އިޒްރޭލު ޕާސްޕޯޓް މަނާކުރުމުގެ ބިލު އަވަސްކުރަނީ

އިސްރާއީލު ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް އަވަސްކުރަން ސަލާމަތީ ހިދުމަތްތަކާ ބެހޭ ކޮމެޓީ (241 ކޮމެޓީ) އިން ނިންމައިފި އެވެ. 

މީގެ ކުރިން ކޮމެޓީން ނިންމާފައި ވަނީ އަންނަ ފެބްރުއަރީ މަހުގެ ނިޔަލަށް އެ ބިލުގެ މަސައްކަތް ނިންމުމަށެވެ. ނަމަވެސް މިއަދު އެކޮމެޓީގެ ބައްދަލުވުމެއް ބާއްވައި، މުގައްރިރު، އޭދަފުށި ދާއިރާގެ މެންބަރު އަހުމަދު ސަލީމް ވިދާޅުވީ އެ ބިލުގެ މަސައްކަތް އަވަސް ކުރަން ބޭނުންވާ ކަމަށެވެ.

އެހެންކަމުން ކުރީ ބައްދަލުވުމުގައި ބިލުގައި ހުރި ކަންކަމުގެ މައުލޫމާތު ސާފުކުރުމަށް ކޮމެޓީއަށް ހާޒިރުކުރަން ޖެހޭ ފަރާތްތައް ހާޒިރުކުރުން އަވަސްކުރަން ބޭނުންވާ ކަމަށް އޭނާ ވިދާޅުވި އެވެ.

ސަލީމް ދެއްކެވި ވާހަކަފުޅަށް ތާއީދުކޮށް ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހަޅުއްވާފައި ވަނީ އެ ބިލުގެ މަސައްކަތް އަވަސްކުރުމުގެ ގޮތުން، މައުލޫމާތު ހޯދަން ޖެހޭ ފަރާތެއްވާނަމަ މާދަމާ އިން ފެށިގެން އެފަރާތްތައް ކޮމެޓީއަށް ހާޒިރުކޮށް މައުލޫމާތު ހޯދުމަށެވެ. އެ ހުށަހެޅުން ކޮމެޓީގެ އިއްތިފާގުން ވަނީ ފާސްވެފަ އެވެ.

ސަލީމް ދެން ފާހަގަކުރެއްވީ މޯލްޑިވްސް ކަސްޓަމްސްއަށް ފޮނުވި ސިޓީގެ ޖަވާބު ލިބިފައިވާ ކަމަށެވެ. އެ ސިޓީގައި ހުރި ބައެއް ކަންކަން ޓްރާންސްޕޯޓް މިނިސްޓްރީން ސާފުކުރަން ޖެހޭ ކަމަށެވެ.

އެހެންކަމުން ޓްރާންސްޕޯޓް މިނިސްޓަރާއި ހޯމް މިނިސްޓަރު ވެސް ވީހާވެސް އަވަހަށް ކޮމެޓީއަށް ހާޒިރުކުރުމަށް މިއަދު ވަނީ އިއްތިފާގުން ފާސްކޮށްފަ އެވެ.

މިދިޔަ މޭ މަހުގެ 30 ވަނަ ދުވަހު މި ބިލު މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މީކާއިލް ނަސީމެވެ. އެ ބިލު މަޖިލީހަށް ބަލައިގެންފައި ވަނީ ޖޫން މަހުގެ 10 ވަނަ ދުވަހު އެވެ. އެދުވަހު ބިލު ކޮމެޓީއަށް ފޮނުވި ގޮތަށް އޮތީ މަޑުޖެހިފަ އެވެ. މީކާއިލް ހުށަހެޅުއްވީ އިމިގްރޭޝަން ގާނޫނަށް އިސްލާހު ގެނައުމަށެވެ.