މާކުސް ބަދަލުކުރި، ސިޔާސީ މީހުންގެ އާއިލާތަކަށް ފްލެޓް ދިން، ފޯމް ނުފުރާ އައިޑީކާޑުގެ އެއްފަޅި ހުށައެޅި މީހުންނަށް ވެސް ފްލެޓް ދީފައިވޭ: ރައީސް

ކުރީ ސަރުކާރުން ހިންގި ގެދޮރުވެރިޔާ ސްކީމްގެ ދަށުން 4000 ފްލެޓް ލިބޭ މީހުންގެ ލިސްޓް އާންމުކުުރުން ފަސްވާ މައިގަނޑު ސަބަބުތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ އިތުރަށް ތަފްސީލު ކޮށްދެއްވައިފި އެވެ.

ގެދޮރުވެރިޔާ ސްކީމަށް ހުށަހެޅި ހުރިހާ ފޯމެއް ރިއިވެލުއޭޓު ކުރުމުގެ މަސައްކަތް ކުރަމުންދާ ކަމަށް މިނިސްޓްރީން ބުނާތާ އެތައް ދުވަހެއް ވެއްޖެ އެވެ. އޭގެ ކުރީން ފުލެޓުގެ ހައްގުވެރިންގެ ލިސްޓު ދިރާސާކުރަން އެކުލަވައިލި "ހައުސިން އެޑްވައިޒަރީ ކޮމިޓީ" އާއި މާލެ ސިޓީ ކައުންސިލުން އެކުލަވާލި "ހައުސިން ކޮންސަލްޓެޓިވް ކޮމިޓީ" އަށްވެސް ކުރީ ސަރުކާރުން އެކުލަވައިލި ލިސްޓަކީ ރަނގަޅަށް އެކުލަވައިލި ލިސްޓެއް ކަމުގައި ގަބޫލުނުކުރެވޭ ކަމަށް އޮތީ ބުނެފަ އެވެ.

ލިސްޓް އާންމު ކުރާނެ ކަމަށް ބުނެ ކުރީން އެތަައް ތާރީހެއް ދިނުމަށް ފަހު މި ފަހުން ހައުސިން މިނިސްޓަރު ޑރ. އަލީ ހައިދަރު ވަނީ އިތުރު ދެ ތާރީހެއް ދެއްވާފަ އެވެ. ފަހުން ދެއްވި ތާރީހު އިއްޔެ އަށް ހަމަވީ އެވެ.

މިނިސްޓްރީން އިއްޔެ ބަޔާނެއް ނެރެ ބުނީ ފްލެޓަށް ހުށައަޅާފައިވާ 20،000 ވުރެ ގިނަ ފޯމް ބެލުމުގައި ކަށަވަރު ކުރަން ޖެހޭ ގިނަ ކަންތައްތަކެއް ހުރުމުން އިތުރު ވަގުތު ބޭނުންވާ ކަމަށެވެ. އަދި މިނިސްޓްރީން ކުރަމުންދާ މަސައްކަތްތަކުގެ ތަފްސީލް ފަހުން ހާމަ ކުރާނެ ކަމަށެވެ. އެކަމާ ގުޅިގެން ވަރަށް ބޮޑަށް ފާޑުކިޔުން ވަނީ އަމާޒުވެފަ އެވެ.

ރައީސް މުއިއްޒުގެ ސަރުކާރަށް އަހަރެއް ފުރުން ފާހަގަކުރުމަށް މިރޭ އޮތް ޖަލްސާ ގައި ރައީސް ވަނީ ލިސްޓް ނެރުން ފަސްވާ ސަބަބުތައް ތަފްސީލުކޮށް ދެއްވާފަ އެވެ. ވިދާޅުވީ ފްލެޓް ލިސްޓް ގައި ވަރަށް ބޮޑަށް ބޭއިންސާފު ކޮށްފައިވާ ކަމަށެވެ. އުސޫލާ ހިލާފަށް ކުރީ ސަރުކާރުގެ ސިޔާސީ ވެރީންގެ އާއިލަތަކަށް ފްލެޓް ދީފައިވާ ކަމަށާ ނުފޫޒު ގަދަ މީހުންގެ އާއިލާގެ އެތައް ބަޔަކަށް ފްލެޓް ދީފައިވާ ކަމަށެވެ.

އަދި ވިދާޅުވީ ފްލެޓް ލިބުނު މީހުންގެ ތެރޭގައި ވަކި ބަޔަކު ހިމަނަން ބެކު އެންޑުން މާކުހާ ކުޅެފައިވާ ކަމަށެވެ.

"ހަމައެކަނި އައިޑީކާޑު، ފޯމެއްވެސް ހުށަނާޅާ، ހަމައެކަނި އައިޑީކާޑު ހުށައަޅައިގެން ވެސް ފްލެޓް ދީފައި އެބަހުރި. އަދި އައިޑީކާޑުގެ އެއްފަޅި. ދެން އެ ބޭފުޅުން ކޮން ވާހަކައެއް މި ދައްކަނީ،"

ރައީސް ވިދާޅުވީ ފްލެޓް ކޮމެޓީގައި ހިމެނޭ މީހުންނަށް ފްލެޓް ދޭން ވެސް މާކުސް ބަދަލުކުރި ކަމަށެވެ.

"ގެދޮރުވެރީން ކޮމެޓީގައި ހިމެނޭ ސިޔާސީ ފަރާތްތަކަށް ފްލެޓް ލިބޭ ގޮތަށް މާކުސް ބަދަލުކޮށްފައި އެބަހުރި. އެނގޭތޯ، މިއީ ކޮށްފައި ހުރި ކަންކަން. އަދަދުތަކާއެކު އަޅުގަނޑުމެން ލިސްޓް ނެރޭއިރުގައި ކޮންމެ މީހެއްގެ ނަން ކައިރީގައި އޮންނާނެ ތަފްސީލު. ވަރަށް ދެފުށްފެންނަ ލިސްޓެއް ނެރޭނީ،"

އެމަނިކުފާނު މިރޭ ވެސް ވިދާޅުވީ ހުންނެވީ މާތްﷲ ގަންދީ ހުވާކުރައްވައިގެން ކަމަށާ އެމަނިކުފާނު ކުރައްވާ ކޮންމެ ކަމެއްވެސް ކުރައްވާނީ އިހްލާސްތެރިކަމާއެކު، އެކުރާ މަސައްކަތެއް އެކަލާންގެ ދެނެވޮޑިގެންވާކަން ދެނެހުރެ ކަމަށެވެ. ފްލެޓް ދިނުމުގައި ނާއިންސާފު ވެވަޑައިނުގަންނަވާނެ ކަމަށް ވިދާޅުވި އެވެ.