އާސަންދަ އިސްލާހުގެ އަމާޒު | ބޭހުގެ ވިޔަފާރިން ހޯދަމުން އައި ނާޖައިޒު މަންފާ ހުއްޓުވުން

އަންނަ އަހަރުގެ ބަޖެޓުގައި ހިމަނައިގެން އާސަންދަ ނިޒާމަށް ގެންނަން ސަަރުކާރުން ހުށަހަޅާފައިވާ އިސްލާހުތަކުގެ މައިގަނޑު އަމާޒަކީ ބޭހުގެ ވިޔަފާރީގެ ތެރެއިން ނާޖާއިޒު ފައިދާ ހޯދަމުންދާ ދިއުން ނިމުމަކަށް ގެންނެވުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. 

ސަރުކާރަށް އަހަރު ފުރުން ފާހަގަކުރުމަށް މިރޭ ސޯޝަލް ސެންޓަރުގައި ބޭއްވި ޖަލްސާގައި ވާހަކަދައްކަވަމުން ރައީސް ޑރ.މުހައްމަދު މުއިއްޒު ވިދާޅުވީ ބޭހުގެ ވިޔަފާރިކޮށްގެން އާންމު ރައްޔިތުންގެ ފައިސާއިން މުއްސަނދިވަމުން އައި ބަޔަކު ފެންނަ ކަމަށެވެ. އެގޮތުން އާދައިގެ ރަށެއްގައި ވަރަށް ކުޑަ ތަންކޮޅެއްގައި ބޭސްފިހާރައެއް ހަދާ މީހާ މަސްދޯނި ބަދެ ބޮޑެތި ގަންނަނީ އާސަންދައިގެ ތެރެއިން ބޮޑު އަގުގައި ބޭސް ވިއްކައިގެން ރައްޔިތުންގެ ފައިސާ ހޯދައިގެން ކަމަށެވެ. 

ރައީސް ވިދާޅުވި ގޮތުގައި އާސަންދަ އިސްލާހުކުރުމަށް ސަރުކާރުން ކުރާ މަސައްކަތުގެ މައިގަނޑު އަމާޒަކީ އެ މައްސަލަ ހައްލުކުރުމެވެ. އަދި އެ މައްސަލަ ހައްލުކުރުމަށް ކުރާ މަސައްކަތުގެ ތެރެއިން ރައްޔިތުންގެ އަތުން ކުރިން ނުނަގާ ފައިސާއެއް އަލަށްވެސް ނުނަގާނެކަން ރައީސް އިއުލާނު ކުރެއްވި އެވެ. 

"މިކުރާ ކަމަކީ އެތައް ގުނައެއް މައްޗަށް ޕްރޮފިޓް ޕަސެންޓޭޖު ޖައްސާލައިގެން، އާސަންދައިގެ ތެރެއިން ރައްޔިތުންގެ ފައިސާ، ރައްޔިތުންނަށް ކަންކަމުގައި ހެޔޮ ގޮތުގައި ހަރަދުކުރެވެން ހުރި ފައިސާ ހޯދަނީ ނުގަވައިދުން އެހެންނަމަވެސް ނިޒާމުގެ ތެރެއިން. މިކަން މިހެން ހިނގުމުން އާސަންދަ ނިޒާމު މިއޮތީ ވަރަށް ބޮޑަށް ބޮއްސުންލާފައި. އަޅުގަނޑުމެން އާސަންދަ ރިފޯމުކުރާ ވާހަކަ މިދަންނަވަނީ މިކަން ހައްލުކުރާ ވާހަކަ،" ރައީސް ވިދާޅުވި އެވެ. 

"އެއްގޮތަކަށްވެސް ރައްޔިތުން ތިކުރައްވާ ބޭސްފަރުވާއަށް އެއްވެސް ކަހަލަ ބަދަލެއް ނާންނާނެ. ރައްޔިތުންގެ އަތުން އަންނަ އަހަރުގެ ބަޖެޓުގައިވެސް ކުރިއަށް އޮތް އަހަރުތަކުގައިވެސް އަޅުގަނޑުމެން މިހާރަކު ނުނަގާ ފައިސާއެއް ނުނަގާނެ. ރައްޔިތުން ދައްކަންޖެހޭ އެއްޗެއް ނޯންނާނެ،"

އިތުރަށް ބޭހަށް ދައުލަތުން ކުރަންޖެހިފައިވާ ހަރަދުތަކުގެ މައްޗަށް އަލިއަޅުވައިލައްވަމުން ރައީސް ވިދާޅުވީ އެންމެ ވިޔަފާރިއަކުން ވިއްކާ އެންމެ އިންޖެކްޝަނަކަށް އަހަރެއްގެ މައްޗަށް ދައުލަތުން 33 މިލިއަން ރުފިޔާ ހަރަދުކުރަންޖެހޭ ކަމަށެވެ. ރާއްޖޭގެ ބޭހުގެ އަގު އުޅެނީ މުޅި ދުނިޔެއަށް ބަލާއިރުވެސް 15 ގުނަ އަގުބޮޑުކޮޮށް ކަމުގައި ރައީސް ވިދާޅުވި އެވެ. 

ރައީސް ވިދާޅުވި ގޮތުގައި އެ މައްސަލަ ހައްލުކުރުމަށް އަޅާ މައިގަނޑު ފިޔަވަޅަކީ ބަލްކް ޕްރޮކިއުމެންޓު މެދުވެރިކޮށް އެންމެ ތަރައްގީވެފައިވާ ގައުމުތަކުގައި ހުންނަ ބޭސް ރާއްޖެއަށް ގެނެސް ހެޔޮ އަގުގައި ލިބޭނެ އިންތިޒާމު ހަމަޖެއްސެވުން ކަމަށް ރައީސް ވިދާޅުވި އެވެ. 

އެގޮތުން ބޭހުގެ އަގަށް އަންނަ ބަދަލުތަކަށްވެސް ރައީސް އަލިއަޅުވައިލެއްވި އެވެ. ޒަހަމްތައް އިންފެކްޓުވިޔަނުދިނުމަށް ބޭނުންކުރާ ބޭހެއް 400 ރުފިޔާއަށް މިހާރު ވިއްކާއިރު ބަލްކް ޕްރޮކިއުމެންޓުގެ ތެރެއިނ ދިހަ ރުފިޔާއަށް ލިބޭނެ ކަމަށާއި، ހަކުރު ބައްޔަށް ބޭނުންކުރާ އިންސިއުލިންއެއް 600 ރުފިޔާއަށް މިހާރު ވިއްކާއިރު 80 ރުފިޔާއަށް އެ އިންސިއުލިން ބަލްކު ޕްރޮކިއުމެންޓުގެ ތެރެއިން ލިބޭނެ ކަމަށެވެ. 

އޭގެ އިތުރަށް ބޭނުންވާ މެޝިންތަކާއި ކޮންސިއުމަބަލްސްވެސް ބަލްކް ޕްރޮކިއުމެންޓަށް ބަދަލުކޮށް އެންމެ ފެންވަރު ރަނގަޅު ތަކެތި ހޯދައިދެވޭނެ ކަމަށްވެސް ރައީސް ވިދާޅުވި އެވެ.