"ދޭދަރު ރުއިން" ބަލައިފިންތަ! ތަފާތު ފިލްމެއް، ބަލާލަން ރަނގަޅު

ރީތި ފިލްމުތަކެއް ދިވެހި ސިނަމާއަށް ގެނެސް ދިން އައި ފިލްމްސް އާއި ކަޒްމިކް އިންޓަނޭޝަނަލްގެ "ދޭދަރު ރުއިން" މި މަހުގެ 20 ވަނަ ދުވަހު ވަނީ ސިނަމާގައި ޕްރިމިއާ ކޮށްފަ އެވެ. 

އިއްލެއާ ސިމްބެގެ "ދޭދަރު ރުއިން" ފިލްމަކީ ކޮރިއޯގްރަފްކޮށްފައިވާ ފައިޓް މަންޒަރުތައް ހިމެނޭ އެކްޝަން ފިލްމެކެވެ. މިއީ އިންސާނުން ޓްރެފިކް ކުރުމާއި ވިޔަފާރިކުރުމުގެ މައްސަލައަށް ހާއްސަކޮށް ރާއްޖޭގައި އުފައްދާފައިވާ ފުރަތަމަ ފިލްމެވެ. މީގެ އިތުރުން ރޭވިގެން ކުރެވޭ ކުށްތަކާ ގެވެށި އަނިޔާ އާއި ކުޑަކުދިންނަށް ނުރައްކާވުމާއި ކުޑައިރު ލިބޭ ނަފްސާނީ ޓްރޯމާއާ ގުޅޭ ކަންކަން ވެސް ފިލްމުގައި ދައްކައިދެ އެވެ.

ފިލްމުގައި އެކްޝަން މަންޒަރުތައް ގެނެސްދީފައި ވަނީ ވަރަށް ބޮޑަށް އަސްލާ އެއްގޮތަށެވެ. އެފަދަ ބައެއް މަންޒަރުތައް ވަރަށް ފުރިހަމަ އެވެ. ފިލްމު ބެލި ގިނަ ބަޔަކު އެކަން ފާހަގަ ކުރެ އެވެ.

ފިލްމު ބެލި ބައެއް މީހުންގެ އެންމެ ބޮޑު ޝަކުވާ އަކީ ފިލްމުގައިވާ ހުރިހާ ކަމެއް އެންމެ ސާފުކޮށް ނޭންގުމެވެ. ނަމަވެސް ވަރަށް ޝައުގުވެރި ކަމާ އެކު ފިލްމު ބަލާލައިފިނަމަ ފިލްމުގެ ވާނުވާ ސާފުކޮށް އެނގޭނެ އެވެ. ފިލްމުގެ ގިނަ މަންޒަރުތަކުގައި ވާހަކަ ދައްކަނީ އިނގިރޭސި ބަހުންނެވެ. ފޯނުން ކުރެވޭ މެސެޖުތަކާއި މުއާމަލާތްތައް ގިނަ އެވެ. އެ މެސެޖުތައް ސްކްރީނުން ފެނެ އެވެ. މުޅި ފިލްމު ވަނީ ސަބްޓައިޓުލް ކޮށްފަ އެވެ. އެހެން ކަމުން މިއީ ވަރަށް ޝައުުގުވެރިކަމާ އެކު ބަލަން ޖެހޭ ފިލްމެކެވެ.

އެ ޝައުގުވެރި ކަމުގައި ފިލްމު ބަލާލައިފިނަމަ ފިލްމުގައިވާ ގޮތް ދެނެގަނެވޭނެ އެވެ. ޝައުގުވެރި ވެސް ކުރުވާނެ އެވެ.

"ދޭދަރު ރުއިން" ގެ މުހިންމު ރޯލުތަކުން ފެންނަނީ ޝަރަފު އަބްދުﷲ އާއި މައިހާ އާދަމާއި ހާފިޒް މުހައްމަދުގެ އިތުރުން މޫސާ ރަޝީދާއި ޝުޝްމާ އެވެ. ޝުޝްމާ އަކީ ނޭޕާލް މީހެކެވެ. މި ހުރިހާ އެކްޓަރުންގެ އެކްޓިން ވެސް ޖުމްލަކޮށް ރަނގަޅެވެ. މީގެ އިތުރުން ފިލްމުގެ އެކްޝަން މަންޒަރުތަކުން ފެންނަ އެހެން އެކްޓަރުންގެ ހުނަރުވެރިކަން ވެސް ފާހަގަ ކޮށްލަން ޖެހެ އެވެ.

މިއީ މުޅީން އަލަށް ޑަައިރެކްޝަންގެ ތެރެއަށް ނިކުތް އައްޒާމްގެ ފުރަތަމަ ޑައިރެކްޝަން އެވެ. އެހެން ކަމުން އައްޒާމްގެ މަސައްކަތަށް ހިތްވަރު ދިނުމަށް ވެސް މި ފިލްމު ބަލާލަން އޮލިމްޕަހަށްދާން ރަނގަޅެވެ. މި ފިލްމުން ޔަގީންކޮށް ދިން ކަމަކީ އައްޒާމްގެ ދެން ފެންނަ ޑައިރެކްޝަނެއް މި ފިލްމަށް ވުރެ ހާސްބައި މޮޅުކޮށް ގެނެސްދޭނެ ކަމެވެ.