ހިޔާނާތުގެ ތުހުމަތާއެކު އޭސީސީ ކުލަބުގެ ރައީސް މަސައްކަތުން ދުރުކޮށް ސަސްޕެންޑް ކޮށްފި

އޭސީސީ ރްކެރިއޭޝަން ކުލަބުގެ އޮޑިޓުން ހިޔާނާތުގެ މައްސަލަތަކެއް ފާހަގަ ކުރެވި އެ ކުލަބުގެ ރައީސްގެ މައްސަލަ ބަލަން ފަށާ މަސައްކަތުން ދުރުކޮށް ސަސްޕެންޑް ކޮށްފި އެވެ.

އެ ކޮމިޝަނުން ބަޔާނެއް ނެރެ ބުނީ ކުލަބުގެ މާލީ ހިސާބުތަކާއި ގުޅިގެން މިހާރު ކުރަމުން ގެންދާ އޮޑިޓްގައި ކުލަބުގެ މިދިޔަ ދައުރާއި މި ދައުރުގެ ރައީސްއާ ގުޅުން ހުރި ބައެއް ކަންކަން ފާހަގަކޮށް ކޮމިޝަންގެ ސަމާލު ކަމަށް ގެނެސްފައިވާތީ އެކަމާއި ގުޅިގެން އަޅަން ޖެހޭ ފިޔަވަޅުތައް އަޅާ މައްސަލަ ބަލަމުން ގެންދާ ކަމަށެވެ.

އަދި އޭނާ، ކޮމިޝަންގައި އަދާކުރާ މަގާމުގެ ހައިސިއްޔަތުން ކުރަން ޖެހޭ ހުރިހާ މަސައްކަތްތަކުން ދުރުކޮށް ސަސްޕެންޑްކޮށް މަސްއޫލިއްޔަތުތަކުން ވެސް އެކަހެރި ކޮށްފަައިވާ ކަމަށެވެ. އޭސީސީން ބުނީ މި މުވައްޒިފަކީ ކޮމިޝަންގެ ތަހުގީގުތަކާއި ގުޅުން ހުރި އެއްވެސް މަސައްކަތެއް އެއްވެސް އިރެއްގައި ކޮށްފައިވާ މުވައްޒިފެއް ނޫން ކަމަށެވެ.

"މިކަމާ ގުޅިގެން ކުލަބުގެ އާންމު މެންބަރުންނަށް ކުލަބުގެ ހިންގާ ކޮމެޓީން މައުލޫމާތުދީ މި ކަން ފުލުހުންގެ ހިދުމަތުގެ ސަމާލު ކަމަށް ގެނެސް މައްސަލަ ހުށައަޅާފައިވާނެ،" އޭސީސީން ބުންޏެވެ.

އޭސީސީ ރްކެރިއޭޝަން ކުލަބުގެ ރައީސަކީ ކޮމިޝަންގެ މަސައްކަތްތަކާއި ގުޅޭގޮތުން ކުރީން މީޑިއާތަކަށް މައުލޫމާތު ދެމުން ދިޔަ މުވައްޒިފެވެ.