އަސްކަރީ ބޭނުމަކަށް ބޭރުގެ ސިފައިންނަށް ތިބެވޭނީ މަޖިލީހުގެ ރުހުމާއެކު ކަމަށް ފާސްކޮށްފި

ރާއްޖޭގައި އަސްކަރީ ބޭނުމަކަށް ބޭރުގެ ސިފައިން ތިބެވޭނީ އަދި ހަރަކާތްތެރިވެވޭނީ މަޖިލީހުގެ އަގުލަބިއްޔަތުން އެކަމަށް ހުއްދަދީ ފާސްކޮށްގެން ކަމަށް ކަނޑައަޅާ ގާނޫނުއަސާސީ އިސްލާހުކޮށްފި އެވެ.

ގާނޫނުއަސާސީއަށް އިސްލާހު ގެނައުމަށް ސަރުކާރުގެ ފަރާތުން ހުށައެޅީ ހުޅުދޫ ދާއިރާގެ މެންބަރު، މުހައްމަދު ޝާހިދެވެ. އޭނާ ވަނީ ތިން ކަމެއް އިސްލާހު ކުރަން ހުށަހަޅުއްވާފައިވެ އެވެ. އެއްކަމަކީ މަޖިލީސް މެންބަރުން އެހެން ސިޔާސީ ޕާޓީއަކަށް ބަދަލުވުން ގޮނޑި ގެއްލުމާއި، ޕާޓީން ވަކިކުރުން ނުވަތަ އަމިއްލަ މެންބަރަކު ސިޔާސީ ޕާޓީއަކަށް ސޮއިކުރުމުން ގޮނޑި ގެއްލުމެވެ.

އަނެއް އިސްލާހަކީ ރައީސުލްޖުމްހުރިއްޔާއަށް ލިބިދޭ ބާރުތަކުގެ ތެރެއަށް މާއްދާއެއް އިތުރުކުރުމެވެ. ދެން ހިމެނެނީ ރާއްޖޭގައި އަސްކަރީ ބޭނުމަކަށް ބޭރުގެ ސިފައިން ތިބެވޭނީ އަދި ހަރަކާތްތެރިވެވޭނީ މަޖިލީހުގެ އަގުލަބިއްޔަތުންކަމާއި އަދި ރާއްޖޭގެ ސަރަހައްދާއި ކަނޑުގެ ސަރަހައްދަށް ބަދަލެއް ގެނެވޭނީ ވެސް މަޖިލީހުގެ އަގުލަބިއްޔަތުން ކަމަށް ނިންމުމެވެ.

މަޖިލީހުގެ މިއަދުގެ ހަވީރު އޮތް ޖަލްސާގައި އެ ހުރިހާ އިސްލާހެއް ވަނީ ފާސްކޮށްފަ އެވެ.

ރާއްޖޭގައި އަސްކަރީ ބޭނުމަކަށް ބޭރުގެ ސިފައިން ތިބެވޭނީ އަދި ހަރަކާތްތެރިވެވޭނީ މަޖިލީހުގެ އަގުލަބިއްޔަތުން އެކަމަށް ހުއްދަދީ ފާސްކޮށްގެން ކަމަށް ކަނޑައަޅާ ގާނޫނުއަސާސީ އިސްލާހު ކުރީ މިދިޔަ ދުވަސްތަކުގައި ރާއްޖޭގައި އިންޑިއާ ސިފައިން ތިބި ކަމަށް މި ސަރުކާރުގެ ވެރީން ވަރަށް ބޮޑަށް ވާހަކަ ދައްކާފައި ވަނިކޮށެވެ. އިންޑިއާއާ މަޝްވަރާކޮށް ހުރިހާ ސިފައިން މިހާރު ގެންގޮސްފައިވާ ކަމަށް ސަރުކާރުން ބުނެ އެވެ. ރާއްޖޭގައި އޭރު އިންޑިއާގެ އެތައް ސަތޭކަ ސިފައިން ތިބި ކަމަށް އިދިކޮޅުގައި ތިބި މި ސަރުކާރުގެ ވެރީން ވިދާޅުވި އެވެ.

ނަމަވެސް ވެރިކަމަށް އައިސް ސިފައިން ފޮނުވާލަން މަޝްވަރާ ފެށިއިރު ތިބީ ހެލްކޮޕްޓަރު ދުއްވަން ތިބި އިންޑިއާ ސިފައިންގެ މީހުން އެކަންޏެވެ. އެ މީހުން ފޮނުވާލާ މިހާރު ތިބީ ސިވިލިއަނުން ކަމަށް އިންޑިއާއާ ހަވާލާދީ ސަރުކާރުން ބުނެ އެވެ. ނަމަވެސް ގިނަ ދިވެހީން އެެކަން ގަބޫލެއް ނުކުރެ އެވެ.