ދައުވާކުރުމާމެދު ގޮތެއް ނިންމަން އެންމެ ވަގުތު ނަގަނީ ކޮރަޕްޝަން މައްސަލަތަކުގައި

ތަހުގީގު ނިންމުމަށްފަހު ދައުވާކުރުމާމެދު ގޮތެއް ނިންމުމަށް ޕްރޮސެކިއުޓާ ޖެނެރަލް އޮފީހަށް ފޮނުވާ މައްސަލަތަކުގެ ތެރެއިން ދައުވާކުރުމާމެދު ގޮތެއް ނިންމުމުގައި އެންމެ ގިނަ ވަގުތު ނަގަނީ ކޮރަޕްޝަން މައްސަލަަތަކުގައިކަން ޕީޖީ އޮފީހުގެ އޮޑިޓު ރިޕޯޓަކުން ދައްކައިފި އެވެ. 

ދައުވާކުރުމުގެ ކުރިން އެ މައްސަލައެއްގެ ތަހުގީގު ފުރިހަމަކުރެވިފައިވާކަން ކަށަވަރުކުރުމަކީ ޕްރޮސެކިއުޓާ ޖެނެރަލްގެ ޒިންމާއެކެވެ. ތަހުގީގު ފުރިހަމަކުރެވި ދައުވާ ސާބިތުކުރެވޭ މިންވަރަށް މައްސަލަ ކުރިއަށްގެންދެވިފައި އޮތްކަން ކަށަވަަރުކުރާ މަރުހަލާއަކީ ޑިއުޓީ ޕްރޮސެކިއުޝަންގެ މަރުހަލާ އެވެ. 

އޮޑިޓު އޮފީހުން ފާހަގަކުރި ގޮތުގައި ކޮރަޕްޝަން މައްސަލަތަކުގައި ޑިއުޓީ ޕްރޮސެކިއުޝަން މަރުހަލާއަށް 103 ދުވަސް އެވެރެޖުކޮށް ހޭދަވެ އެވެ. އެންމެ ގިނަ ދުވަސް ހޭދަވި މައްސަލާގައި 223 ދުވަސް ހޭދަވެފައިވާކަން އޮޑިޓު ރިޕޯޓުގައި ފާހަގަކޮށްފައިވެ އެވެ. 

އޮޑިޓު އޮފީހުންވަނީ އޭސީސީން ޑިއުޓީ ޕްރޮސެކިއުޝަނަށް 2020 އާއި 2021 ގައި ހުށަހެޅި މައްސަލަތަކުގެ ތަފުސީލުތައް ހޯދައި އޮޑިޓު ރިޕޯޓުގައި ހިމަނާފަ އެވެ. އެ މުއްދަތުގައި ކޮމިޝަބުން 56 މައްސަލައެއް ޑިއުޓީ ޕްރޮސެކިއުޝަނށް ހުށަހެޅިއިރު، ދައުވާކުރުމާމެދު ގޮތެއް ނިންމުމަށް އެވެރެޖުކޮށް 47 ދުވަސް ހޭދަވެ އެވެ. 

އެ ރިޕޯޓުގައި ފާހަގަކުރި ގޮތުގައި ބައެއް މައްސަލަތަކުގައި ދައުވާކުރުމާމެދު ގޮތެއް ނުނިންމި އަހަރަކަށްވުރެ ގިނަ ދުވަސްވެސް ހޭދަވެފައި އެބަހުއްޓެވެ. 

އެފަދަ މައްސަލަތައް ލަސްވާ ސަަބަބު ދެނެގަނެ އެ މައްސަލަތައް ހައްލުކުރުމަށް ޕީޖީ އޮފީހުން މަސައްކަތެއް ނުކުރާއިރު އޭސީސީން ހުށަހެޅި މައްސަލަތަކުގެ 20 އިންސައްތަ މައްސަލާގައި ދައުވާނުކުރުމަށް ޕީޖީން ނިންމާފައިވެ އެވެ. 

ޕީޖީ އޮފީހުން އޮޑިޓަށް މައުލޫމާތު ދިން ގޮތުގައި އެފަދަ މައްސަލަތައް ދިގުލައިގެން ދިއުމަށް މެދުވެރިވާ މައިގަނޑު ސަބަބަކީ ޑިއުޓީ ޕްރޮސެކިއުޝަނަށް މައްސަލަ ހުށަހެޅުމުން ތަހުގީގު އިތުރަށް ފުރިހަމަކުރަން އެންގުމުން ތަހުގީގުތައް ނިންމުމަށް ތަހުގީގީ އިދާރާތަކުން ނަގާ މުއްދަތު ދިގުވުމެވެ. 

އޭސީސީން ބުނެފައިވަނީ މައްސަލަތައް ލަސްވުމުގެ މައިގަނޑު ސަބަބަކީ މައްސަލަތަކާ ހަވާލުވާ ޕްރޮސެކިއުޓަރުންނަށް ކޮރަޕްޝަން މައްސަލަތަކާ ގުޅޭ މައުލޫމާތު އެކަށީގެންވާ މިންވަރަށް ނޭނގުމާއި، ދިރާސާނުކުރުމާއި، ޕްރޮސެކިއުޓަރުން ބަދަލުވާއިރު މައްސަލައިގެ މައުލޫމާތު ރަނގަޅަށް ބަދަލުކުރެވިފައި ނެތުން ކަމަށެވެ. 

އޮޑިޓުގައި ފާހަގަކުރި ގޮތުގައި މައްސަލަތައް ދިގުލައިގެން ގޮސް ގިނަ ދުވަސްވުމަކީ ސާބިތުކުރުމަށް ހުރަސްއެޅޭ ކަމެކެވެ. އަދި ތަހުގީގު ފުރިހަމަނުވެ މައްސަލަތައް ޑިކްލަައިންކުރަންޖެހުމަކީ ތަހުގީގަށް ކުރާ މަސައްކަތް ބޭކާރުވެ މުއައްސަސާތަކުގެ ވަގުތާއި ވަސީލަތް ގެއްލިގެންދާ ކަމެކެވެ.