މަޓާޓޯއަށްވެސް ފެންނަނީ އިސްރާއީލު ވެރިންގެ ޕާސްޕޯޓު މަނާކުރަން
މަޓާޓޯގެ ރައީސް ގިޔާސް ވިދާޅުވީ އިސްރާއީލު ޕާސްޕޯޓު މަނާކުރުމުގެ ކުރިން ވަރަށް ފުޅާކޮށް ވިސްނައި ދިރާސާކުރަން ވާނެކަމަަށާއި، އެ ޖަމްއިއްޔާއިން ތާއީދުކުރަނީ އިސްރާއީލު ސަރުކާރާއި ވެރިންނަށް އަމާޒުކޮށްގެން ފިޔަވަޅު އެޅުމަށް ކަމަށެވެ.
އިސްރާއީލު ޕާސްޕޯޓު މަނާކުރުމުގެ މައްސަލާގައި އެންމެ ރަނގަޅު ގޮތެއްކަމަށް ފެންނަނީ އެ ގައުމުގެ ވެރިންނާއި ސަރުކާރަށް ޓާގެޓުކޮށްގެން ފިޔަވަޅުއެޅުންކަމަށް ދިވެހި ޓުއަރ އޮޕަރޭޓަރުންގެ ޖަމްއިއްޔާ މަޓާޓޯއިން ބުނެފި އެވެ.
މިއަދު އޮތް ރައްޔިތުންގެ ސަލާމަތީ ހިދުމަތްތަކާ ބެހޭ ކޮމިޓީގައި މެންބަރުންގެ ސުވާލުތަކަށް ޖަވާބުދެއްވަމުން މަޓާޓޯގެ ރައީސް އަބްދުﷲ ގިޔާސް ރިޔާޒް ވިދާޅުވީ އާންމުކޮށް ބޮޑެތި މައްސަލަތަކުގައި މަޓާޓޯއިން ދެކޭ ގޮތް ހާމަކުރަނީ ދިރާސާތައް ހެދުމަށްފަހު ހިސާބު ނަންބަރުންކަމަށްވީ ނަމަވެސް މި މައްސަލާގައި އެކަށީގެންވާ ދިރާސާއެއް ކުރަން ވަގުތެއް ނުލިބުނު ކަމަށެވެ. ނަމަވެސް ޖަމްއިއްޔާގެ މެންބަރުންނާއި އެހެނިހެން ޕާޓްނަރުންނާ މަޝްވަރާކުރައްވާފައިވާކަމަށް އޭނާ ވިދާޅުވި އެވެ.
ގިޔާސް އިތުރަށް ވިދާޅުވީ މި މައްސަލައަކީ ވަރަށް ހައްސާސް އަދި އެހާމެ ބޮޑު މައްސަލައެއް ކަމަށެވެ. އުސޫލެއްގެ ގޮތުން އިސްރާއީލު ޕާސްޕޯޓު މަނާކުރުމަށް ތާއީދުކުރައްވާކަން ހާމަކުރައްވަމުން ގިޔާސް ވިދާޅުވީ އިއްޔެ ގެސްޓް ހައުސް އެސޯސިއޭޝަނުން ދެއްކި ވާހަކަތަކާއި މަޓާޓޯގެ ޕާޓްނަރުންގެ ވާހަކަތަކަށް ބަލާއިރު ވަކި ބަޔަކަށް ޓާގެޓުކޮށްގެން ޕާސްޕޯޓު މަނާކުރުމަކީ އެންމެ ރަނގަޅު ގޮތްކަމަށް ދެކެވަޑައިގަންނަވާ ކަމަށެވެ.
ގިޔާސް އިތުރަށް ވިދާޅުވީ އިސްރާއީލުންވެސް ރާއްޖެއަށް ދަތުރުނުކުރަން އެ ގައުމުގެ ދަތުރުވެރިންނަށް އަންގާފަައިވާތީއާއި ދިވެހިންވެސް ފަލަސްތީނު މައްސަލާގައި ވަރަށް ޖޯޝުުގައި ނުކުމެ ތިބުމާއެކު ކުރިއަށް ދެ އަހަރެއްހައި ދުވަސް ތެރޭގައިވެސް އިސްރާއީލު ޓޫރިސްޓުން ގިނަ އަދަދަކަށް ރާއްޖެއަށް އަންނާނެ ކަމުގައި ގަބޫލުނުކުރެއްވޭ ކަމަށެވެ.
"އިން ޕްރިންސިޕަލް އަޅުގަނޑުމެން ތާއީދުކުރަން ބޭންއަކަށް. އެކަމަކު އަޅުގަނޑުމެންނަށް އެބަފެނޭ ގެސްޓްހައުސް އެސޯސިއޭޝަނުން އިއްޔެ ދެއްކި ވާހަކަތަކަށް އަދި އަޅުގަނޑުމެންގެ މެންބަރުންގެ ވާހަކަތަކަށް ބަލާފައި ޓާގެޓް އެޕްރޯޗަކަށް ދިއުމޭ އެންމެ ރަނގަޅީ،" ގިޔާސް ވިދާޅުވި އެވެ.
"އިސްރާއީލުން އެބަ ބުނޭ ދިވެހިރާއްޖެ ބޮއިކޮޓްކޮށްފައޭ. އަޅުގަނޑުމެން ދިވެހިންވެސް ފެންނަނީ މިކަމުގަ ވަރަށް ހޮސްޓައިލްކޮށް. އެހެންވީމާ ހީނުވޭ ކުރިއަށް އޮތް ދެ އަހަރުވެސް އިސްރާއީލު ޓޫރިސްޓުން ރާއްޖެއަށް އަންނަން މަސައްކަތްވެސް ކޮށްފާނޭ. އެއީ ވަރަށް ކުޑަ މާކެޓެއް،"
އިސްރާއީލު ޕާސްޕޯޓު މަނާކުރުމުގައި އޮތް ގޮންޖެހުމަކީ ޑުއަލް ޕާސްޕޯޓު ނުވަތަ އިސްރާއީލު ޕާސްޕޯޓާއެކު އެހެން ގައުމެއްގެ ޕާސްޕޯޓު ގެންގުޅޭ މީހުން ގިނަވުންކަން ފާހަގަކުރައްވައި މިސާލެއްގެ ގޮތުން ގިޔާސު ވިދާޅުވެެދެއްވީ ރަޝިޔާއަށް ދަތިކުރުމުގެ ފިޔަވައެޅި ވަގުތު ވަރަށް ގިނަ ރަޝިޔާ މީހުން ދަތުރުކުރަން އިސްރާއީލު ޕާސްޕޯޓު ގެންގުޅުމެވެ.
އަދި ފަލަސްތީނުގެ ވަރަށް ގިނަ ރައްޔިތުންވެސް އިސްރާއީލު ޕާސްޕޯޓު ގެންގުޅޭކަންވެސް އޭނާ ފާހަގަކުރެއްވި އެވެ. އިތުރަށް އެމެރިކާއަކީ އިސްރާއީލަށް ބާރުދޭ ގައުމުކަން ފާހަގަކުރައްވަމުން އެމެރިކާއިން އަޅައިފާނެ ފިޔަވަޅެއްގެ ސަބަބުން ޑޮލަރު ރެމިޓެންސްގައި ދިމާވެދާނެ ދަތިތައްވެސް ފާހަގަކުރެއްވި އެވެ. އެގޮތުން ސްވިފްޓު ރާއްޖެއަށް ކަނޑާލައިފިނަމަ ކުރިމަތިވެދާނެ ގޮންޖެހުންތައް ބޮޑުވާނެކަން ގިޔާސް ފާހަގަކުރައްވާފައިވެ އެވެ.
"އެމެރިކާއާއި އެމެރިކާގެ ހުރިހާ އެލައިސްތައް [އިސްރާއީލުގެ ފަހުތަގައި ތިބީ] އަޅުގަނޑުމެން ޑޮލާ ރިމެޓިންސްގައި ބަރޯސާވަނީ ޔޫއެސްޑީ އިންފްލޯސްއަށް. އެހެންވީމާ މާދަމާވެސް އެމެރިކާއިން ސްވިޓް ކަނޑައިލިޔަސް ވަރަށް ބޮޑު ޗެލެންޖަކަށް ދެއްތޯވާނީ؟،" ގިޔާސް ވިދާޅުވި އެވެ.
ގިޔާސް ވިދާޅުވީ މަޓާޓޯއިން އެ ޖަމްއިއްޔާގެ ފެންވަރުގައި ފަލަސްތީނަށް އެހީތެރިވުމަށް މަސައްކަތްކުރިކަމަށެވެ. ނަމަވެސް ފިޔަވަޅުއެޅުމުގެ ކުރިން ފުންކޮށް ވިސްނައި ދިރާސާކުރަންޖެހޭނެ ކަމުގައި އޭނާ ވިދާޅުވި އެވެ.
ކޮމެންޓް
Republic of Maldives