މޮނިއުމަންޓް ޑިޒައިން އަލުން މުރާޖައާ ކުރަނީ

ހުޅުމާލެ މޮނިއުމަންޓްތައް ޑިޒައިން ކުރުމަށް ބޭއްވި މުބާރާތުން އެންމެ ރަނގަޅު ކަމަށް ހޮވުނު މޮނިއުމަންޓް ޑިޒައިންތައް އަލުން ރިވިއު ކުރަން އެޗްޑީސީން ނިންމައިފި އެވެ.

އެޗްޑީސީން މިރޭ ނެރުނު ބަޔާނެއްގައި ބުނެފައި ވަނީ މުބާރާތުގެ ސުންގަޑި ހަމަވިއިރު ހުށައަޅާފައި ވަނީ ހަތް ޑިޒައިނެއް ކަމަށާ އެ ހުށައެޅުންތަކުގެ ތެރެއިން ވަނަ ހޮވާފައި ވަނީ އެކަމަށްޓަކައި ކަނޑައެޅިފައިވާ ޕްރޮޕެޝަނަލް ސްޓާފުންގެ ޕެނަލަކުން ހުށައެޅުންތައް ބެލުމަށް ފަހު ކަމަށެވެ.

ނަމަވެސް އެއްވަނައަށް ދިޔަ މޮނިއުމަންޓް ޑިޒައިންތަކަކީ އޭއައި ޖެނެރޭޓެޑް ޑިޒައިން ތަކެއް ކަމަށް ބުނެ އާންމުންގެ ބަޔަކު އެ ކޯޕަރޭޝަނަށް ޝަކުވާ ހުށައެޅުމާއި ގުޅިގެން އެ ޝަކުވާތައް އިތުރަށް ބަލައި ވަނަ ލިބުނު ޑިޒައިންތައް ރިވިއު ކުރުމުގެ މަސައްކަތް ފަށާފައިވާ ކަމަށް ވަނީ ބުނެފަ އެވެ.

މުބާރާތުގެ މަގުސަދަކީ ހުޅުމާލެ ތަރައްގީއަށް އެ ކޯޕަރޭޝަނުން ކުރަމުންދާ މަސައްކަތުގައި ދިވެހި ފަންނުވެރީންގެ ހިޔާލާއި ވިސްނުން ހިމެނުން ކަމަށްވާތީ މިފަދަ މުބާރާތްތަކުގައިު ދިވެހި ފަންނުވެރީންނަށް ފުރުސަތު ނުލިބޭ ގޮތަކަށް އަމަލު ނުކުރާނެ ކަމަށް ވެސް އެޗްޑީސީން ބުންޏެވެ.