މިނިސްޓަރު ދެއްވި ޔަގީންކަމަކީ މަޝްރޫއުތައް ހިންގުމުގައި އެއްވެސް ރަށެއް ބާކީނުވާނެކަން
އަންނަ އަހަރު ހިންގަން ނިންމާފައިވާ މަޝްރޫއުތަކުގެ ލިސްޓު ބަޖެޓުގައި ނުހިމެނުނު ނަމަވެސް އެއްވެސް ރަށެއް އިސްތިސްނާނުކޮށް ހުރިހާ ރަށެއްގައި ތަރައްގީގެ މަޝްރޫއުތައް ފަށަމުންދާނެ ކަމަށެވެ.
ސަރުކާރުން ހުށަހަޅާފައިވާ އަންނަ އަހަރުގެ ބަޖެޓުގައި ހިމަނާފައިވާ މަޝްރޫއުތައް ހިންގުމުގައި އެއްވެސް ރަށެއް އަދި ސިޓީއެއްވެސް ބާކީނުވާނެކަމުގެ ޔަގީންކަން ފިނޭންސް މިނިސްޓަރު މޫސާ ޒަމީރު ދެއްވައިފި އެވެ.
ރައްޔިތުންގެ މަޖިލީހުގައި ކުރިއަށްދާ ބަޖެޓު ބަހުސްގައި މިއަދު ބައިވެރިވެވަޑައިގެން ބައެއް މެންބަރުންނަށް އޮޅުން އަރާފައިވާ ކަންކަން ސާފުކޮށްދެއްވަމުން މިނިސްޓަރު ވިދާޅުވީ މަޝްރޫއުތަކުގެ ލިސްޓެއް ބަޖެޓުގައި ހިމަނައިގެން މަޝްރޫއުތަކަށް ކުދި އަދަދުތަކެއް ހިމަނައިގެން އެކަންކަން ފަށައިފިނަމަ މަޝްރޫއުތަކުގެ ޕައިޕްލައިނުގައި ކުރިއަށްނުދާ މަޝްރޫއުތައް ގިނަވެ ތޮއްޖެހިގެންދާނެ ކަމަށެވެ.
އެގޮތަށް ދިމާވާ ބައެއް ސަބަބުތައްވެސް ފާހަގަކުރެއްވި އެވެ. އެގޮތުން ބަޖެޓުގައި މަޝްރޫއު ހިންގުމަށް ފައިސާ ނެތިގެން ނުވަތަ ސަރުކާރުގެ ކޭޝް ފްލޯގައި މަޝްރޫއުތައް ހިންގޭނެ ފައިސާ ނެތިގެން މަޝްރޫއުތައް މަޑުޖެހޭކަން މިނިސްޓަރު ފާހަގަކުރެއްވި އެވެ. އަދި އޭގެ މިސާލެއްގެ ގޮތުން މިނިސްޓަރު ފާހަގަކުރެއްވީ އެމްޓީސީސީއާ ހަވާލުކޮށްފައިވާ މަޝްރޫއުތަކެވެ.
އޭނާ ވިދާޅުވި ގޮތުގައި އެމްޓީސީސީއާ ގާތްގަނޑަކަށް 18 ބިލިއަން ރުފިޔާގެ މަޝްރޫއު ހިންގުމަށް ސަރުކާރުން ހަވާލުކޮށްފައިވާ ކަމަށެވެ. އެ ފައިސާ ހަމަޖެއްސޭނެ ގޮތެއްވެސް ހޯދިފައިނުވާކަމަށް އޭނާ ވިދާޅުވި އެވެ.
"އަޅުގަނޑުމެންނަށް ފެނިގެންދިޔަ އަހަރުތަކެއް ކުރިން އެމްޓީސީސީއަށްވެސް ކޮންމެ ދުވަހަކުވެސް ޕްރޮޖެކްޓެއް ހަވާލުކުރަމުންދިޔައީ، އެންމެ ފަހުން ނިމިގެންދިޔައި އެމްޓީސީސީގެ ޕައިޕްލައިނުގައި އެބައުޅޭ 18 މިލިއަން ރުފިޔާ އެއަށް ފައިނޭންސް ކުރެވޭނެ ގޮތެއްވެސް ނެތި،" ޒަމީރު ވިދާޅުވި އެވެ.
އިތުރަށް ޒަމީރު ފާހަގަކުރެއްވީ މިހާރު ސަރުކާރުން ގެންގުޅޭ ވިސްނުމަކީ މަޝްރޫއުތައް ފެށުމުގެ ކުރިން ކުރަންޖެހޭ މަސައްކަތް ޕްރޮޖެކްޓަށް ތައްޔާރުވުމަށް އެކަށައަޅާ ފަންޑުގެ ތެރެއިން ފުރިހަމަކުރުމަށްފަހު ރައީސް ޑރ.މުހައްމަދު މުއިއްޒު އިސްކަންދެއްވާ މަޝްރޫއުތަކުގެ ތަރުތީބުން މަސައްކަތްތައް ކުރިއަށްގެންދެވުން ކަމަށެވެ.
އެގޮތަށް މަސައްކަތްކުރާއިރުވެސް އެއްވެސް ރަށެއް އުނިވެފައި ނޯންނާނެކަމުގެ ޔަގީންކަން ދެއްވަމުން ޒަމީރު ވިދާޅުވީ ހުރިހާ ރަށެއްގައ އަދި ސިޓީއެއްގައިވެސް ތަރައްގީގެ މަޝްރޫއުތައް ކުރިއަށްގެންދާނެ ކަމަށެވެ.
"އަޅުގަނޑުމެން ދޭން އޮތް ޔަގީންކަމަކީ މިހާރު އަޅުގަނޑުމެން ގެންގުޅޭ ލިސްޓުގައިވެސް އެއްވެސް ރަށެއް އުނިވެފައެއް ނޯންނާނޭ. މި އަހަރު ތެރޭގައިވެސް ރާއްޖޭގެ ހުރިހާ ރަށެއްްގައި ސިޓީތަކާއި މާލެވެސް ހިމެނޭ ގޮތަށް މަޝްރޫއުތައް ފަށަން އޮތީ ޕްރޮގުރާމުގައި ރޭވިފައި،" ޒަމީރު ވިދާޅުވި އެވެ.
ކޮމެންޓް
Republic of Maldives