ރައީސްގެ އަމާޒާ އެއްގޮތަށް އިސްރާއީލު ޕާސްޕޯޓު މަނާނުކުރެވޭ ސަބަބު ބުނެދީ: ފައްޔާޒު

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ނިންމެވުމާ އެއްގޮތަށް އިސްރާއީލު ޕާސްޕޯޓު މަނާނުކުރެވިގެން އުޅޭ ސަބަބު ރައްޔިތުންނަށް ސާފުކޮށްދޭންޖެހޭ ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލު ވިދާޅުވެއްޖެ އެވެ. 

ފައްޔާޒު މިފަދައިން ވިދާޅުވީ އިންޓަނޭޝަނަލް ކްރިމިނަލް ކޯޓު (އައިސީސީ)އިން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއި އެ ގައުމުގެ ކުރީގެ ޑިފެންސް މިނިސްޓަރު ހައްޔަރުކުރަން އަމުރު ނެރުމާ ގުޅިގެން އެކްސްގައި ކުރެއްވި ޕޯސްޓެއްގަ އެވެ. 

އިސްރާއީލު ޕާސްޕޯޓު މަނާކުރަން ސަރުކާރުން ނިންމައި އެކަން ފާއިތުވި ޖޫން މަހުގައި އިއުލާނު ކުރި އެވެ. އެއިރު އިދިކޮޅު އެމްޑީޕީން އޮތީ އިސްރާއީލު ޕާސްޕޯޓު މަނާކުރުމަށް އިމިގްރޭޝަން ގާނޫނު އިސްލާހުކުރުމަށް މަޖިލީހަށް ހުށަހަޅާފަ އެވެ. 

އެ ބިލު ދިރާސާކުރުމަށް ސަލާމަތީ ހިދުމަތްތަކާ ބެހޭ ކޮމިޓީއަށް ފޮނުވުމަށްފަހު ބިލުގެ މަސައްކަތެއް ނުހިނގައި ދުވަސްތަކެއް ފާއިތުވި އެވެ. އެއަށްފަހު ކުއްލި ގޮތަކަށް އެ ކޮމިޓީން ބިލުގެ މަސައްކަތް ފަށައިގަތީ ސަރުކާރަށް އަހަރެއް ފުރެން ކައިރިވެފައިވަނިކޮށެވެ. އަންނަ ފެބްރުއަރީ މަހު އެ މަސައްކަތް ނިންމަން ކޮމިޓީން ސުންގަޑި ކަނޑައަޅާފައިވެ އެވެ. 

ސަރުކާރުން ފާސްކުރަން ބޭނުންވާ ބިލުތައް އެންމެ ދުވަހެއްގެ ތެރޭގައި މަޖިލީހުން ފާސްކުރަމުން އަންނަކަން ފާހަގަކޮށް އިސްރާއީލު ޕާސްޕޯޓު މަނާކުރުމުގެ ބިލުގެ މަސައްކަތް ލަސްވަމުންދާތީ އާންމުން އަންނަނީ ކަންބޮޑުވުން ފާޅުކުރަމުންނެވެ. 

ICC has been able to issue an arrest warrant for Netanyahu and yet President Muizzu with complete control over Maldivian Parliament and his party is unable to make a decision regarding his stated goal to ban the Israel passport @presidencymv . Explain the reasons to the Maldivian…

— Fayyaz Ismail (@faya_i) November 21, 2024

ފައްޔާޒު އެކްސްގައި ކުރެއްވި ޕޯސްޓުގައި ވިދާޅުވީ އިންޓަނޭޝަނަލް ކްރިމިނަލް ކޯޓުން ނަތަންޔާހޫ ހައްޔަރުކުރަން އަމުރުކުރިއިރުވެސް ރައީސް މުއިއްޒުގެ ފުރިހަމަ ބާރުވެރިކަން އޮތް އެމަނިކުފާނުގެ ކޮންޓުރޯލުގައި އޮތް މަޖިލީހަކަށް އަދި އެމަނިކުފާނުގެ ޕާޓީއަށް އިސްރާއީލު ޕާސްޕޯޓު މަނާކުރުމުގެ ބިލާމެދު ގޮތެއް ނުނިންމުނު ކަމަށެވެ. 

"ރައީސް ބަޔާންކުރައްވާފައިވާ އެމަނިކުފާނުގެ ލަނޑުދަނޑިއެއްކަމަށްވާ އިސްރާއީލު ޕާސްޕޯޓު މަނާކުރުމުގެ ބިލާމެދު އެމަނިކުފާނުގެ ޕާޓީއަށް [މަޖިލީހުގެ ތެރެއިން] ގޮތެއް ނުނިންމުނު،" ފައްޔާޒު ވިދާޅުވި އެވެ. 

އެ މައްސަލާގައި ޕީއެންސީގެ އަޣުލަބިއްޔަތު އޮތް މަޖިލީހަށް ގޮތެއް ނުނިންމިގެން އުޅޭ ސަބަބު ދިވެހި ރައްޔިތުންނަށް ސާފުކޮށްދިނުމަށް ފައްޔާޒު ގޮވައިލެއްވި އެވެ. 

"އެ ރައްޔިތުންނަށް އެނގުން ހައްގު ކަމެއް މިއީ. މަނިކުފާނުގެ ގޮތްދެއްކެވުންގަނޑު އަމަލީ ސިފައަށް ބަދަލުނުކުރެއްވޭ ސަބަބު އެ ރައްޔިތުންނަށް އެއިރުން ވިސްނޭނެ،" ރައީސް މުއިއްޒު ޓެގުކުރައްވައި އެކްސްގައި ކުރެއްވި ޕޯސްޓުގައި ފައްޔާޒު ވިދާޅުވި އެވެ.