މާލެއާއި ވިލިމާލޭގެ މަގުތައް ތަރައްގީކުރުމުގެ މަސައްކަތް ފަށައިފި

މާލެއާއި ވިލިމާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއު ފަށާފައިވާކަމަށް ކޮންސްޓްރަކްޝަން މިނިސްޓްރީން ބުނެފި އެވެ. 

މާލޭގެ މަގުތައް ޒަމާނީ ފެންވަރަށް ތަރައްގީކޮށް މަގުތަކަށް ކުރިމަތިވެފައިވާ ތޮއްޖެހުމުގެ މައްސަލަ ހައްލުކުރެއްވުމަކީ 2023 ވަނަ އަހަރުގެ ރިޔާސީ އިންތިހާބުގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެވަޑައިގެންފައިވާ ރިޔާސީ ވައުދުފުޅެކެވެ. 

އެމަނިކުފާނު ޗައިނާއަށް ކުރެއްވި ފުރަމާނަ ދަތުރުފުޅުގައި އެ ގައުމުގެ ރައީސް ޝީ ޖިންޕިންއާއެކު ބޭއްވެވި ރަސްމީ ބައްދަލުވުމުގައި އެ މަސައްކަތާ ގުޅޭ ގޮތުން މަޝްވަރާކުރެއްވި އެވެ. އެއާއެކު ޗައިނާއިންވަނީ މާލެއާއި ވިލިމާލޭގެ މަގުތައް އެ ގައުމުގެ ހިލޭ އެހީގައި ޒަމާނީ ފެންވަރަށް ތަރައްގީކޮށްދޭން ހުށަހަޅާފަ އެވެ. 

އެ މަޝްރޫއުގެ ދަށުން ހަދަންޖެހޭ ސާވޭތައް ހެދުމަށް އެގައުމުގެ ސަރުކާރުން ކަނޑައެޅި ފަންނީ މާހިރުންގެ ޓީމެއް މި މަހު ރާއްޖެއަށް އައިސްފައިވެ އެވެ. ކޮންސްޓްރަކްޝަން މިނިސްޓްރީން ބުނީ މި މަހުގެ ފަސްވަނަ ދުވަހުން ފެށިގެ 21 ވަނަ ދުވަހުގެ ނިޔަލަށް އެ ޓީމުންވަނީ މާލެއާއި ވިލިމާލޭގެ މަގުތަކުގެ ހާލަތު ވަޒަަންކުރުމުގެ މަސައްކަތް ކުރިއަށްގެންގޮސް ނިންމާލާފައި ކަމަށެވެ. 

އަދި އެ މުއްދަތުގައި މާލެއާއި ވިލިމާލޭ މަގުތަކުގެ ފީސިބިލިޓީ ދިރާސާ ޗައިނާގެ ޓީމާއި މިނިސްޓްރީގެ ފަންނީ ޓީމުތައް ގުޅިގެން ހަދާފައިވާކަމަށްވެސް އެ މިނިސްޓްރީން ބުނެފައިވެ އެވެ. 

އެ މިނިސްޓްރީން ބުނި ގޮތުގައި މި މަޝްރޫއު ނިމޭއިރު މިހާރު ވަރަށް ބޮޑަށް ހަލާކުވެ ވީރާނާވެފައި ހުރި މާލޭގެ މަގުތައް އެންމެ ޒަމާނީ ފެންވަރަށް ތަރައްގީކުރެވި އެކަމުގެ މަންފާ މާލެ ސަރަހައްދުގައި ދިރުއުޅޭ ރައްޔިތުންނަށް ލިބޭނެ އެވެ. 

ޗައިނާ ސަރުކާރުން މި މަޝްރޫއު ހިންގުމަށް 103 މިލިއަން ޑޮލަރު ހަމަޖައްސާފައިވެ އެވެ. އެ މަޝްރޫއު ނިމޭއިރު އިތުރަށް މާލޭގެ މަގުތައް ރޫޅައިލަންނުޖެހޭ ފެންވަރަށް ތަރައްގީކުރެވޭނެކަމަށް ރައީސް މުއިއްޒު ވިދާޅުވެފައިވެ އެވެ. 

އެމަނިކުފާނު ވިދާޅުވީ މި މަޝްރޫއުގެ ދަށުން މަގުތައް ހަދާނީ އަޑީގައި ހުރި ފެނާ ނަރުދަމާ އަދި ކަރަންޓް ސާވިސްފަދަ ނެޓްވޯކްތައް އެއްކޮށް އާކޮށްގެން ކަމަށެވެ. އަދި އެއަށްފަހު މާލޭގެ މަގުތައް ރޫޅައިގެން އެއްވެސް މަސައްކަތެއް ކުރަންނުޖެހޭނެ ކަމަށްވެސް ވިދާޅުވި އެވެ. 

"ޑީވޯޓަރިން ނިޒާމް، ސްޓޯމް ވޯޓަރިން ނިޒާމް، ފަޔާ، ހައިޑްރެންޓް ނިޒާމް [އާވެސް އެކީ]. އެހެންވީމަ ވަރަށް ބޮޑު ހަރަދެއް ހިނގާނެ، ވަރަށް ފުޅާކޮށް ކޮމްޕްރެހެންސިވްކޮށް ހައްލުވާ މައްސަލައެއްގެ ގޮތުގަ އިރާދަކުރެއްވިއްޔާ މަގުތައް ހެދިގެން ދާނީ ގޯޅިތަކާ އެކީގަ،" ރައީސް ވިދާޅުވެފައިވެ އެވެ.