ދެ ކޮމިޝަންގެ ވެރީން އައްޔަނު ކުރުމުގެ ބާރު ލިބޭ ބިލު ތަސްދީގު ކުރައްވައިފި
ދެ ކޮމިޝަނުގެ މެންބަރުންގެ ތެރެއިން ކޮމިޝަނުގެ ރައީސަކާއި ނައިބު ރައީސެއް އައްޔަނު ކުރައްވާނީ ސީދާ ރައީސުލްޖުމްހޫރިއްޔާ އެވެ.
އިލެކްޝަންސް ކޮމިޝަންގެ ގާނޫނާއި އެންޓި-ކޮރަޕްޝަން ކޮމިޝަނުގެ ގާނޫނަށް އިސްލާހު ގެނައުމުގެ ބިލު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.
މި އިސްލާހުގެ ދަށުން މި ދެ ކޮމިޝަނުގެ ރައީސާއި ނައިބުރައީސް އައްޔަންކުރާ އުސޫލަށް ވަނީ ބަދަލު ގެނެސްފަ އެވެ. މިއަދު ތަސްދީގު ކުރި ބިލާ އެކު ދެ ކޮމިޝަނުގެ މެންބަރުންގެ ތެރެއިން ކޮމިޝަނުގެ ރައީސަކާއި ނައިބު ރައީސެއް އައްޔަނު ކުރައްވާނީ ސީދާ ރައީސުލްޖުމްހޫރިއްޔާ އެވެ.
ކޮމިޝަނުގެ ރައީސަކު ނުވަތަ ނައިބު ރައީސަކު އައްޔަނު ކުރާނީ ކޮމިޝަނަށް އައްޔަންކުރެވޭ މެންބަރުންގެ ތެރެއިން މީހެއްގެ ނަން ނުވަތަ މީހުންގެ ނަން، ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހެޅުއްވުމުން، ރައްޔިތުންގެ މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވި މެންބަރުންގެ އަގުލަބިއްޔަތުން ފާސްކުރާ މީހަކު ނުވަތަ މީހުންނެވެ.
އެހެން ނަމަވެސް މި ގާނޫނަށް އަމަލުކުރަން ފެށުމުގެ ކުރިން ކޮމިޝަނުގެ ރައީސާއި ނައިބުރައީސްގެ މަގާމަށް އައްޔަންކޮށްފައިވާ މެންބަރުން، ގާނޫނުގައިވާ ގޮތުގެމަތިން މަގާމުން ވަކިވަންދެން އެ މަގާމުގައި ދެމިތިބޭނެ އެވެ.
ކޮމިޝަނުގެ ރައީސް ނުވަތަ ނައިބުރައީސް އިސްތިއުފާ ދިނުމުގެ އިޖުރާއަތްތަކަށް ވެސް ވަނީ ބަދަލު ގެނެސްފައެވެ. އެގޮތުން، ކޮމިޝަނުގެ ރައީސް އަދި ކޮމިޝަނުގެ ނައިބުރައީސް މަގާމުން އިސްތިއުފާ ދޭން ބޭނުންވެއްޖެ ނަމަ، އިސްތިއުފާގެ ސިޓީ ހުށަހަޅަން ޖެހެނީ ރައީސުލްޖުމްހޫރިއްޔާ އަށެވެ.
ސަރުކާރު ހިންގާ މައި ޕާޓީގެ މެޖޯރިޓީ އޮތް މަޖިލީހުން ގެނައި މި ބަދަލާމެދު އިދިކޮޅު ޕާޓީތަކުން ވަރަށް ބޮޑަށް ނުރުހެ އެވެ. މިއީ މިނިވަން މުއައްސަސާތަކުގެ ބާރު ކަނޑުވާލާ ކޮމިޝަންތަކަށް ރައީސުލްޖުމްހޫރިއްޔާ ނުފޫޒު ފޯރުއްވުމަށް ގެންނެވި ބަދަލެއްގެ ގޮތުގައި އެ ޕާޓީތަކުން ދެކެ އެވެ.
ކޮމެންޓް
Republic of Maldives