އޭއައި ބޭނުންކޮށްގެން ގާސިމްގެ ނަމުގައި ސްކޭމް ހިންގަނީ

އާޓިފިޝަލް އިންޓެލިޖެންސް ބޭނުންކޮށްގެން ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ފޮޓޯ އަދި ވީޑިއޯ ބޭނުންކޮށްގެން ސްކޭމް ހިންގަމުންދާތީ އެކަމަށް ސަމާލުވާން އެދިވަޑައިގެންފި އެވެ.

ގާސިމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ސޯޝަލް މީޑިއާގެ އެކި ޕްލެޓްތަކުގައި، ހާއްސަކޮށް ޓިކްޓޮކް، އިންސްޓާގްރާމް އަދި ފޭސްބުކްގައި އޭނާގެ ފޮޓޯއާއި، ވީޑިއޯ ބޭނުންކޮށްގެން، އާޓިފިޝަލް އިންޓެލިޖެންސް ގެ އެހީގައި ސްކޭމްތައް ހިންގަމުންދާ ކަމަށެވެ.

އެގޮތުން އެކިކަހަލަ އޮފްޝޯ ޓްރޭޑް ކުރުމަށާއި، އިންވެސްޓްކޮށް އަވަހަށް ނަފާ ލިބޭނެ ފަދަ މާލީ މުއާމަލާތްތަކުގެ ފުރުސަތު ދިވެހީންނަށް އޭނާ ހޯދައިދޭކަމަށް ދައްކުވައިދޭ ޕޯސްޓްތައް ކުރަމުންދާ ކަމަށް ގާސިމް ވިދާޅުވި އެވެ. އަދި ރާއްޖޭގެ ގައުމީ ބޭންކް މެދުވެރިކޮށް މި ސްކީމުގެ ފައިދާލިބޭނޭ ގޮތް ހަމަޖެހޭނެ ކަމަށް ވެސް ގާސިމް ވިދާޅުވާކަން ދައްކުވައިދޭ ފޮޓޯ އަދި ވީޑިއޯ ދަނީ އާންމު ކުރަމުންނެވެ.

"އަޅުގަނޑުގެ ނަމުގައި ފަތުރަމުންދާ އޯޑިއޯ ވީޑިއޯ ކްލިޕްތަކަކީ ރައްޔިތުންގެ ތެރެއިން ބަޔަކަށް އޮޅުވާލާ، ޒަމާނީކޮށް ސްކޭމް ކުރުމުގެ ބޭނުމުގައި ހިންގަމުންދާ އޮޅުވާލުމުގެ ދަށު ދަރައިގެ އަމަލުތަކެކެވެ." ގާސިމްގެ ޕޯސްޓުގައިވެ އެވެ.

މިފަދަ އެއްވެސް ބާވަތެއްގެ ސްކޭމެއްގައި، އެއްވެސް ރައްޔިތަކު ނުޖެހުމަށް ގާސިމް ވަނީ އެދިވަޑައިގެންފަ އެވެ. އަދި އެއްވެސް މީހަކު އާޓިފިޝަލް އިންޓެލިޖެންސް މެދުވެރިކޮށް ތައްޔާރުކޮށްފައި ހުންނަ ހަގީގަތެއް ނެތް ވީޑިއޯ ކްލިޕް ފަދަ ތަކެތި ސޯޝަލް މީޑިއާ ގެ އެކި ޕްލެޓްފޯމްތަކާއި، އެކި ވައިބާ ގްރޫޕްތަކާއި، ވަޓްސްއެޕް ގްރޫޕްތަކުގައި، ޝެއާކޮށް ނުހެދުމަށް ވެސް ވަނީ އެދިވަޑައިގެންފަ އެވެ.

"މިފަދަ ބައެއް ވީޑިއޯ ތަކަކީ ހަގީގަތެއް ކަމަށް ހީކޮށް ބައެއް ފަރާތްތަކުން އެއީ ތެދު ތޯ ބަލާލަން އަޅުގަނޑަށް ވެސް ބައެއް ފަހަރު އެފަދަ ކްލިޕްތައް ފޮނުވަމުންދާތީ ލޮބުވެތި އެންމެހާ ރައްޔިތުންގެ މައުލޫމާތަށްޓަކައި، ކަމުގެ ހަގީގަތް ހާމަކުރުމުގެ ބޭނުމުގައި މި މައުލޫމާތު ހިއްސާކޮށްލީމެވެ." ގާސިމްގެ ޕޯސްޓުގައި އިތުރަށް ބަޔާންކޮށްފައިވެ އެވެ.

އޭއައި ބޭނުންކޮށްގެން ގާސިމްގެ ނަމުގައި ސްކޭމް ހިންގަމުންދާއިރު، އެކި މީހުން އަދި އެކި ތަންތަނުގެ ނަންނަމުގައި ދަނީ ސްކޭމް ހިންގަމުންނެވެ. މިފަދަ ކަންކަމުން ދުރުހެލިވުމަށް ކަމާ ގުޅޭ އިދާރާތަކުން ދަނީ ތަކުރާރުކޮށް ދަންނަވަމުންނެވެ.