ޕީޖީއަށް ބަލައިގަންނަ ބައެއް މައްސަލަތަކުގައި ދައުވާކުރުން 100 ދުވަހަށްވުރެ ދިގުލައިގެން ގޮސްފައިވޭ

ޕްރޮސެކިއުޓާ ޖެނެރަލް އޮފީހަށް ތަހުގީގު ފުރިހަމަކުރެވިފައިވާކަމަށް ނިންމައި ބަލައިގަންނަ މައްސަލަތަކުގެ ތެރެއިން ބައެއް މައްސަލަތަކުގައި ދައުވާ އުފުލުމަށް ސަތޭކަ ދުވަހަށްވުރެ ގިނަ ދުވަސް ހޭދަވިކަން އޮޑިޓު އޮފީހުގެ ރިޕޯޓަކުން ފާހަގަކޮށްފި އެވެ. 

ޕްރޮސެކިއުޓާ ޖެނެރަލް އޮފީހުގެ ޕާފޯމެންސް އޮޑިޓު ރިޕޯޓުގައި އޮޑިޓު އޮފީހުން ފާހަގަކުރި ގޮތުގައި 2018 ވަނަ އަހަރަށްފަހު އާންމުކޮށް ތަހުގީގު ނިންމުމަށްފަހު ޑިއުޓީ ޕްރޮސެކިއުޝަން މަރުހަލާއިން ބަލައިގަންނަން ނިންމާ މައްސަލަތަަކުގެ 90 އިންސައްތައަށްވުރެ ގިނަ މައްސަލާގައި ދައުވާކޮށްފައިވެ އެވެ. 

ޑިއުޓީ ޕްރޮސެކިއުޝަން ނިންމުމަށްފަހު ދައުވާކުރި ނިސްބަތް:

އޮޑިޓު އޮފީހުން ފާހަގަކުރި ގޮތުގައި ދައުވާކުރެވޭނެކަމަށް ނިންމާ މައްސަލަތައް ރަނގަޅަށް ދިރާސާކުރުމަށްފަހު ލަސްނުކޮށް ދައުވާކުރުމަކީ އަދުލުއިންސާފު ގާއިމުކުރުމުގެ މުހިއްމު ބައެކެވެ. 2018 އިން 2021 އާ ދެމެދުގައި ޕީޖީ އޮފީހުން 7،328 މައްސަލައެއްގައި ދައުވާކުރަން ނަގާ މީޑިއަން އެވެރެޖު މުއްދަތު ދިހަ ދުވަހަށްވުރެ މަދުކަމުގައި އެ ރިޕޯޓުގައި ބުނެފައިވެ އެވެ. 

ނަމަވެސް އެ މުއްދަތުގައި 245 މައްސަލައެއްގައި ދައުވާކުރުމަށް 100 ދުވަހަށްވުރެ ގިނަ ވަގުތު ނެގިކަން އޮޑިޓު އޮފީހުން ފާހަގަކުރި އެވެ. އެއިން 46 މައްސަލާގައި ދައުވާކޮށްފައިވަނީ ޑިއުޓީ ޕްރޮސެކިއުޝަން ނިންމުމަށްފަހު މައްސަލަ ބަލައިގަތްތާ އަހަރު ދުވަސް ފާއިތުވި ފަހުންނެވެ. 

އެގޮތުން 33 މައްސަލައެއްގައި އަހަރަކާއި ދެ އަހަރާދެމެދުގެ މުއްދަތު ދައުވާކުރަން ނެގިއިރު، 10 މައްސަލައެއްގައި ދެ އަހަރާއި ތިން އަހަރާ ދެމެދުގެ މުއްދަތެއް ހޭދަވި އެވެ. އަދި 3 މައްސަލއެއްގައި ދައުވާކުރުމަށް ތިން އަހަރަށްވުރެ ދިގު މުއްދަތެއް ނަގާފައިވެ އެވެ. 

ޕީޖީ އޮފީހުން މިކަމުގައި ބުނެފައިވަނީ ބައެއް މައްސަލަތަކުގައި ދައުވާކުރުން ލަސްވަނީ ނަސޭހަތުގެ އެއްބަސްވުމެއް ހެދުމަށްފަހު އެ އެއްބަސްވުމާ ހިލާފުވުމުން އަލުން ދައުވާކުރަން މުއްދަތު ނަގާތީ ކަމަށެވެ. ނަމަވެސް އޮޑިޓު ރިޕޯޓުގައި ފާހަގަކުރި ގޮތުގައި ދައުވާކުރަން ސަތޭކަ ދުވަހަށްވުރެ ގިނަ ދުވަސް ނެގި 245 މައްސަލައިގެ ތެރެއިން ނަސޭހަތުގެ އެއްބަސްވުން ހަދާފައިވަނީ އެންމެ 17 މައްސަލައެއްގަ އެވެ.