ވިނަރެސް ޓަވަރުތަކުން ކާރު ޕާކިން ޖާގަތަަކަށް ހުޅުވާލައިފި، ކާރު ރަޖިސްޓްރީ ކުރެވޭނެ
އިމާރާތުގެ ތެރެއިން ކާރު ރަޖިސްޓްރީ ކުރުމުގެ ހުއްދަ އާއެކު ދޫކުރާ ޖާގައެއްގެ ބީލަން ފެށޭ އަގަކީ 650،000 ރުފިޔާ އެވެ. ޖާގަ ގަންނަ މީހަކަށް އެ ޖާގާގައި ކާރު ރަޖިސްޓްރީ ކުރުމުގެ ހުއްދަ ދޭނެ އެވެ.
ވިނަރެސް ޓަވަރުތަކުން ކާރު ޕާކު ކުރާނެ ޖާގަ ދޫކުރަން ނިންމާ އެ ޖާގަތަކަށް ކުރިމަަތިލާން ހުޅުވާލައިފި އެވެ.
އެޗްޑީސީން ބުނީ ވިނަރެސް އިން ފްލެޓް ގަނެފައިވާ މީހުންނަށް ކާރު ޕާކުރާނެ ޖާގަ ދޫކުރަން ނިންމާފައިވާ ކަމަށާ ދެ މޮޑެލްއަކަށް ޖާގަ ދޫކުރަން ހަމަޖެހިފައިވާ ކަމަށެވެ. އެގޮތުން އިމާރާތުގެ ތެރެއިން ކާރު ރަޖިސްޓްރީ ކުރުމުގެ ހުއްދަ އާއެކު ޖުމްލަ 76 ޖާގަ އަދި އިމާރާތުގެ ބޭރުން ހަމައެކަނި ޕާކުކުރުމަށް ޖުމްލަ 78 ޖާގަ ދޫކުރަން ވަނީ ނިންމާފަ އެވެ.
ޖާގަތަކަށް އެދެވޭނީ ވަކި ޝަރުތުތަކެއް ހަމަވާ މީހުންނަށެވެ. އެއީ؛
- ފްލެޓް ގަތުމުގެ އެއްބަސްވުމުގައި ސޮއިކޮށްފައިވާ މައި-އެޕްލިކަންޓް ކަމުގައިވުން
- ޑިސެންބަރު ފަހެއްގެ ނިޔަލަށް އެއްވެސް ފައިސާއެއް ދައްކަންޖެހި ނުދައްކާ އޮތް މީހަކު ކަމުގައި ނުވުން
ކޮންމެ މީހަކަށް ވެސް ދޫކުރަނީ އެއް ޖާގަ އެވެ. ދޫކުރާ ޖާގަ އަކީ ފްލެޓް ގަތުމުގެ އެއްބަސްވުމުގެ ދަށުން ދޫކުރާ ޖާގައެއް ކަމުގައި ހަމަޖައްސާނެ އެވެ.
އިމާރާތުގެ ތެރެއިން ކާރު ރަޖިސްޓްރީ ކުރުމުގެ ހުއްދަ އާއެކު ދޫކުރާ ޖާގައެއްގެ ބީލަން ފެށޭ އަގަކީ 650،000 ރުފިޔާ އެވެ. ޖާގަ ގަންނަ މީހަކަށް އެ ޖާގާގައި ކާރު ރަޖިސްޓްރީ ކުރުމުގެ ހުއްދަ ދޭނެ އެވެ. ބީލަން ކާމިޔާބު ކުރާ މީހުންނަށް ޖުމްލަ އަގު ދެއްކުމަށް މަސް ދުވަހުގެ މުއްދަތެއް ދޭނެ އެވެ.
އިމާރާތުގެ ބޭރުން ހަމައެކަނި ޕާކުކުރުމަށް ހާއްސަ ޖާގަތަކުގެ ފެށޭ އަގަކީ މަހަކަށް 2000 ރުފިޔާ އެވެ. ޖާގަ ދޫކުރާނީ ފަސް އަހަރުގެ މުއްދަތަކަށެވެ.
ޖާގަތަކަށް ހުށައެޅުމުގެ ފުރުސަތު ޑިސެންބަރު ފަސް ވަނަ ދުވަހުގެ ނިޔަލަށް އޮންްނާނެ ކަމަށް ވެސް އެޗްޑީސީން ބުންޏެވެ.
ކޮމެންޓް
Republic of Maldives