މަސްތުވެގެން އާންމުންނަށް ނުރައްކާވާގޮތަށް އުޅުނު ދެ މީހަކު ހައްޔަރުކޮށްފި

މަސްތުގެ ހާލަތުގައިހުރެ އާންމުންނަށް އުދަނގޫކޮށް، ނުރައްކާވާ ގޮތަށް އުޅުނު ދެ މީހަކު ހައްޔަރުކޮށްފިއެވެ.

މަސްތުވާތަކެތި ބޭނުންކުރި މި މައްސަލައިގައި ހައްޔަރުކޮށްފައިވަނީ ގ. ބިއޓިވިލާ، ދާއޫދު ޖިމްރީޒް، 45އ، އާއި ރ. މަޑުއްވަރީ، އަސަރީގެ، އަހުމަދު ފަޒާލް 48އ، އެވެ.

މި ދެމީހުން ހައްޔަރުކޮށް ބަންދާމެދު ގޮތެއް ނިންމުމަށް ކުރިމިނަލް ކޯޓަށް ހާޒިރުކުރުމުން އެ މީހުންގެ ބަންދަށް ވަނީ 30 ދުވަސް ޖަހާފައެވެ.

ބަންދު އަމުރިގައިވާގޮތުން މި ދެ މީހުންނަކީ ވެސް މަސްތުވާތަކެތީގެ ހައްޔަރާއި ބަންދު ރެކޯޑު އޮންނަ ދެ މީހުންނެވެ.

އަމުރުގައިވާ ގޮތުން މަސްތުގެ ހާލުގައި އާންމު ތަންތާނގައި އުޅެ، އާންމުންގެ ހިތްތަކުގައި ބިރުވެރިކަން އުފެދޭ ގޮތަށް މަސްލަހަތު ނަގާލާފައިވެއެވެ. އެހެން ކަމުން މި ދެ މީހުން ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާވާނެ ކަމަށް އަމުރުގައިވެއެވެ.

މި ދެ މީހުން ހައްޔަރުކޮށްފައިވަނީ އާންމުތަނެއްގައި މަސްތުގެ ހާލަތުގައި ތިއްބާ ކަމަށްވެސް އަމުރުގައިވަނީ ފާހަގަކޮށްފައެވެ.