ޓޫރިސްޓުންނަށް މޫދުގައި ދިމާވާ ހާދިސާތައް މަދުކުރަން ފިޔަވަޅުތަކެއް
ޓޫރިސްޓުން މޫދު ކުޅިވަރުގައި އުޅެނިކޮށް ހިނގާ ހާދިސާތަކުގައި ފުރާނަ ގެއްލުމުގެ ހާދިސާތައް ވަނީ އިތުރުވެފަ އެވެ.
ރާއްޖެ އަށް ޒިޔާރަތް ކުރާ ޓޫރިސްޓުންނަށް މޫދުގައި ދިމާވާ ހާދިސާތައް މަދު ކުރަން ފިޔަވަޅު ތަކެއް އަޅަން ނިންމައި ޓޫރިސްޓުންނަށް ހިދުމަތްދޭ ފަރާތްތަކަށް އެކަން އަންގައިފި އެވެ.
އެކްސްކާޝަން ނުވަތަ މޫދު ކުޅިވަރުތަކުގައި އުޅެނިކޮށް ކަނޑުމަތީގައި ދިމާވާ ހާދިސާތަކުގައި ޓޫރިސްޓުންގެ ފުރާނަ އަށް ގެއްލުންވާ ހާދިސާތައް އިތުރުވަމުންދާތީ ފިޔަވަޅުތަކެއް އަޅަން ނިންމައި ރާއްޖޭގެ ޓޫރިސްޓުންނަށް ހިދުމަތްދޭ ފަރާތްތަކަށް ޓޫރިޒަމް މިނިސްޓްރީން ވަނީ ސާކިއުލާއެއް މެދުވެރިކޮށް އެކަން އަންގާފަ އެވެ.
ޓޫރިސްޓުންނަށް ހިދުމަތްދޭ ތަންތަނަށް ފޮނުވާފައިވާ ސާކިއުލާއެއްގައި ވާ ގޮތުން ރާއްޖޭގައި ޗުއްޓީ ހޭދަކޮށްލަން އަންނަ ޓޫރިސްޓުންނަކީ މޫދުގެ ހަރަކާތްތަކުގައި ގިނަ އަދަދަކަށް ބައިވެރިވާ ބަޔަކަށްވާތީ މޫދު ކުޅިވަރުތަކުގައި އުޅެނިކޮށް ހިނގާ ހާދިސާތައް ހުއްޓުވަން އެކްސްކާޝަން ހިދުމަތްދޭ ފަރާތްތަކުގެ ޒިންމާތައް ބަޔާންކޮށް ގަވައިދެއް ހެދުމުގެ މަސައްކަތް އެ މިނިސްޓްރީން ވަނީ ފަށާފަ އެވެ.
އެ މިނިސްޓްރީން ވަނީ މި ގަވައިދު ހެދުމުގެ ކުރިންވެސް މޫދު ކުޅިވަރުގެ ހިދުމަތް ދޭ ފަރާތްތަކުން ޓޫރިސްޓުން ގޮވައިގެންދާއިރު ސަމާލުވާން އިލްތިމާސްކޮށްފަ އެވެ. ހާއްސަކޮށް ކުރިއަށް އޮތީ ޓޫރިޒަމްގެ މައި ސީޒަން ކަމަށްވާތީ ގިނަ އަދަދެއްގެ ޓޫރިސްޓުން އަންނާނެ ދުވަސްވަރަކަށްވުމާއެކު ހާއްސަކޮށް އިތުރަށް ސަމާލުކަން ދިނުމަށް އެ މިނިސްޓްރީން އިލްތިމާސްކޮށްފައިވެ އެވެ.
ޓޫރިޒަމް މިނިސްޓްރީން ވަނީ އެކްސްކާޝަން ހިދުމަތް ދިނުމުގައި އަމަލު ކުރަން ޖެހޭ މިންގަނޑުތަކެއް އެކުލަވާލައި ނެރެ އެވެ. އަދި މި މިންގަނޑުތަކަށް މިމަހުގެ 21 ވަނަ ދުވަހުން ފެށިގެން އަމަލު ކުރަން ވަނީ އަންގާފަ އެވެ.
މޫދު ކުޅިވަރުގެ ހިދުމަތްދޭ ފަރާތްތަކުން ސަމާލުވާން ޖެހޭ މިންގަނޑުތައް
- މޫދު ކުޅިވަރުގެ ހަރަކާތެއް ފެށުމުގެ ކުރިން ބައިވެރިންނަށް ސަލާމަތީ މައުލޫމާތު ދިނުން
- މޫދު ކުޅިވަރުތަކުގައި ބޭނުން ކުރާ އާލާތްތައް ސަލާމަތީ މިންގަނޑުތަކަށް ފެތުމާއި އެތަކެތި އުފެއްދި ފަރާތުން އެ ބޭނުން ކުރަން ކަނޑައަޅާފައިވާ ގޮތަށް ބޭނުން ކުރުން
- މޫދު ކުޅިވަރު ހިންގާ ސަރަހައްދު ވަކިކޮށްފައިވާނަމަ އެ ސަރަހައްދުގައި އެކަން ކުރުން
- ފަތަން ނުދަންނަ ޓޫރިސްޓުން މޫދު ކުޅިވަރުގައި ބައިވެރި ކުރަންވާނީ ލައިފް ޖެކެޓް އަޅުވައިގެން
- މޫދު ކުޅިވަރު ހިންގާ ފަރާތްތަކުން މޫސުމަށް އަންނަ ބަދަލަށް ސަމާލުވާއި މޫސުން ގޯސްވެއްޖެނަމަ ވަގުތުން އެ ކުޅިވަރެއް ހުއްޓާލުން
- ކޮންމެ ދުވަހަކު ވެސް އެ ދުވަހެއްގެ މޫސުމާ ބެހޭ މައުލޫމާތު ދިނުން
- މޫދު ކުޅިވަރުގައި ބައިވެރިވާ ފަރާތްތަކުގެ އައިޑީކާޑް ނުވަތަ ޕާސްޕޯޓް ނަމްބަރާއި އުމުރު އެނގޭނެ ގޮތަށް ލޮގެއް ބެލެހެއްޓުން
- މެޓް އޮފީހުން މޫސުމަށް އަންނަ ބަދަލު އަންގައިދޭން ބޭނުން ކުރާ ކަލަކޯޑް ހިމެނޭހެން ސާފަސް ބެލޫން ނުވަތަ ދިދަ ފަދަ ތަކަތި ބޭނުން ކުރުން
- މޫދު ކުޅިވަރުގައި އުޅޭ އިންސްޓްރަކްޓަރާއި ސެންޓަރާ ފަސޭހައިން ގުޅޭނެ ކޮމިއުނިކޭޝަން ވަސީލަތެއް އޮތުން
- މޫދު ކުޅިވަރު ފެށުމުގެ ކުރިން ބައިވެރިންގެ ސިއްހީ ހާލަތާ ބެހޭ އިގުރާރު ފޯމެއްގައި ސޮއި ކުރުވުން
- މޫދު ކުޅިވަރު ފެށުމުގެ ކުރިން ސޮއިކުރާ އިގުރާރު ފޯމުގައި ސޮއި ކުރާ މީހާ ހާމަނުކުރާ މައުލޫމާތުގެ ސަބަބުން ގެއްލުމެއްވެއްޖެނަމަ ޒިންމާވާނީ އޭނާ ކަމަށް ފޯމުގައި ބަޔާންކޮށްފައި އޮންނަން ޖެހޭ
- 16 އަހަރުން ދަށުގެ ކުއްޖެއް މޫދު ކުޅިވަރުގައި ބައިވެރިވާނަމަ އޭނާއާއެކު ހުންނަ ބެލެނިވެރިޔާ ފޯމުގައި ސޮއިކުރަން ޖެހޭ
ޓޫރިޒަމް މިނިސްޓްރީން މޫދު ކުޅިވަރުގައި ހިދުމަތްދޭ ފަރާތްތަކަށް ސާކިއުލާއެއް ފޮނުވިއިރު މޫދު ކުޅިވަރުގައި އުޅެނިކޮށް ޓޫރިސްޓުންގެ ފުރާނަ ދިއުމުގެ ތިން ހާދިސާއެއް ދާދިފަހުން ވަނީ ހިންގާފަ އެވެ. މިގޮތުން ދާދިފަހުން ވަނީ ސިންގަޕޫރުން ރާއްޖެއަށް ސްޓަޑީ ޓުއާއެއްގައި އައި ދަރިވަރެއްގެ ގައިގައި ދޯންޏެއްގެ ބުރަފަތިން ޖެހި މަރުވެފަ އެވެ.
ކޮމެންޓް
Republic of Maldives