ހަނިމާދޫ އެއާޕޯޓް ހުޅުވުމުން ވީއައިއޭގެ ބައެއް ފްލައިޓްތައް އެތަނަށް
ހަނިމާދޫ މަޝްރޫއު ނިންމަން އޮތީ މި އަހަރު އޮގަސްޓުގަ އެވެ. މިތަން ތަރައްގީ ކުރަނީ ނެރޯ ބޮޑީ ބޯޓު ފަހަރަށްވުރެ ކުދި ބޯޓުތަކަށެވެ.
ހަނިމާދޫ އިންޓަނޭޝަނަލް އެއާޕޯޓް އަންނަ އަހަރު ހުޅުވުމުން ވީއައިއޭގެ ބައެއް ފްލައިޓްތައް އެތަނަށް ޖައްސަން ފަށާނެ ކަމަށް އެމްއޭސީއެލް އިން ބުނެފި އެވެ.
ރައްޔިތުން މަޖިލީހުގެ އެސްއޯއީ ކޮމެޓީގައި އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުޖުތަބާ ލަތީފު ވިދާޅުވީ އިންޑިއަން އެގްޒިމް ލޯނެއްގެ ދަށުން ތަރައްގީ ކުރާ ހަނިމާދޫ އިންޓަނޭޝަނަލް އެއާޕޯޓުގެ މަސައްކަތްތުގައި ވެސް އެ ކުންފުނިން ބައިވެރިވަމުންދާ ކަމަށާ މިއީ އެ ކުންފުނިންޏަށް އާމްދަނީ ލިބޭނެ އެއާޕޯޓަށްވާނެ އެވެ. މި އެއާޕޯޓް ހުޅުވުމާއެކު ވީއައިއޭ އަށް ޖައްސާ ނެރޯބޮޑީ ފްލައިޓްތައް އެތަނަށް ބަދަލު ވާނެ ކަމަށް އޭނާ ވިދާޅުވި އެވެ.
"ހަނިމާދޫ އެއާޕޯޓް ހުޅުވަން މިހާރު ޕްލޭން ކުރެވިފައި އޮތީ އަންނަ އަހަރުގެ ފުރަަތަމަ ކުއާޓަރުގައި. އެތަނަށް ކޮންޓްރެކްޓް ސައިޑުން ގަންނަން ޖެހޭ ހުރިހާ އެއްޗެއް ގަނެވެސް ވަނީ ނިންމިފަ. މި އެއާޕޯޓަކީ ވައިޑް ބޮޑީ މަތިންދާ ބޯޓް ޖެއްސޭ ތަނެއް ނޫން. ނަމަވެސް ނެރޯ ބޮޑީ އެއާކްރާފްޓް ޖެއްސޭ. އެހެންވެ މިހާރު ޕްލޭން އެބަހުރި ވީއައިއޭއަށް އަންނަ ނެރޯ ބޮޑީ އެއާ ކްރާފްޓްތައް އެތަނަށް ބަދަލު ކުރަން،" ކުރިން އެމްއޭސީއެލްގެ އިސް މަގާމު ތަކެއް ފުރުއްވި މުޖުތަބާ ވިދާޅުވި އެވެ.
އެމްއޭސީއެލްއިން ހަނިމާދޫގައި ސީޕްލޭން ޓާމިނަލް އަޅާނެ
ހަނިމާދޫ އެއާޕޯޓުގެ ކަންކަމުގައި އެމްއޭސީއެލް އިން މިހާރު މަސައްކަތް ކުރަނީ އެމްއޭސީއެލް އާއި ހަނިމާދޫ އެއާޕޯޓް ހިންގަން ކުރިން ހަވާލުކުރި ކުންފުނި އާރުއޭސީއެލް ކުންފުނި އެއްކޮށްލަން ސަރުކާރުން ނިންމުމާ ގުޅިގެންނެވެ.މި މަސައްކަތުގެ ރަސްމީ އެއްބަސްވުމުގައި އަންނަ ހަފުތާ ރަސްމީ އެއްބަސްވުމުގައި ސޮއިކުރާނެ ކަމަށް މަޖުތަބާ ވިދާޅުވި އެވެ.
އޭނާ ވިދާޅުވި ގޮތުގައި ހަނިމާދޫ އެއާޕޯޓް ހުޅުވެންވާއިރަށް އެތަނަށް އަންނަ ޓޫރިސްޓުން ރިސޯޓްތަކަށް އުފުލޭނެ ސީޕްލޭން ޓާމިނަލެއް ހެދުމުގެ މަސައްކަތް އެ ކުންފުނިން ކުރާނެ އެވެ.
"އަޅުގަނޑުމެން ބޭނުންވަނީ ހަނިމާދޫއަކީ ފައިދާވާ ތަނަކަށް ހަދަން. އެހެންވެ ވަރަށް އަވަހަށް ސީޕްލޭން ގާއިމް ކުރާނަން. ބޭނުންވަނީ 180 ކިލޯ މީޓަރުގެ ރޭޑިއެސްގައި ހުރި ރިސޯޓްތަކަށް މީހުން ގެންދޭ ގޮތް ހެދުން. އޭރުން ހަނިމާދޫ ފީޒިބަލްވާނެ. ހުޅުވަންވާއިރަށް ބޮޑު ސީޕްލޭން ޓާމިނަލް ނުހެދުނަސް ކުޑަ ޓާމިނަލް ހެދޭނެ،" މުޖުތަބާ ވިދާޅުވި އެވެ.
ހަނިމާދޫ އިންޓަނޭޝަނަލް އެއާޕޯޓް މަޝްރޫއަކީ އިންޑިއާގެ 800 މިލިއަން ޑޮލަރުގެ ކްރެޑިޓް ލައިންގެ ތެރޭން 136 މިލިއަން ޑޮލަރުގެ ލޯނެއް ނަގައިގެން ކުރިއަށް ގެންދާ މަޝްރޫއެކެވެ. މި މަޝްރޫއުގެ ދަށުން ތަރައްގީކުރި ރަންވޭ ވަނީ ބޭނުން ކުރަން ފަށާފަ އެވެ.
ހަނިމާދޫ މަޝްރޫއު ކުރުކޮށް
- މަޝްރޫއުގެ އަގު 136 މިލިއަން ޑޮލަރު
- މަސައްކަތް ފެށީ 22، އޮގަސްޓް 2022
- އެއާޕޯޓް ނިންމަން އޮތް ތާރީހު މި އަހަރު 21، އޮގަސްޓް
- އިންޑިއަން އެގްޒިމް ބޭންކުގެ ލޯނު މަޝްރޫއެއް
- އެންބޯ މަޑިއެއްހެން މަތިން ފެންނަ ފުރިހަމަ ހިބޮޑު ޕެސެންޖަރު ޓާމިނަލްއެއް
- އަހަރަކު 1.3 މިލިއަން ފަސިންޖަރުންނަށް ހިދުމަތްދެވޭނެ
- އޭ 320 އަދި ބޯއިން 737 ބޯޓު ޖެއްސޭނެ
- ޕެސެންޖަރުން އަރައިފައިބަން ބޯޑިން ބްރިޖެއް
- މުޅިންއާ ކޯޑު ސީ ސްޑޭންޑަޑުގެ ރަންވޭއެއް
- ރަންވޭގެ ދިގުމިން 2،465 މީޓަރު / ފުޅާމިން ، 45 މީޓަރު
- ބޯޓު ޕާކު ކުރާނެ ދެ އޭޕްރަން - ބޮޑު ދެ ބޯޓު / ކުޑަ ތިން ބޯޑު ޕާކު ކުރެވޭނެ
- ބޯޓު މަރާމާތު ކުރަން ހެނގަރެއް
- އަލިފާން ނިއްވުމުގެ ޒަމާނީ ހިދުމަތް
- މުޅި އެއާޕޯޓުގަ ހޮޅި އަޅާފަ 1.6 މެޓްރިކް ޓަނުގެ ފިއުލް ފާމެއް / ތެތޮ ރައްކާކުރާ
- އެއާޕޯޓުގެ ހުރހާ މަގެއް ފެންވަރު ރަނގަޅުކޮށް ހަދާނެ
ހަނިމާދޫ އެއާޕޯޓް މަޝްރޫއު - ތިލަދުން އެންބޯމަޑި އެއާޕޯޓް
ކޮމެންޓް
Republic of Maldives