ކޮމްޕިއުޓަރު އާންމުވުމުގެ އެއް މޭސްތެރިޔާ؛ ހިސާބު އިލްމުވެރިޔާ ތޮމާސް ކާޓްޒް

އެއް ކޮމްޕިއުޓަރަށް ބޮޑު ކޮޓަރިއެއްގެ ޖާގަ ބޭނުންވި 1960ގެ އަހަރުތަކުގައި ދުނިޔޭގެ ހުރިހާ ކޮމްޕިއުޓަރު ޕްރޮގުރާމުން ފުޓުބޯޅަ ސްޓޭޑިއަމަކަށް ޖަމާކޮށްލެވޭހާ މަދެވެ. އެއިރު ބޭނުންކުރަމުންދިޔަ ފޯޓޭން އަދި ކޮބޯލް ފަދަ މުސްކުޅި ޕްރޮގްރާމިން ލޭންގުއޭޖުތައް ބޭނުންކުރަން އެނގޭ މީހުން ގުނައިލެވެނީ ހާހުންނެވެ. 

ނަމަވެސް 1970ގެ މެދުތެރެއަށް އަޅައިލިއިރު ޕްރޮގުރާމުންގެ އަދަދު މިލިއަނުން ގުނައިލެވެ އެވެ. ކޮމްޕިއުޓިން އާންމުވުމުގެ ފުރަތަމަ ފިޔަވަޅުތައް އެޅުނީ ތޮމާސް ކާޓްޒް އަދި އޭނާގެ އެކުވެރިޔާ ޑާޓްމައުތު ކޮލެޖުގެ ޕްރޮފެސާ ޖޯން ކެލީގެ މަސައްކަތުންނެވެ. 1964 ވަނަ އަހަރު އެ ދެ އިލްމުވެރިންވަނީ އާދައިގެ، ހަލުއި އެހާމެ ފަސޭހައިން ބޭނުންކުރެވޭ ޕްރޮގުރާމިން ލޭންގުއެޖެއް އީޖާދުކުރައްވައި އެލެންގުއެޖަށް "ބޭސިކް"ގެ ނަން ދެއްވި އެވެ. 

"އެއީ ކޮމްޕިއުޓިން އާންމުންނާ ހަމައަށް ގެނައުމަށް ކޮމްޕިއުޓަރުގެ ތާރީހުގައި ކުރެވުނު ފުރަތަމަ މަސައްކަތް،" 2014 ވަނަ އަހަރު ޑޮކިއުމެންޓަރީއަކަށް މައުލޫމާތު ދެއްވަމުން ކާޓްޒް ވިދާޅުވި އެވެ. 

ކާޓްޒްގެ މުހިއްމުކަން ބަޔާންކޮށްދެއްވަމުން މައިކްރޯސޮފްޓުގެ މުއައްސިސް ބިލް ގޭޓްސް ވިދާޅުވީ ފަސްދޮޅަހުގެ އަހަރުތަކުން ފެށިގެން ކޯޑުކުރި ކޮންމެ މީހަކުވެސް ކޮންމެވެސް ސިފައެއްގައި ކާޓްސްއަށް ދަރަނިވެރިވެފައިވާ ކަމަށެވެ. މައިކްރޯސޮފްޓް ފަށައިގަތުމަށް ގޭޓްޒްވެސް ބޭނުންކުރީ ބޭސިކްގެ ވާޝަނެކެވެ. 

"1960 ގައި ކޮމްޕިއުޓަރުތައް ބިޔަވެފައި އަގު ބޮޑުވެފައި ހަމައެކަނި ސައެންސްވެރިންނަށް ބޭނުންކުރެވޭ އެއްޗެއްގެ ގޮތުގައި އޮއްވައި އެންމެނަށް ކޮމްޕިއުޓަރު ބޭނުންކުރެވެންވާނެ ކަމަށް ގަބޫލުކުރެއްވީ ކާޓްޒް،" ގޭޓްޒް ވިދާޅުވި އެވެ. 

ބޭސިކް ޕްރޮގުރާމިން ލޭންގުއޭޖުގެ އިތުރަށް ކާޓްޒް އަދި ކެމެނީ އެކުވެރިގެން އިތުރު ހިޔާލެއް އީޖާދުކުރި އެވެ. އެއީ އެއީ އެތައް ބަޔަކަށް އެއްފަހަރާ ކޮމްޕިއުޓަރެއްގެ މެއިންފްރޭމް ބޭނުންކުރެވޭނެ ގޮތެކެވެ. އެއަށް އެ ބޭފުޅުން ދެއްވި ނަމަކީ "ޓައިމް ޝެއަރިން" އެވެ. މިއީ 1970 އަދި 1980 ގައި ޕާސަނަލް ކޮމްޕިއުޓިން އުފެދުމާއި މި ޒަމާނުގެ ކްލައުޑް ކޮމްޕިއުޓިން އުފަންކުރުމަށް މަގުފަހިކުރި އީޖާދެވެ. 

1928 ގައި ޗިކާގޯއަށް އުފަންވި ކާޓްޒް ތައުލީމު ހާސިލުކުރެއްވީ ހިސާބުގެ އިލްމުންނެވެ. ޕީއެޗްޑީ ފުރިހަމަކުރެއްވީ 1956 ވަނަ އަހަރު ޕްރިންސްޓަން ޔުނިވަސިޓީންނެވެ. އެއަށްފަހު 40 އަހަރު މަސައްކަތްކުރެއްވީ ޑާޓްމައުތު ކޮލެޖުގަ އެވެ. 

ކޮމްޕިއުޓަރު އާންމުންގެ އަތްމައްޗަށް އައުމާއި ކޮމްޕިއުޓިން ނުވަތަ ކޮމްޕިއުޓަރު ބޭނުންކުރުން ފަސޭހަވުމުގައި މުހިއްމު ތާރީހީ ދައުރެއް އަދާކުރެއްވި ހިސާބު އިލްމުވެރިޔާ މި މަހު ދުނިޔެ ދޫކުރެއްވީ އުމުރުފުޅުން 96 އަހަރުގަ އެވެ.