އީސީއާއި އޭސީސީގެ މެންބަރުންތަކެއް ވަކިކުރަން ކޮމިޓީން ފާސްކޮށްފި
މި މެންބަރުން ވަކިކުރުމަށް މިއަދު ނިންމާފައިވަނީ ސިއްރުކޮށްގެން ކުރިއަށްގެންދިޔަ ކޮމިޓީ ބައްދަލުވުމެއްގަ އެވެ.
އެންޓި-ކޮރަޕްޝަން ކޮމިޝަނާއި އިލެކްޝަންސް ކޮމިޝަނުގެ މެންބަރުންތަކެއް މަގާމުން ވަކިކުރަން މިނިވަން މުއައްސަސާތަކާ ބެހޭ ކޮމިޓީން ފާސްކޮށްފި އެވެ.
އޭސީސީގެ މެންބަރުންގެ ތެރެއިން ވަކިކުރަން ނިންމާފައިވަނީ ކޮމިޝަނުގެ ނައިބުރައީސް އަބްދުއްސަލާމާއި ކޮމިޝަނުގެ މެންބަރު ތޯހާ މުހައްމަދެވެ. އެ ދެ ބޭފުޅުން މަގާމުން ވަކިކުރުމުގެ މައްސަލަ ބެލުމަށް ކޮމިޓީން މަޖިލީހަށް ހުށަހެޅީ އޭސީސީގެ މެންބަރުންގެ ސުލޫކާ ހިލާފަށް އެހެން ފަރާތެއްގެ ނުފޫޒަށް ލެނބުމުގެ ތުހުމަތުގަ އެވެ.
އިލެކްޝަން ކޮމިޝަނުގެ މެންބަރުންގެ ތެރެއިން ވަކިކުރަން ނިންމީ ކޮމިޝަނުގެ ނައިބުރައީސް އަލީ ނަޝާތު އަދި މެންބަރު މުހައްމަދު އާސިފާއި، މެންބަރު ޑރ.މުހައްމަދު ޒާހިރެވެ.
މި މެންބަރުން ވަކިކުރުމަށް މިއަދު ނިންމާފައިވަނީ ސިއްރުކޮށްގެން ކުރިއަށްގެންދިޔަ ކޮމިޓީ ބައްދަލުވުމެއްގަ އެވެ. އެ ބޭފުޅުންނަށް ކުރާ ތުހުމަތުތައް މަތިމަތިން ހާމަކުރި ނަމަވެސް އެއިން އެއްވެސް ތުހުމަތެއް ކުރެވޭ ގޮތަށް އެ ބޭފުޅުން ކުރެއްވި އަމަލެއް ކޮމިޓީން ހާމަނުކުރެ އެވެ.
އޭސީސީ މެންބަރުން ފޮނުވުމުގެ މައްސަލައާ ގުޅިގެން ކޮމިޓީން މަޖިލީހަށް ފޮނުވި ސިޓީގައި ބުނެފައިވަނީ އޭސީސީގެ ގާނޫނުައި ކޮމިޝަނުގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެންނުވާނެ ކަމުގައި ބުނާ މާއްދާއާއި، އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަސްލަހަތު އިސްކޮށްގެންނުވާނެ ކަމުގައި ބުނެފައިވާ މާއްދާއާ އެ މެންބަރުން ހިލާފުވެފައިވާ ކަމަށެވެ.
އީސީގެ މެންބަރުން ވަކިކުރުމާ ގުޅޭ ގޮތުން މަޖިލީހުގެ އަމީން އާންމު އިއްވެވި ސިޓީގައި ހަމައެކަނި ބުނެފައިވަނީ ސުލޫކީ މިންގަނޑާ ހިލާފުވެއްޖެނަމަ އެ މެންބަރަކު މަގާމުގައި ދެމިހުރުމަށް އެކަށީގެންނުވާ ކަމަށް ބަލައި ވަކިކުރެވޭނެކަމަށް އެ ކޮމިޝަނުގެ ގާނޫނުގައި ބުނެފައިވާ ކަމަށެވެ.
ކޮމެންޓް
Republic of Maldives