުލަތާއެކު އިއުތިރާފްގެ އެއްބަސްވުން ހަދަން މަޝްވަރާ ކުރަމުންދާތީ، ޖަވާބުދާރީވުން ފަސްކޮށްދިނުމަށެވެ.
ނަމަވެސް މިއަދު ޖަވާބުދާރީވުމަށް ގާޒީ އަލީ ނަދީމް އެންގެވުމުން، އޭނާ ވަނީ ދައުވާތަކަށް އިއުތިރާފުވެފަ އެވެ. ގާޒީ ވިދާޅުވެފައި ވަނީ އެއްބަސްވުން ހުށަހެޅުމުން އެޔަށް ރިއާޔަތް ކުރައްވާނެ ކަމަށެވެ. އަނެއް ދެ މީހުން އިންކާރު ކުރީ އެވެ.
ދައުވާއަށް އިންކާރު ކުރަމުން ޖިނާހު ބުނެފައި ވަނީ އެކްސިޑެންޓަށްފަހު އޭނާ ފިލާފައި ނުވާ ކަމަށާއި، ހާދިސާ ހިނގިތަނުގައި ތިބި ފުލުހުންނާ ވެސް އޭނާ ވާހަކަ ދެއްކި ކަމަށެވެ. އަދި އަނިޔާ ލިބުނު މީހާގެ ބޭސްފަރުވާގެ ހަރަދާއި މުދަލަށް ލިބުނު ގެއްލުމުގެ ބަދަލު ދޭނެ ކަމަށް އޭރުވެސް ބުނެފައިވާ ކަމަށެވެ. ނަމަވެސް މައްސަލަ ތަހުގީގުކޮށް ބަލަން ޖެހޭ ކަންކަން ބަލާނީ ފުލުހުން ކަމަށް ފުލުހުން އަންގާފައިވާ ކަމަށެވެ.
އިކުރާމުއްރަހުމާނު ބުނީ އޭނާ އަކީ ފަސިންޖަރެއްގެ ގޮތުގައި ކާރުގައި އިން މީހެއް ކަމަށެވެ. އަދި މައްސަލަ ރިޕޯޓު ނުކުރާ ކަމަށް ފުލުހުން ބުނި ނަމަވެސް، ހާދިސާ ހިނގި ތަނުގައި ތިބި ފުލުހުންނަށް އޭނާ އެންގި ކަމަށް ވެސް ބުންޏެވެ.
ތިން މީހުންގެ މައްޗަށް އުފުލާފައިވާ ދައުވާތައް
ކޮމެންޓް
Republic of Maldives