ގަތަރު އެއާވޭސްއިން ވޯލްޑް ކަޕަށް ފްލައިޓް މަދުކޮށްފި، ރާއްޖެ ނުހިމެނޭ

އަންނަ މަހު ފަށާ ވޯލްޑް ކަޕް ފުޓުބޯޅަ މުބާރާތް ބަލަން ދާ މީހުންނަށް ޖާގަ ދިނުމުގެ ގޮތުން ގަތަރު އެއާވޭސް އިން ބައެއް މަންޒިލްތަކަށް ކުރާ ދަތުރުތައް މަދު ކުރި ނަމަވެސް ރާއްޖެއަށް ފްލައިޓް މަދެއް ނުކުރެ އެވެ.

ގަތަރުގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި ޗީފް އެގްޒެކެޓިވް އަކްބަރު އަލް ބަކަރް ވިދާޅުވީ މިހާރު އިސްކަން ދެނީ ވޯލްޑް ކަޕް ބަލަން އަންނަ މަހު އެ ގައުމަށް ދާ މީހުންނަށް ޖާގަ ހޯދައި ދިނުމަށެވެ. އޭނާ ވިދާޅުވީ ދުވާލަކު ގާތްގަނޑަކަށް 500 ޝަޓްލް ދަތުރުތަކުގެ އިތުރުން އިތުރު އެތައް ސަތޭކަ ޗާޓަރު ފްލައިޓާއި ޕްރައިވެޓް ޖެޓް ތަކެއް ދަތުރު ކުރާނެ ކަމަށް ބެލެވޭ ކަމަށެވެ.

އަންނަ މަހުގެ 20 އިން ޑިސެމްބަރު މަހުގެ 20 އަށް އެ ގައުމަށް 1.2 މިލިއަން މީހުން ޒިޔާރަތް ކުރާނެ ކަމަށް ވަނީ ބެލެވިފަ އެވެ.

އެހެންވެ ގަތަރަށް ދާ މީހުންނަށް ޖާގަ ދިނުމުގެ ގޮތުން ގަތަރު އެއާވޭސް އިން ދަތުރު ކުރާ 18 މަންޒިލެއްގެ ފްލައިޓް މަދު ކުރަން ނިންމާފައިވާ ކަަމަށެވެ.

ގަތަރު އެއާވޭސް އިން ފްލައިޓް މަދުކުރި ނަމަވެސް ރާއްޖެއަށް ކުރާ އެއްވެސް ފްލައިޓެއް މަދުކޮށްފައެއް ނުވެ އެވެ. "މި" ނޫހަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ވަނީ އެކަން ޔަގީން ކޮށްދީފަ އެވެ.

ގަތަރު އެއާވޭސްއަކީ ރާއްޖެ އަށް އެންމެ ގިނައިން ޓޫރިސްޓުން ގެންނަ އެއް އެއާލައިނެވެ. ކޮވިޑަށް ފަހު އެންމެ ގިނައިން ފްލައިޓު ބާއްބައި ޓޫރިސްޓުން ރާއްޖެ ގެނެސްފައި ވަނީ ވެސް ގަތަރު އެއާވޭސް އިންނެވެ.