ނަތަންޔާހޫ ހައްޔަރުކުރުމުގެ އަމުރު ތަންފީޒުކުރަން ރައީސް ގޮވާލައްވައިފި

އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓުން ނެރުނު އަމުރު ތަންފީޒުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ގޮވާލައްވައިފި އެވެ. 

ހަނގުރާމައިގެ ޖަރީމާތައް ހިންގުމުގެ ތުހުމަތުގައި ނަތަންޔާހޫގެ އިތުރަށް އިސްރާއީލުގެ ކުރީގެ ޑިފެންސް މިނިސްޓަރު ޔޮއާވް ގަލަންޓު ހައްޔަރުކުރުމަށްވެސް އައިސީސީން އަމުރުކޮށްފައިވެ އެވެ. އައިސީސީން ބުނެފައިވަނީ ނަތަންޔާހޫއާއި ގަލަންޓު ހަނގުރާމައިގެ އުކުޅެއްގެ ގޮތުގައި ބަނޑަށްޖެއްސުން ބޭނުންކުރިކަމުގެ އެކަށީގެންވާ ހެކި އެބަހުރި ކަމަށެވެ. 

އަދި އެނގިތިބެ ޣައްޒާގެ އަހުލުވެރިންނަށް ކާބޯތަކެއްޗާއި ބޯފެނާއި ކަރަންޓު ފަދަ އަސާސީ ހިދުމަތްތައް ލިބިޔަނުދީ ހިފަހެއްޓުމުގައި ނަތަންޔާހޫއާއި ގަލަންޓް ބައިވެރިވިކަމުގެ މައްޗަށް އެކަށީގެންވާ ހެކި ލިބިފައިވާ ކަމުގައި ކޯޓުން ބުނެފައިވެ އެވެ. 

ކޯޓުގެ މި ނިންމުމަކީ އައިސީސީގައި ބައިވެރިވާ 124 ދައުލަތުގެ މައްޗަށް ތަންފީޒުކުރުން ލާޒިމުވާނެ ނިންމުމެކެވެ. 

The #Maldives welcomes the @IntlCrimCourt's decisions today with regard to the situation in the State of Palestine. This is a crucial step towards ensuring accountability for war crimes and crimes against humanity.

The Maldives respects the decisions of the ICC and underscores…

— Dr Mohamed Muizzu (@MMuizzu) November 21, 2024

އެ ނިންމުމާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ބައިނަލްއަގުވާމީ ޖިނާއީ ކޯޓުގެ ނިންމުމަށް ދިވެހިރާއްޖެއިން މަރުހަބާ ކިޔާ ކަމަށެވެ. އަދި މިއީ އިންސާނިއްޔަތާ ދެކޮޅަށް އިސްރާއީލުން ހިންގާފައިވާ ޖަރީމާތަކާއި ހަނގުރާމައިގެ ކުށްތަކާމެދު އެ ގައުމު ޖަވާބުދާރީކުރުވުމަށް އެޅުނު މުހިއްމު ފިޔަވަޅެއް ކަމަށެވެ. 

އައިސީސީގެ ނިންމުމަށް ރާއްޖެއިން އިހުތިރާމުކުރާކަން ފާހަގަކުރައްވަައި އެމަނިކުފާނު ވިދާޅުވީ އެ ނިންމުމަށް ގަދަރުކޮށް ތަންފީޒުކުރުމުގެ މުހިއްމުކަން ދިވެހިރާއްޖެއިން ފާހަގަކުރާ ކަމަށެވެ. 

"ބައިނަލްއަގުވާމީ ގާނޫނު ނަގަހައްޓައި، ފަލަސްތީނު ރައްޔިތުންނަށް އިންސާފު ހޯދައިދިނުމަކީ [މެދުއިރުމަތި] އެ ސަރަހައްދުގައި ސުލްހަ އަލުން ގާއިމުކުރުމަށް ކޮންމެހެން ބޭނުން ކަންކަން،" ރައީސް އިތުރަށް ވިދާޅުވި އެވެ.