ސަލީމު ބޭނުންފުޅުވެގެން ހޯރަފުށީގައި ހެދި ބީޗު ދަނީ ގިރަމުން، އޮތީ އަލުން ތޮށި ލާންޖެހިފަ

ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެންބަރު އަހްމަދު ސަލީމު ބޭނުންފުޅުވެގެން ހއ.ހޯރަފުށީގައި ތަރައްގީކުރި ބީޗު ސަރަހައްދު ގިރަމުންދާތީ އަލުން ހިލަ ތޮށި ލާންޖެހިއްޖެ އެވެ. 

ރައްޔިތުންގެ މަަޖިލީހުގެ މިއަދުގެ ޖަލްސާގައި ހޯރަފުށީ ދާއިރާގެ މިހާރުގެ މެންބަރު އަލީ މޫސާވަނީ އެ ރަށުގެ ގިރާ ސަރަހައްދާ ގުޅޭ ގޮތުން ކޮންސްޓްރަކްޝަން މިނިސްތަރު ޑރ.އަބްދުﷲ މުއްތަލިބާ ސުވާލުކުރައްވާފަ އެވެ. ޖަވާބުގައި އެ މަޝްރޫއު ހިނގި ގޮތުގެ ބައެއް ތަފުސީލު މިނިސްޓަރު ހާމަކުރެއްވި އެވެ. 

އެގޮތުން މިނިސްޓަރު ފާހަގަކުރެއްވި ގޮތުގައި ހޯރަފުށީގެ ގިރާ ސަރަހައްދަކީ ކުރިން ހިލަ ތޮށިލައި ހިމާޔަތްކޮށްފައި އޮތް ސަރަހައްދެކެވެ. ނަމަވެސް އެ ތަނުގައި ބީޗެއް ހައްދަވަން އެއިރުގެ މެންބަރު ސަލީމު ބޭނުންފުޅުވުމުން ތޮށި ނެގީ އެވެ. 

އެ ސަރަހައްދުގެ ހިލަ ތޮށި ނެގުމަށްފަހު، އެތަނުގައި ވެލި އަޅައިގެން ބީޗެއް ހަދައި، އެ ތަނުގައި ރުއްގަސް ޖެހުމަށްފަހު، ފަޅު ތެރޭގައި ތިން ރަށް ހިއްކާފައިވާކަން ފާހަގަކުރައްވަމުން މިނިސްޓަރު ވިދާޅުވީ އެ މަސައްކަތްތައް ކޮށްފައިވަނީ ގިރައިގެންނުދާނެ ގޮތަކަށް ނޫން ކަމަށެވެ. 

އަދި ނަތީޖާއެއްގެ ގޮތުން މިހާރު އެ ސަރަހައްދު އަދި އަލަށް ހެދި ތިން ރަށްވެސް އަންނަނީ ގިރަމުންކަން ފާހަގަކުރައްވައި މުއްތަލިބު ވިދާޅުވީ އެ ސަރަހައްދު ކުރިން އޮތް ގޮތަށް އިއާދަކުރަން މިހާރު ބޮޑެތި ހަރަދުތަކެއް ކުރަންޖެހިފައިވާ ކަމަށެވެ.

"އެ ވިދާޅުވާ ސަރައްހަދަކީ ކުރިން ހިލަ ތޮއްޓެއްލައި ހިމާޔަތްކޮށްފަައި އޮތް ސަރަހައްދެއް. ނަމަވެސް ނިމިދިޔަ ދައުރުގެ އިއްޒަތްތެރި މެންބަރު ބޭނުންފުޅުވެގެން އެތަނުގައި ބީޗެއް ހަދަންވެގެން، އެ ހިލަ ތޮށި ނެގީ، އަދި އެތަނަށް ވެލިއެޅީ އަދި ރުއްތަކެއްޖެހީ. އަދި އެތާ ބޭރުގައި ތިން ރަށެއްވެސް ހެދީ،" މުއްތަލިބު ވިދާޅުވި އެވެ. 

"ގިރައިން ނުދާ ގޮތަކަށް ނޫން އެކަން ކުރީ. ތިން ރަށް ހިއްކީމާވެސް ގިރައިގެންދަނީ. ރުއްތައްވެސް ވެއްޓެނީ. އަނބުރާ ކުރިން އޮތް ގޮތަށް ގެންދަން ބޮޑު ހަރަދެއް ކުރަންޖެހޭ،" 

އެ ސަރަހައްދު ގިރުމުގެ މައްސަލައަށް ދާއިމީ ހައްލެއް ގެނެވިފައިނެތީ މިވަގުތު ބަޖެޓުގައި އެކަމަށް ޖާގަ ނެތުމާއި، އެއީ ރައްޔިތުންގެ މުދަލަށް އެކަމުން ގެއްލުން ލިބޭ ހިސާބުގައި އޮތް މައްސަލައަކަށްނުވާތީ އެމަޖެންސީގައި އެކަން ނުހިންގޭނެތީ ކަމުގައިކަން މިނިސްޓަރު ފާހަގަކުރެއްވި އެވެ.