ޝަމީމަށް ހަމަލާ ދިނުން: މައްސަލަ ކުރިޔަށް ގެންދެވޭނެ ކަމަށް ނިންމައިފި

ކުރީގެ ޕްރޮސެކިއުޓަރު ޖެނެރަލް ހުސައިން ޝަމީމަށް ހަމަލާ ދިން މައްސަލައިގައި ދައުވާ ކޮށްފައިވާ މީހުންގެ ޝަރީއަތް މަދަނީ މިންގަނޑުން ކުރިއަށް ގެންދެވޭނެ ކަމަށް ކްރިމިނަލް ކޯޓުން ކަނޑައަޅައިފި އެވެ.

މި މައްސަލައިގައި ދައުވާ ކޮށްފައި ވަނީ ހަތް މީހެއްގެ މައްޗަށެވެ. އެއީ، ރ. އަލިފުށި، ރިވެލި، މިދުހަތު އާދަމާއި ލ. ގަން، ތުނޑި، ޖަވާހިރުވިލާ، މުހައްމަދު ޖަޒްލާނާއި ދަފްތަރު ނަންބަރު ދރ 2247، އަހުމަދު މައިސާން ހާޝިމާއި ލ. މާމެންދޫ، މުރިނގު، ރަޖުވާން ލަތީފާއި ތ. ގާދިއްފުށި، މުސްތަރީގެ، ޝަމާލް ހުސައިންގެ އިތުރުން ތ. ދިޔަމިގިލި، ރުވާ، އަބާން އަބްދުލްހަންނާނާއި އދ. މާމިގިލި، ކެމީހިޔާ، ޒަޔާން ނަސީރުގެ މައްޗަށެވެ.

މި ހަތް މީހުންގެ މައްޗަށް ވެސް އުފުލާފައި ވަނީ ތޫނު ހަރިޔާރެއް ބޭނުން ކޮށްގެން ގަސްދުގައި މީހަކު މަރާލަން އުޅުމުގެ ކުށުގެ ދައުވާ އެވެ.

ކުރިން ބޭއްވި މި މައްސަލައިގެ އަޑުއެހެކުމުގައި ހަތް މީހުން ވެސް ވަނީ ދައުވާއަށް އިންކާރުކޮށްފަ އެވެ. އެހެންވެ އެދުވަހު ހަތް މީހުންނަށް ވެސް ވަނީ ދިފާއީ ހެކި ހުށަހަޅަން ފުރުސަތު ދީފަ އެވެ. ދީފައިވާ މުއްދަތަށްވުރެ ލަހުން ދިފާއީ ހެކި ހުށަހެޅި ނަމަވެސް، ގާޒީ އިބްރާހިމް އިހްސާން ވަނީ ހެކިތައް ބަލައިގަންނަން ނިންމާފަ އެވެ. ދިފާއީ ހެކިތައް ބަލައިގަތުމުގެ ކުރިން ގާޒީ ވަނީ މުއްދަތުގެ ތެރޭގައި ހެކި ހުށަހަޅާފައި ނުވާތީ އެކަމުގެ ކަންބޮޑުވުން ވެސް ފާޅުކުރައްވާފަ އެވެ.

މި އަޑުއެހުމުގައި ދިފާއުން ވެސް އަދި ދައުލަތުން ވެސް ބުނެފައި ވަނީ ޝަރީއަތުގެ ކުރިން ހުށަހަޅާ ހުށަހެޅުން ހުށަހަޅަން ބޭނުންވާ ކާމަށެވެ. އެހެންކަމުން އެކަމަށް 15 ދުވަހުގެ މުއްދަތެއް ގާޒީ ވަނީ ދެއްވާފަ އެވެ. 

މި މައްސަލައިގައި ދެން އަޑުއެހުމެއް ބާއްވާނީ ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހެޅުމުން ކަމަށް ވެސް ގާޒީ ވަނީ ވިދާޅުވެފަ އެވެ.

ދައުލަތުން ބުނީ ޝަމީމްގެ ބޮލަށް ހަމަލާދޭން މަސައްކަތް ކޮށްފައި ވަނީ މި ހަތް މީހުންގެ ތެރެއިން މިދުހަތު ކަމަށެވެ. އަދި، ސައިކަލުގައި މިދުހަތު ގޮވައިގެން އެތަނަށް ދިޔައީ ޖަޒްލާން ކަމަށާއި، ހަމަލާއަށްފަހު އޭނާ ގޮވައިގެން އެތަނުން ދިޔައީ ވެސް ޖަޒުލާން ކަމަށެވެ. ހަމަލާ ދޭން ބޭނުން ކުރި ސައިކަލު ހޯދައިދިނީ ދައުވާކޮށްފައިވާ މައިސާން ކަމަށް ވެސް ދައުލަތުން ބުންޏެވެ.

މި މައްސަލައިގައި ދައުވާ ކޮށްފައި އަނެއް ހަތަރު މީހުންނަކީ ހަމަލާ ދިން ވަގުތު އެ ސަރަހައްދުގައި ކާރެއްގައި މަޑުކޮށްގެން ތިބި މީހުންނެވެ. ހަމަލާއަށްފަހު ސައިކަލުގައި ތިބި ދެ މީހުންނާއެކު ހަތަރު މީހުން ކާރުގައި އެ ސަރަހައްދު ދޫކޮށް ގޮސްފައިވާ ކަމަށް ދައުލަތުން ބުންޏެވެ.

ދައުލަތުން ބުނެފައި ވަނީ މިއީ މާލޭގައި ކުށް ކުރާ ގުރޫޕަކުން ދުރާލާ ރާވައިގެން "ކޮމަން އިންޓެންޝަން" އެއްގައި ދީފައިވާ ހަމަލާއެއް ކަމަށެވެ. އެކަން ސާބިތު ކުރަން ދައުލަތުން ވަނީ ހެކި ހުށަހަޅާފަ އެވެ. ނަމަވެސް ދައުލަތުން ބުނެފައި ވަނީ ހާދިސާ ހިނގި މަންޒަރު ދުށް މީހަކު ނެތް ކަމަށެވެ.