މަޝްރޫއުތަކުގެ ކޮލިޓީ ކަށަވަރުކުރަން ލެބޯޓަރީއެއް ގާއިމުކުރުމުގެ މަސައްކަތްކުރަނީ
ކޮންސްޓްރަކްޝަން އިންޑަސްޓްރީ ރެގިއުލޭޓުކުރަން މުހިއްމުކަމެއްކަމުގައި ފާހަގަކުރައްވަމުން މުއްތަލިބު ވިދާޅުވީ އެކި ފަރާތްތަކުގައި އެދިގެން އެހީތެރިކަން ހޯދައިގެން ނޭޝަނަލް ލެބޯޓިރީއެއް ގާއިމުކުރުމަށް މަސައްކަތްކުރައްވަމުންގެންދަވާ ކަމަށެވެ.
ސަރުކާރުން ހިންގާ މަޝްރޫއުތަކުގެ ފެންވަރު ކަށަވަރުކުރުމަށް ހަދަންޖެހޭ ޓެސްޓުތައް ހެދުމުގެ ގާބިލުކަން ގާއިމުކުރުމަށް ގައުމީ ފެންވަރުގެ ލެބޯޓަރީއެއް ގާއިމުކުރުމަށް ސަރުކާރުން މަސައްކަތް ފަށައިފި އެވެ.
ސަރުކާރަށް އެއް އަހަރު ފުރުމާ ގުޅިގެން ސަންގު ޓީވީން ގެނެސްދިން ޕްރޮގުރާމެއްގަައި ވާހަކަދައްކަވަމުން ކޮންސްޓްރަކްޝަން މިނިސްޓަރު ޑރ.އަބްދުﷲ މުއްތަލިބު ވިދާޅުވީ މަޝްރޫއުތަކުގެ ފެންވަރާމެދު އަބަދުވެސް ރައްޔިތުންގެ މެދުގައި ތަފާތު އެކި ގޮތްގޮތަށް ވާހަކަދެކެވޭ ކަމަށެވެ. އެގޮތުން ތިލަމާލެ ބުރިޖާއި ސިނަމާލެ ބުރިޖާ ގުޅޭ ގޮތުންވެސް އެފަދަ ވާހަކަތައް ދެކެވުނުކަން ފާހަގަކުރެއްވި އެވެ.
ޗައިނާ ކުންފުންޏަކުން މަސައްކަތްކުރާތީ ސިނަމާލެ ބުރިޖުގެ ކޮލިޓީއާމެދު އެއިރުގެ އިދިކޮޅު ފަރާތްތަކުން ޝައްކު އުފެއްދިކަން ފާހަގަކުރައްވައި މުއްތަލިބު ވިދާޅުވީ ބުރިޖުގެ މަސައްކަަތް ނިމި ބުރިޖު ބޭނުންކުރަން ފެށުމުން ޗައިނާ ކުންފުނިތަކަކީ މިފަދަ ބޮޑެތި އުމްރާނީ ތަރައްގީގެ މަސައްކަތްކުރުމަށް ގާބިލު ކުންފުނިތަކެއްކަން އެންމެންނަށްވެސް އެނގިގެންދިޔަ ކަމަށެވެ.
ހަމައެގޮތަށް ތިލަމާލެ ބުރިޖާ ގުޅޭ ގޮތުން ބައެއް ފަރާތްތަކުން އެ މަޝްރޫއުގެ ކޮންޓްރެކްޓަރަކީ އިންޑިޔާ ކުންފުންޏެއްކަމަށްވާތީ ކޮލިޓީއާމެދު ޝައްކު އުފައްދާކަން ފާހަގަކުރައްވައި މުއްތަލިބު ވިދާޅުވީ ބުރިޖުގެ މަސައްކަތްކުރަނީ ލެބޯޓަރީގައި ހަދަންޖެހޭ ޓެސްޓުތައް ހެދިގެން ތަކެތީގެ ފެންވަރު ޔަގީންކުރެވިގެން ކަމަށެވެ. އަދި އެއްވެސް ބައެއްގައި މައްސަލައެއް ދިމާވެއްޖެނަމަ އެކަމެއް ރަނގަޅުކުރެވި އަދި ޑިޒައިނަށް ބަދަލެއް ގެންނަންޖެހިއްޖެނަމަ އެކަންވެސް ކުރަމުންދާކަމަށް ވިދާޅުވި އެވެ.
މިނިސްޓަރު އިތުރަށް ފާހަގަކުރެއްވީ ދިވެހިރާއެްޖޭގައި އެ ފެންވަރަށް މަސައްކަތްކުރުމުގެ ގާބިލުކަން ނެތް ކަމެވެ. އަދި އޭނާ ވިދާޅުވި ގޮތުގައި ބޭރު ކުންފުނިތަކަށް މިފަދަ ބޮޑެތި މަޝްރޫއުތައް ހިންގުން ހަވާލުކުރަންޖެހޭ މައިގަނޑު ސަބަބަކީވެސް އެ ފެންވަރަށް މަޝްރޫއުތައް ހިންގުމަށް ބޭނުންވާ ގާބިލުކަން ރާއްޖޭގައި ނެތުމެވެ.
މިސާލެއްގެ ގޮތުން ފާހަގަކުރެއްވީ އަމީނީ މަގުގެ މަސައްކަތެވެ. މުއްތަލިބު ވިދާޅުވީ އަމީނީމަގުގެ މަސައްކަތް ކުރެވިފައިވަނީ އެންމެ އެކަށީގެންވާ ފެންވަރުގައި ކަމަށް ގަބޫލުނުކުރައްވާ ކަމަށާއި، މި ސަރުކާރު ހަވާލުވުމަށްފަހު އަމީނީ މަގުގައި އެޅި ތާރަ ފަށަލަވެސް ހުރީ ހުންނަންވީ ފެންވަރަށް ކަމުގައި ދެކެވަޑައިނުގަންނަވާ ކަމަށެވެ.
އެގޮތަށް ފެންވަރު ދަށްވުމަށް މެދުވެރިވާ މައިގަނޑު ސަބަބެއްގެ ގޮތުގައި އޭނާ ފާހަގަކުރެއްވީ ފެންވަރު ބެލުމަށް ބޭނުންވާ ޓެސްޓުތައް ހެދޭނެ ގޮތެއް ނެތުމެވެ. މަޝްރޫއުތައް ރެގިއުލޭޓުކޮށް ބަލަހައްޓާ ސަރުކާރުގެ އިދާރާއަކީ މިނިސްޓްރީކަމަށްވާއިރު މިނިސްޓްރީގައި ފަންނީ މީހުން ތިބި ނަމަވެސް ކޮލިޓީ ކަށަވަރުކުރަން ހަދަންޖެހޭ ޓެސްޓުތައް ހެދުމަށް ބޭނުންވާ ވަސީލަތްތައް މިނިސްޓްރީގައި ނެތްކަން ފާހަގަކުރެއްވި އެވެ.
މި ދާއިރާ ތަރައްގީކޮށް އެ ގާބިލުކަން ހޯދުމަށް މިހާތަނަށް އެއްވެސް ސަރުކާރެއްގައި އެކަށީގެންވާ ގޮތަކަށް މަސައްކަތް ނުކުރެވޭކަން ފާހަގަކުރައްވަމުން މިނިސްޓަރު ވިދާޅުވީ ސަރުކާރުން މިހާރު މަސައްކަތްކުރަމުންދަނީ އެކި ފަރާތްތަތަކުގެ އެހީތެރިކަން ހޯދައިގެން ނަމަވެސް އެވަސީލަތްތައް ހޯދުމަށް ކަމަށެވެ.
"މައްސަލައަކީ އެކަމުގެ ކިޔަވައިގެން ތިބި ޓެކްނިކަލް ފަރާތްތައް ތިބި ނަމަވެސް އެ ޓެސްޓުތައް ހަދައި ބަލާނެ ވަސީލަތްތަކެއް މިނިސްޓްރީގައި ނެތް. [ކޮންޓްރެކްޓަރުން] އެ ބޭފުޅުން ޓެސްޓުތަކެއް ހަދާފައި ހުށަހެޅުމުން އެބޭނުންވާ މިންގަނޑަކަށް ހުރިނަމަ އަޅުގަނޑުމެން ގަބޫލުކުރަނީ.،" މިނިސްޓަރު ވިދާޅުވި އެވެ.
ލެބޯޓަރީއެއް ނެތުމުން ޓެސްޓުނުކުރެވޭކަން ފާހަގަކުރައްވައި މުއްތަލިބު ވިދާޅުވީ ޓެސްޓުކުރެވޭނެ ލެބޯޓިރީއެއް ގާއިމުކުރުން މުހިއްމުކަން ކަމަށެވެ. އެއީ ކޮންސްޓްރަކްޝަން އިންޑަސްޓްރީ ރެގިއުލޭޓުކުރަން މުހިއްމުކަމެއްކަމުގައި ފާހަގަކުރައްވަމުން މުއްތަލިބު ވިދާޅުވީ އެކި ފަރާތްތަކުގައި އެދިގެން އެހީތެރިކަން ހޯދައިގެން ނޭޝަނަލް ލެބޯޓިރީއެއް ގާއިމުކުރުމަށް މަސައްކަތްކުރައްވަމުންގެންދަވާ ކަމަށެވެ.
ކޮމެންޓް
Republic of Maldives