ފްލެޓް ދޭނީ ހައްގުވެރީންނަށް، މަޖިލީސް މެންބަރުންނަށް ނުފޫޒެއް ނުފޯރުވޭނެ: ހައުސިން މިނިސްޓްރީ

ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން 4000 ފްލެޓް ލިބޭ މީހުންގެ ވަގުތީ ލިސްޓް ތައްޔާރު ކުރަމުންދާއިރު އެ ލިސްޓްގައި ވަކި ބަޔަކު ހިމެނުމަށް ޕީއެންސީގެ މަޖިލީސް މެންބަރުން ނުފޫޒު ފޯރުވާ ކަމަށް ބުނާ ވާހަކަތައް ހައުސިން މިނިސްޓްރީން ދޮގު ކޮށްފި އެވެ. 

ގެދޮރުވެރިޔާ ސްކީމަށް ހުށަހެޅި ހުރިހާ ފޯމެއް ރިއިވެލުއޭޓު ކުރުމުގެ މަސައްކަތް ކުރަމުންދާ ކަމަށް މިނިސްޓްރީން ބުނާތާ އެތައް ދުވަހެއް ވެއްޖެ އެވެ. އޭގެ ކުރީން ފުލެޓުގެ ހައްގުވެރިންގެ ލިސްޓު ދިރާސާކުރަން އެކުލަވައިލި "ހައުސިން އެޑްވައިޒަރީ ކޮމިޓީ" އާއި މާލެ ސިޓީ ކައުންސިލުން އެކުލަވާލި "ހައުސިން ކޮންސަލްޓެޓިވް ކޮމިޓީ" އަށްވެސް ކުރީ ސަރުކާރުން އެކުލަވައިލި ލިސްޓަކީ ރަނގަޅަށް އެކުލަވައިލި ލިސްޓެއް ކަމުގައި ގަބޫލުނުކުރެވޭ ކަމަށް އޮތީ ބުނެފަ އެވެ.

ލިސްޓް އާންމު ކުރާނެ ކަމަށް ބުނެ ކުރީން އެތަައް ތާރީހެއް ދިނުމަށް ފަހު މި ފަހުން ހައުސިން މިނިސްޓަރު ޑރ. އަލީ ހައިދަރު ވަނީ އިތުރު ދެ ތާރީހެއް ދެއްވާފަ އެވެ. ފަހުން ދިން ތާރީހު ހަމަވާން ވަގުތުކޮޅަކަށް ވެފައިވަނިކޮށް  މިނިސްޓްރީން ބަޔާނެއް ނެރެ ބުނީ ފްލެޓަށް ހުށައަޅާފައިވާ 20،000 ވުރެ ގިނަ ފޯމް ބެލުމުގައި ކަށަވަރު ކުރަން ޖެހޭ ގިނަ ކަންތައްތަކެއް ހުރުމުން އިތުރު ވަގުތު ބޭނުންވާ ކަމަށެވެ. އަދި މިނިސްޓްރީން ކުރަމުންދާ މަސައްކަތްތަކުގެ ތަފްސީލް ފަހުން ހާމަ ކުރާނެ ކަމަށެވެ.

އެހެން ކަމުން މިހާރު އެ ލިސްޓް އާންމު ކުރުން އޮތީ ތާރީހެއް ނެތް ގޮތަށް ފަސްކޮށްފަ އެވެ.

ލިސްޓް އާންމު ކުރުން ފަސްކުރަމުންދާތީ ތަފާތު އެކި ވާހަކަތައް ދަނީ ފެތުރެމުންނެވެ. ލިސްޓްގައި ވަކި ބަޔަކު ހިމެނުމަށް ޕީއެންސީގެ މަޖިލީސް މެންބަރުން ނުފޫޒު ފޯރުވާ ކަމަށް ބުނާ ވާހަކަތަކެއްވެސް ފެތުރުނެވެ.

އެކަމާއި ގުޅިގެން ހައުސިން މިނިސްޓްރީން މިރޭ ބަޔާނެއް ނެރެ ބުނީ ރީ-އިވެލިއުކޭޝަނުގެ މަސައްކަތަށް އެއްވެސް ފަރާތަކުން ނުފޫޒު ފޯރުރުވޭނެ ކަމުގެ ޔަގީންކަން ދޭ ކަމަށެވެ. އަދި މިނިސްޓްރީގެ މަގުސަދަކީ މި ސްކީމްގެ ދަށުން ފްލެޓް ލިބިގެންދާނީ އެންމެ ހައްގުވެރި މީހުންނަށް ކަމަށް ކަނޑައެޅިގެން ދިއުން ކަމަށެވެ.

ރައީސް ސޯލިހްގެ ވެރިކަމުގައި ފެށި މަޝްރޫއުން ފްލެޓް ލިބޭ މީހުން ކުރީން ކަނޑައެޅި ނަމަވެސް ލިސްޓަށް ބަދަލު ގެންނަން ނިންމީ އޭސީސީން މައްސަލަ ތަހުގީގުކޮށް ލިސްޓް ގޯސް ކަމަށް ބުނުމުންނެވެ. ސިޔާސީ ނުފޫޒުގައި އޮތް ކަމަށް ގިނަ ބަޔަކު ދެކޭ އޭސީސީގެ އެ ތަހުގީގާމެދު ގިނަ ބަޔަކު ސުވާލު އުފައްދަ އެވެ.

ފްލެޓް ލިސްޓް ބަދަލުކޮށް ގަނޑުބަނޑު ކުރަން މަސައްކަތް ކުރާ ކަމުގެ ތުހުމަތު ބޮޑެވެ. ނަމަވެސް ރައީސް މުއިއްޒު ވަނީ ލިސްޓާ އެގޮތަށް ކުޅެން ފުރުސަތު ނުދެއްވާނެ ކަމުގެ ޔަގީންކަން ދެއްވާފަ އެވެ.

ހައްގުވެރީންނަށް ފްލެޓް ދިނުމަށް މަސައްކަތް ކުރަމުންދާ ކަމަށް މިނިސްޓްރީން ބުނި ނަމަވެސް ފްލެޓްގެ މައްސަލާގައި ހައުސިން މިނިސްޓަރު ޑރ. ހައިދަރު އެކި ފަހަރު އެކި ގޮތަށް ދައްކަވާ ވާހަކަތަކުގެ ސަބަބުން އާންމުންގެ މެދުގައި ބޮޑު ނުތަނަވަސް ކަމެއް އެބަ އޮތެވެ. އަދި ސަރުކާރުން ރަނގަޅަށް އެ މަސައްކަތް ކުރިއަށް ގެންދާނެ ކަމަށް އޮތް އިތުބާރު ގެއްލުމުގައި މިނިސްޓަރު ދައްކަވާފައިވާ ވާހަކަތަކުގެ ދައުރު ބޮޑެވެ.

ނޫސްވެެރީންގެ ބައްދަލްވުންތަކުގައި ސީދާ ޖަވާބެއް ދެއްވުމުގެ ބަދަލުގައި ތަފާތު މާނަތައް ނެގޭގޮތަށް ސާފު ނޫން ޖަވާބުތައް ދެއްވުމާއި ފްލެޓް ލިސްޓް އާންމު ކުރާނެ ކަމަށް ވިދާޅުވެ ދިރާސާއެއް ނެތި އެކި ތާރީހުތައް ވިދާޅުވުން ފަދަ ކަންކަމާއި ގުޅިގެން އާންމުންގެ މެދުގައި ބޮޑު ކަންބޮޑުވުމެއް އެބަ އޮތެވެ.