"މިތިބީ ފަލަސްތީނާއެކު، އެކަމަކު ފުރަތަމަ ރާއްޖެ ސަލާމަތުން އޮންނަން ޖެހޭ"
ކާނަލް ނާޒިމް ވިދާޅުވީ މި އިޒްރާއިލް ޕާސްޕޯޓް މައްސަލައަކީ އަވަސް އަތުވާލައިގެން ނިންމަން ޖެހޭ މައްސަލައެއް ނޫނެވެ. އެކަމުގައި އެންމެންގެ ހިޔާލުވެސް ހޯދަން ޖެހެ އެވެ.
އިޒްރޭލް ޕާސްޕޯޓް މަނާ ކުރުން ފަދަ މުޅި ދުނިޔޭގެ މަސްރަހާ ގުޅުންހުރި ކަމެއް ދިވެހިން ނިންމާއިރު ފުރަތަމަ ރާއްޖެ ސަލާމަތުން އޮންނަން ޖެހޭ ކަމަށް ދިވެހި އަސްކަރިއްޔާގައި ހިދުމަތް ކުރެއްވި ކުރީގެ ޑިފެންސް މިނިސްޓަރު ރިޓަޔަޑް ކާނަލް މުހައްމަދު ނާޒިމް ވިދާޅުވެއްޖެ އެވެ.
އަސްކަރީ ދާއިރާ އިން ބޭރުން މަތީ ތައުލީމް ހާސިލް ކުރައްވާފައިވާ އަސްކަރީ ތަޖުރިބާކާރެއް ކަމަށްވާ މޯލްޑިވްސް ނޭޝަނަޕް ޕާޓީގެ ރައީސް އަދި ދަނގެތީ ދާއިރާގެ މެންބަރު ނާޒިމް ވަނީ މަޖިލީހުގެ 241 ކޮމެޓީގައި އިޒްރޭލް ޕާސްޕޯޓް މަނާ ކުރުމަށް ހުށަހަޅާފައިވާ މައްސަލާގައި ވަރަށް ސާފުކޮށް މިއަދު ވާހަކަ ދައްކަވާފަ އެވެ.
ނާޒިމް ވިދާޅުވީ އެއްވެސް ގައުމެއްގެ ބަަޔަކު ރާއްޖެ އަށް ނާދެވޭ ގޮތަށް މުޅި ގައުމަށް "ޕާސްޕޯޓް ބޭން" ކުރުމަކީ އޭނާ ގަބޫލު ކުރައްވާ ކަމެއް ނޫން ކަމަށާ ހާއްސަކޮށް ރާއްޖޭގެ އިގްތިސޯދު އޮތްގޮތުން އަވަސް އަރުވާލައިގެން މިކަން ނިންމުން ބުއްދިވެރިވެސް ނޫން ކަމަށެވެ.
"ކިތަންމެ ބާރަށް ވާހަކަ ދެއްކިޔަސް ރާއްޖޭގައި އޮތީ އެންމެ އިގްތިސޯދެއް. އެހެން އިގްތިސޯދެއް ނެތް. މަސްވެރިކަމަކީ އިގްތިސޯދެއްނޫން. އޮތީ ފަތުރުވެރިކަން، ފަތުރުވެރިކަމަށް އަސަރުކުރާނެ އެއްވެސް ކަމެއް ކުރާކަށް ނުވާނެ މިއަދަކު. އަޅުގަނޑުމެން ސަލާމަތުން ތިބެފަ އެހެންކަމެއް ކުރަންވާނީ. މިއީ އަވަސް އަރުވަލައިގެން ކުރަންވާނެ ކަމެއް ނޫން. ވަގުތު ދީގެން ކުރަންވާނީ މިކަން،" ނާޒިމް ވިދާޅުވި އެވެ.
ކޮމެންޓް
Republic of Maldives