އާރްޓީއައިއަށް ޖަވާބުނުދެވުނީ މުވައްޒަފެއްގެ އިހުމާލުން، ފިޔަވަޅު އަޅާނެ: ހައުސިން މިނިސްޓްރީ

ހައުސިން މިނިސްޓްރީއަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް ހުށަހެޅި ފޯމަކަށް ޖަވާބުނުދިނުމުގެ ސަބަބުން މިނިސްޓްރީ ޖޫރިމަނާކުރީ އެ މިނިސްޓްރީގެ މުވައްޒަފެއްގެ އިހުމާލުން ކަމަށް އެ މިނިސްޓްރީން ބުނެފި އެވެ. 

ހައުސިން މިނިސްޓްރީ ޖޫރިމަނާކުރުމަށް އައިކޮމްއިން ނިންމީ މައުލޫމާތެއް ހޯދުމަށް ހުށަހެޅި މައްސަލައެއްގައި އެ މައުލޫމާތު މިނިސްޓްރީން ނުދިނުމާ ގުޅިގެން އިންފޮމޭޝަން ކޮމިޝަނަރުގެ އޮފީހުން ބޭއްވި އަޑުއެހުމަށް މިނިސްޓްރީން ހާޒިރުނުވުމާ ގުޅިގެންނެވެ. 

މައުލޫމާތު ހޯދައި ލިބިގަތުމުގެ ގަވާއިދުގައި ބުނެފައިވަނީ މައުލޫމާތު ދިނުމާ ގުޅޭ މައްސަލައެއްގައި އައިކޮމްގެ އަޑުއެހުމަކަށް ހާޒިރުވާން އަންގައިފިނަަމަ މަގުބޫލު ސަބަބެެއް މެދުވެރިވާ ހާލަތުގައި ނޫނީ ހާޒިރުވުން ލާޒިމުވާނެ ކަމަށެވެ. 

އަދި މަގުބޫލު ސަބަބެއް އޮވެގެން ހާޒިރުނުވެވޭނަމަ ހާޒިރުވުމުގެ ވަގުތުގެ އެއް ގަޑިއިރުގެ ކުރިން ހާޒިރުވެވެން ނެތްކަމާއި ހާޒިރުނުވެވޭ ސަބަބު އައިކޮމްއަށް އަންގަންވާނެ ކަމަށެވެ. 

އައިކޮމްއިން ބުނި ގޮތުގައި އެ އޮފީހުން 350 ރުފިޔާއިން ހައުސިން މިނިސްޓްރީ ޖޫރިމަނާކުރީ މައުލޫމާތު ހޯދައި ލިބިގަތުމުގެ ގަވާއިދާ އެއްގޮތަށް މިނިސްޓްރީން އަމަލުކޮށްފައިނުވާތީ އެވެ. 

އެ މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ ހައުސިން މިނިސްޓްރީއަށް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް އެދި ހުށަހަޅާ ހުށަހެޅުންތަކާ ގުޅިގެން އެ މައުލޫމާތު ފޯރުކޮށްދިނުމަށް އެ މިނިސްޓްރީން ވަރަަށް ބޮޑަށް އިސްކަންދޭ ކަމަށެވެ. 

އަދި މި މައްސަލާގައި މިނިސްޓްރީ ޖޫރިމަނާކުރަންޖެހުނީ އެ މިނިސްޓްރީގެ މުވައްޒަފެއްގެ އިހުމާލުގެ ސަބަބުންކަމަށްވާތީ، ސިވިލް ސާވިސްގެ ގަވާއިދާ އެއްގޮތަށް އެ މުވައްޒަފާމެދު ފިޔަވަޅުއެޅުމުގެ މަސައްކަތް ކުރިއަށް ގެންގޮސްފައިވާކަމަށްވެސް އެ ބަޔާނުގައި ބުނެފައިވެ އެވެ. 

"މިފަދަ ކަންކަން ތަކުރާރުވިޔަ ނުދިނުމަށްޓަކައި ކަމާ ގުޅޭ އުސޫލުތައް ހަރުދަނާކުރުމުގެ މަސައްކަތް މި މިނިސްޓްރީން ކުރަމުންދާ ވާހަކަ ދަންނަވަން،" ހައުސިންް މިނިސްޓްރީން ބުންޏެވެ.