އިޒްރޭލު ޕާސްޕޯޓް މަނާކުރާ ބިލު ލަސްވާތީ އެމްޑީޕީން ހުށަހެޅި ގަރާރުގެ ބަހުސް ފަށައިފި

އިސްރޭލު ޕާސްޕޯޓުގައި ރާއްޖެއަށް އެތެރެވުން މަނާކުރުމަށް އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް ކުރިޔަށްނުދާތީ އެ ޕާޓީގެ ފަރާތުން ހުށަހަޅާފައިވާ ގަރާރުގެ ބަހުސް މިއަދު ފަށައިފި އެވެ.

މިދިޔަ މޭ މަހުގެ 30 ވަނަ ދުވަހު މި ބިލު މަޖިލީހަށް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މީކާއިލް ނަސީމެވެ. އެ ބިލު މަޖިލީހަށް ބަލައިގެންފައި ވަނީ ޖޫން މަހުގެ 10 ވަނަ ދުވަހު އެވެ. އެދުވަހު ބިލު ކޮމެޓީއަށް ފޮނުވި ގޮތަށް އޮތީ މަޑުޖެހިފަ އެވެ. މީކާއިލް ހުށަހެޅުއްވީ އިމިގްރޭޝަން ގާނޫނަށް އިސްލާހު ގެނައުމަށެވެ.

މި ބިލުގެ މަސައްކަތް ކޮމެޓީގައި ބާއްވާފައި އޮތުމުން، އެ މަސައްކަތް އަވަސްކޮށްދިނުމަށް އެދި މަޖިލީހަށް ގަރާރެއް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމެވެ. ގަރާރު ހުށަހަޅުއްވަމުން މެންބަރު ވިދާޅުވީ ސަރުކާރުން އެހިނދުން އެހިނދަށް ބޭނުންވާ ކަމެއް ބޭނުންވާ ގޮތަށް މަޖިލީހުން ނިންމަމުންދާ ކަމަށެވެ. ދައުރުން ބޭރުން ޖަލްސާތައް ބާއްވައިގެން ވެސް މަޖިލީހުން ކަންކަން ނިންމަމުންދާ ކަމަށެވެ.

އަދި، މި ބިލު މަޖިލީހަށް ހުށަހެޅުމާއެކު ވަޒީރުންގެ މަޖިލީހުގެ ބައްދަލުވުމެއް ބާއްވައި، އިޒްރޭލު ޕާސްޕޯޓް މަނާކުރަން ސަރުކާރުން ނިންމާފައިވާކަން އިއުލާނު ކުރިނަމަވެސް، މިއަދާ ހަމައަށް ސަރުކާރުން އެކަމަށް އެއްވެސް ފިޔަވަޅެއް އަޅާފައި ނުވާކަން ވެސް އޭނާ ފާހަގަކުރެއްވި އެވެ.

މި ގަރާރުގެ ބަހުސް މިއަދު ފަށާފައިވާއިރު، މިމަހުގެ 12 ވަނަ ދުވަހު 241 ކޮމެޓީން ވަނީ ގަރާރުގެ މަސައްކަތް ފަށަން ބައްދަލުވުމެއް ބާއްވާފަ އެވެ. އެ ބައްދަލުވުމުގައި ނިންމީ، އަންނަ އަހަރުގެ ފެބްރުއަރީ މަހުގެ ނިޔަލަށް އެ މަސައްކަތް ނިންމުމަށެވެ.