ގަދަ ވިއްސާރައާއެކު ޣައްޒާގެ އަހުލުވެރިންނަށް އިތުރު ކެކުޅުން

އިސްރާއީލުން ޣައްޒާއާ ދެކޮޅަށް ހިންގަމުންދާ ހަނގުރާމައިގެ ސަބަބުން ގެދޮރު ގެއްލި މަގުމަތިވެފައިވާ ފަލަސްޠީނު މީހުން އުފުލަމުންދާ ތަކުލީފުތަކާއި ތަހައްމަލުކުރާ ކެކުޅުންތައް ބޯވާރެއާއި ގަދަ ވިއްސާރައާއެކު އިތުރުވެފައިވާކަމަށް ސިވިލް ޑިފެންސް ސާވިސްއިން ބުނެފި އެވެ. 

އެ ޖަމްއިއްޔާގެ ތަރުޖަމާނު ނެރުއްވި ބަޔާނެއްގައި ވިދާޅުވީ ވިއްސާރައިގެ ސަބަބުން ގެދޮރު ގެއްލި މަގުމަތިވެފައިވާ އެތައްހާސް މީހުން ވަގުތީ ގޮތުން ދިރިއުޅޭ ފޭލިގެތަކަށް ބޮޑެތި ގެއްލުންތަކެއް ލިބިފައިވާ ކަމަށެވެ. އަދި ފޭލިގެތަކަށް ފެން ވަދެ އެތަންތަނުގައި އުޅޭ މީހުންގެ ދާގީނާއާއި އެމީހުން ނިދާ ގޮދަނޑި ފަދަ ތަކެތި ހަލާކުވެފައިވާކަންވެސް އޭނާ ފާހަގަކުރެއްވި އެވެ. 

"މިހާރުގެ ހާލަތުން އަވަސް ހަލުއި އެހީތެރިކަން މިހާރުން މިހާރަށް ނުލިބިއްޖެނަމަ، ހަގީގީ އިންސާނީ ކާރިސާއެއް އުފެދޭނެކަން ސާފު،" މި ހާލަތުން އަރައިގަތުމަށް އިންސާނީ އެހީތެރިކަން ބޭނުންވާކަން ފާހަގަކުރައްވައި އޭނާ ވިދާޅުވި އެވެ. 

ގަދަ ވިއްސާރައިގެ އަސަރު ޣައްޒާގެ އެކި ސަރަހައްދުތަކަށް ކޮށްފައިވެ އެވެ. ހާއްސަކޮށް ޣައްޒާގެ މެދުތެރެއާއި ދެކުނުގެ ސަރަހައްދުތަކަށް ވިއްސާރައިގެ އަސަރުކުރީ ބޮޑުކޮށެވެ. 

ފާއިތުވި އަހަރުގެ އޮކްޓޯބަރު މަހުގެ ހަތްވަނަ ދުވަހު ޙަމާސްއިން އިސްރާއީލަށް ދިން ހަމަލާއާ ގުޅިގެން ނަސްލު ނައްތައިލުމުގެ ބޮޑު ހަނގުރާމައެއް އިސްރާއީލުންވަނީ ޣައްޒާގައި ހިންގަން ފަށާފަ އެވެ. މި ހަނގުރާމާގައި މިހާތަނަށް ޣައްޒާއިން 44،200 އަށްވުރެ ގިނަ މީހުން ޝަހީދުކޮށްލާފައިވާއިރު އަނިޔާވި މީހުންގެ އަދަދު 104،500 އަށް އަރަ އެވެ. 

ޣައްޒާގައި ހިންގަމުންދާ ލާއިންސާނީ ޖަރީމާތައް ދެވަނަ އަހަރަކަށް ދިގުލައިގެން ގޮސްފައިވާއިރު ބައިނަލްއަގުވާމީ މުޖުތަމައުން އިސްރާއީލުގެ ހަނގުރާމަ ކުށްވެރިކުރާ މިންވަރު އިތުރުވެފައިވެ އެވެ. އެގޮތުން ގައުމުތަކުގެ ލީޑަރުންނާއި ބައިނަލްއަގުވާމީ މުއައްސަސާތަކުން އިސްރާއީލުގެ އަމަލުތަކަކީ އާބާދީއެއް ނައްތައިލަން ހިންގާ އަމަލުތަކެއް ކަމުގައި ސިފަކުރަންވަނީ ފަށާފަ އެވެ.

އެގޮތުން ބުރާސްފަތިދުވަހު އިންޓަނޭޝަނަލް ކްރިމިނަލް ކޯޓުންވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއި އެ ގައުމުގެ ކުރީގެ ދިފާއީ ވަޒީރު ޔޮއާވް ގަލަންޓް ހައްޔަރުކުރަން އަމުރެއް ނެރެފައިވެ އެވެ. އެއީ ޣައްޒާގައި އިންސާނިއްޔަތާ ދެކޮޅު ޖަރީމާތަކާއި ހަނގުރާމައިގެ ކުށްތައް ހިންގިކަމުގެ ތުހުމަތުގަ އެވެ. 

އަަދި ޣައްޒާގައި އިސްރާއީލުން ހިންގަމުންދާ އަނިޔާވެރި ހަނގުރާމައާ ގުޅިގެން އިސްރާއީލާ ދެކޮޅަށް ނަސްލު ނައްތައިލުމުގެ ކުށުގެ މައްސަލައެއް ދެކުނު އެފުރިކާ އިސްވެ އޮވެ ބައިނަލްއަގުވާމީ އަދުލުގެ ކޯޓަށް ހުށަހަޅައިގެން މިހާރު އެ މައްސަލަވެސް ކުރިއަށް އެބަދެ އެވެ.