"ޒާތީ ނުވެ ވާދަވެރިން ކިޔާ ފާޑުކިޔުން ބަލައިގަންނާނަން"
"ސިޔާސީ ގޮތުން އަޅުގަނޑުމެންނަށް އަދި ސަރުކާރަށް ވެސް ފާޑުކިޔަންވީ. އެކަމަކު ޒާތީވެވަޑައިނުގަންނަވާށޭ. ޒާތީވެވަޑައިގަންނަވަންޏާ އެބޭފުޅުންގެ އަގޭ ވެއްޓޭނީ. އެބޭފުޅުންނަށް އޮންނަ ތާއީދޭ ގެއްލޭނީ،"
ސިޔާސީ ވާދަވެރިން ޒިންމާދާރުކަމާއެކު ޒާތީ ނުވެ އެފަރާތްތަކުގެ މަސްއޫލިއްޔަތު އަދާކުރުމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ގޮވާލައްވައިފި އެވެ.
ޕީއެންސީގެ އެތެރޭގެ އިންތިހާބާ ގުޅޭ ގޮތުން މައުލޫމާތު ދެއްވުމަށް ރޭ ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ ވާދަވެރިން ކިޔާ ސިޔާސީ ފާޑުކިޔުންތައް ބަލައިގަންނަ ކަމަށެވެ. ނަމަވެސް ޒާތީވުމަކީ އެ ޕާޓީން ތަރުހީބު ދޭނެ ކަމެއް ނޫން ކަމަށެވެ.
"ސިޔާސީ ގޮތުން އަޅުގަނޑުމެންނަށް އަދި ސަރުކާރަށް ވެސް ފާޑުކިޔަންވީ. އެކަމަކު ޒާތީވެވަޑައިނުގަންނަވާށޭ. ޒާތީވެވަޑައިގަންނަވަންޏާ އެބޭފުޅުންގެ އަގޭ ވެއްޓޭނީ. އެބޭފުޅުންނަށް އޮންނަ ތާއީދޭ ގެއްލޭނީ،" އަބްދުއްރަހީމް ވިދާޅުވި އެވެ.
ވާދަވެރިންނަށް އަބްދުއްރަހީމް ކުރެއްވި އިލްތިމާސަކީ ޒިންމާދާރުކަމާއެކީ ބިނާކުރަނިވި ފާޑުކިޔުމަށެވެ. ކޮންމެ ދުވަހަކު އާ ކަންކަން ތަޖުރިބާ ކުރާހެން، ވެރިކަމަކީ ވެސް ބަދަލުވާ އެއްޗެއް ކަމަށާއި އެކަން ކުރިން ވެރިކަން ކުރައްވާފައި ތިބި ބޭފުޅުން ގަބޫލުކުރަން ޖެހޭނެ ކަމަށް ވިދާޅުވި އެވެ.
ޕީއެންސީއަށް އަލަށް އިންތިހާބު ކުރި މެންބަރުންނާއެކު ޕާޓީގެ ކަންކަން ވަރުގަދަ ކުރައްވައި، ޕާޓީގެ ހަރަކާތްތައް ހިންގާނެ ގޮތުގެ ނަމޫނާ ވާދަވެރިންނަށް ދަސްކޮށްދެއްވާނެ ކަމަށް ވެސް އަބްދުއްރަހީމް ވިދާޅުވި އެވެ.
"އިރާދަކުރެއްވިއްޔާ ކުރިއަށް އޮތްތަނުގަ ދިވެހިރާއްޖޭގަ ސިޔާސީ ޕާޓީއެއް ކަންތައްތައް ކުރާ ގޮތާއި، ސިޔާސީ ޕާޓީ ހިންގާ ގޮތާ، ސިޔާސީ ޕާޓީތަކުގެ ހަރަކާތްތައް ރާވާ އިންތިޒާމް ކުރާ ގޮތް އަޅުގަނޑުމެން، އަޅުގަނޑުމެންގެ ވާދަވެރިންނަށް ދަސްކޮށްދޭނަން،" އޭނާ ވިދާޅުވި އެވެ.
ޕީއެންސީއާ އަލަށް ގުޅުމަށް 97،000 އެއްހައި މީހުން ފޯމު ހުށަހަޅާފައިވާ ކަމަށް ވެސް އަބްދުއްރަހީމް ރޭ ވަނީ ވިދާޅުވެފަ އެވެ. އެ ޕާޓީގެ ހަރަކާތްތައް ވަރަށް ވަރުގަދައަށް ކުރިއަށް ގެންދަވާނެ ކަމަށް ވެސް ވިދާޅުވި އެވެ.
ކޮމެންޓް
Republic of Maldives