ކެނެރީފު ރިސޯޓް ވައްކަން | ވަގު ކަލޭގެ ރަށަށް އަރާ ފުރަތަމަ ރާބުއީ

އައްޑު އަތޮޅުގައި ހިންގާ ކެނެރީފް ރިސޯޓުން ވައްކަން ކުރަން އެ ރަށަށް އެރި މީހާ އެރަށަށް އަރާފައި ވަނީ ފަތާފައި ކަމަށް އެނގިއްޖެ އެވެ. 

އައްޑު މީހުން އުޅޭ ރަށްތަކާ ވަކިން ތަރައްގީކޮށްފައިވާ ކެނެރީފް ރިސޯޓުން ވައްކަން ކޮށްފައިވަނީ އިއްޔެގެ ވަގުތެއްގަ އެވެ. 

"މިރާ" އަށް އެނގިފައިވާ ގޮތުގައި ވަގު ކަލޭގެ އެ ރިސޯޓަށް އަރާފައިވަނީ ފަތާފަ އެވެ. އަދި ރަށަށް އެރުމަށްފަހު ގެސްޓް ރޫމެއްގައި ހުރި ގިނަ އަދަދެއްގެ ރާ ބޮއިގެން ފުރަތަމަ އޮތީ އެ ރިސޯޓުގައި ނިދާފަ އެވެ. އަދި ނިދިން ހޭލައިގެން ރިސޯޓުން ވައްކަންކޮށްގެން ރަށު ތެރޭގައި އުޅެނިކޮށް އޭނާ ހިފެހެއްޓީ ރަށުގެ މުވައްޒަފުންނެވެ. 

ވައްކަން ކުރި ޒުވާނަކީ އައްޑު އަތޮޅަށް ނިސްބަތްވާ ޒުވާނެކެވެ. އޭނާ ހިފެހެއްޓުމަށްފަހު ފުލުހުންނަށް އެނގުމުން ފުލުހުން ވަނީ ރިސޯޓަށް ގޮސް ވަގުކަލޭގެ ހައްޔަރުކޮށްގެން ގެންގޮސްފަ އެވެ. "މިރާ" އަށް ލިބިފައިވާ ފޮޓޯތަކުން ފެންނަ ގޮތުގައި ވަގު ކަލޭގެ ގެންގުޅުނު ދަބަސް ފުލުހުން ކެޗްކުރިއިރު ރިސޯޓުން ނަގާފައިވާ ބައެއް ތަކެތި ދަބަހުގައި ހުއްޓެވެ.