އިޒްރޭލު ޕާސްޕޯޓް މަނާކުރުން: ގުޅުން ހުރި އިދާރާތަކާ ޕާޓީތައް ހާޒިރުކުރަނީ

އިޒްރޭލު ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އިމިގްރޭޝަން ގާނޫނަށް އިސްލާހު ހުށަހެޅި ބިލު ދިރާސާ ކުރުމަށް، ކަމާ ގުޅުން އިދާރާތަކާއި ސިޔާސީ ޕާޓީތަކާ ބައްދަލު ކުރުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީ (241 ކޮމެޓީ) އިން މިއަދު ނިންމައިފި އެވެ.

ގަލޮޅު އުތުރު ދާއިރާގެ އެމްޑީޕީ މެންބަރު މީކާއިލް ނަސީމް ހުށަހަޅުއްވާފައިވާ މި ބިލުގެ މަސައްކަތް ކުރުމަށް މިއަދު ވަނީ ކޮމެޓީ ބައްދަލުވުމެއް ބާއްވާފަ އެވެ. މި ބައްދަލުވުމުގައި، ރާއްޖެއަށް އިޒްރޭލު ޕާސްޕޯޓުގައި އެތެރެވީ ކިތައް މީހުން އަދި ޓޫރިސްޓުންނާއި، ޑުއަލް ޕާސްޕޯޓު އޮންނަ މީހުންގެ ތެރެއިން އިޒްރޭލު ޕާސްޕޯޓު އޮންނަ މީހުންނާއި އަދި ކަމާ ގުޅުން ހުރި އެހެން ހުރިހާ ތަފާސްހިސާބެއް ހޯދުމަށް ހުށަހެޅުއްވީ ދިއްގަރު ދާއިރާގެ މެންބަރު އަހްމަދު ނާޒިމެވެ.

ނާޒިމް ހުށަހެޅުއްވީ ލިޔުމުން މައުލޫމާތު ހޯދަން އެދޭ އިދާރާތަކުން އެއް ހަފްތާތެރޭ އެ މައުލޫމާތު ހިއްސާކުރަން އަންގައި އަދި ބައްދަލުކޮށްގެން މައުލޫމާތު ހޯދަން ޖެހޭ ފަރާތްތަކާ ބައްދަލުކުރުމަށެވެ.

އެގޮތުން، ހުރިހާ ސިޔާސީ ޕާޓީތަކާއި، އެޓާނީ ޖެނެރަލްގެ އޮފީހާއި އިމިގްރޭޝަނާއި އިކޮނޮމިކް މިނިސްޓްރީ އަދި ޓޫރިޒަމް މިނިސްޓްރީ ހިމެނެ އެވެ. އަދި ކަމާ ގުޅުން ހުރި އެންޖީއޯތައް ވެސް ހިމެނެ އެވެ.

މިގޮތަށް ފާސްކޮށްފައި ވަނީ ކޮމެޓީ ބައްދަލުވުމަށް ހާޒިރުވި މެންބަރުންގެ އަޣުލަބިއްޔަތުންނެވެ. އެއްވެސް ކޮޅަކަށް ވޯޓު ނުދޭން ނިންމީ ހަނިމާދޫ ދާއިރާގެ އެމްޑީޕީގެ މެންބަރު އަބްދުލްޣަފޫރު މޫސާ އެވެ.

މި ބިލު މަޖިލީހަށް ބަލައިގެންފައި ވަނީ ޖޫން މަހުގެ 10 ވަނަ ދުވަހު އެވެ. އެދުވަހު ބިލު ކޮމެޓީއަށް ފޮނުވި ގޮތަށް އޮތީ މަޑުޖެހިފަ އެވެ. ބިލުގެ މަސައްކަތް ނިންމާނެ ސުންގަޑިއަކީ އަންނަ ފެބްރުއަރީ މަހުގެ ނިޔަލަށް ކަމަށް މީގެ ކުރިން އޮތް ބައްދަލުވުމުގައި ކޮމެޓީން ވަނީ ނިންމާފަ އެވެ.