"ކުރީ ތިން އަހަރަށްވުރެ ގިނައިން ގަވާއިދާ ހިލާފަށް އުޅޭ ބިދޭސީން މި އަހަރު ޑީޕޯޓުކޮށްފި"

މި ސަރުކާރުން ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރި މަސައްކަތުން ފާއިތުވި ތިން އަހަރު ޑީޕޯޓުކުރި އަދަދަށްވުރެ އިތުރަށް ގަވާއިދާ ހިލާފަށް އުޅޭ ބިދޭސީން މި ސަރުކާރުން ޑީޕޯޓުކޮށްފައިވާކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއުލާނު ކުރައްވައިފި އެވެ. 

ސަރުކާރަށް އަހަރެއް ފުރުން ފާހަގަކުރުމަށް މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ އެމަނިކުފާނު ވެރިކަމާ ހަވާލުވެވަޑައިގެންނެވިއިރު ރާއްޖޭގައި ގަވާއިދާ ހިލާފަށް އުޅެނީ ކިހައި ބިދޭސީންނެއްކަން ނުވެސް އެނގޭ ކަމަށެވެ. 

އަދި އެމަނިކުފާނު ވިދާޅުވީ ބިދޭސީންގެ މައްސަލަ ބޮޑުވެ އިންސާނީ ވަގުފާރީގެ ކަންކަން އިތުރުވުމުގެ ސަބަބުން ރާއްޖެ އޮތީ ބްލެކް ލިސްޓުކުރާ ހިސާބުގައި ކަމަށެވެ. ސަރުކާރުތައް ބަދަލުވަމުންދިޔައިރު މި މައްސަލަ ހައްލުކުރުމަށް އެއްވެސް ސަރުކާރަކަށް އެކަށީގެންވާ ގޮތެއްގައި މަސައްކަތްކުރެވިފައިނުވާކަމަށްވެސް ރައީސް ވިދާޅުވި އެވެ. 

"އަޅުގަނޑުމެންނާ ހަވާލުވިއިރުގަ ގަވާއިދާ ހިލާފަށް އުޅޭ ބިދޭސީންގެ އަދަދު ނުވެސް އެނގޭ. އިންސާނީ ވަގުފާރީގެ ކަންތައް އިންތިހާއަށް ގޮސް ބައިނަލްއަގުވާމީ މަސްރަހުގައި އަޅުގަނޑުމެން އޮތީ ބްލެކްލިސްޓުކުރާ ހިސާބުގައި. ސަރުކާރުތައް ބަދަލުވަމުންދިޔައިރު އެއްވެސް ސަރުކާރަކުން އަޅައިނުލާ،" ރައީސް ވިދާޅުވި އެވެ. 

ރައީސް ވިދާޅުވީ ފާއިތުވި އަހަރު 570 މިލިއަން ޑޮލަރު ބިދޭސީން ރާއްޖެއިން ބޭރަށް ފޮނުވި ކަމަށެވެ. އަދި އެ ބިދޭސީންގެ ތެރެއިން ގިނަ މީހުންނަކީ ގަވާއިދާ ހިލާފަށް ރާއްޖޭގައި އުޅޭ މީހުން ކަމަށެވެ. 

ހޯމްލޭންޑް މިނިސްޓްރީއެއް އުފައްދަވައި އެ މިނިސްޓްރީގެ ދަށަށް ކަމާ ގުޅުންހުރި ހުރިހާ އިދާރާތަކެއް ބަދަލުކުރެއްވީ އެ މައްސަލަ ހައްލުކުރެއްވުމަށް ކަމުގައި ރައީސް ވިދާޅުވި އެވެ. އެގޮތުން އެކި ތަންތަނުގެ ދަށުގައި އެކަމާ ގުޅުންހުރި އިދާރާތައް ހުރުމަކީ އެ މައްސަލަ ހައްލުނުކުރެވި ދިގުލައިގެންދިޔަ ސަބަބެއްކަން އެމަނިކުފާނު ފާހަގަކުރެއްވި އެވެ. 

އެމަނިކުފާނު ވިދާޅުވި ގޮތުގައި މުހިއްމު ބޮޑެތި އިދާރާތަކެއް އެއް މިނިސްޓްރީއެއްގެ ދަށަށް ގެންނެވީ ބޮޑު ތިން މައްސަލައެއް ހައްލުކުރެއްވުމަށެވެ. އެއީ ގޭންގުތަކުގެ މައްސަލައާއި މަސްތުވާތަކެތީގެ މައްސަލައިގެ އިތުރަށް ގަވާއިދާ ހިލާފަށް އުޅޭ ބިދޭސީންގެ މައްސަލަ އެވެ. 

ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުވައިލައްވައި ރައީސް ވިދާޅުވީ ފާއިތުވި 51 ހަފުތާގެ ތެރޭގައި 5،012 ބިދޭސީން ޑިޕޯޓުކޮށްފައި ކަމަށާއި، އެއީ ފާއިތުވި ތިން އަހަރު ބޭރުކުރި ބިދޭސީންގެ ޖުމްލައަށްވުރެ ގިނަ އަދަދެއް ކަމަށެވެ. 

"މިވޭތުވެދިޔަ 52 ހަފުތާގެ ތެރޭގައި އަޅުގަނޑުމެންވާނީ  ނުގަވާއިދުން އުޅޭ 5،012 ބިދޭސީއަކު ފޮނުވައިލާފަ. ޑީޕޯޓުކޮށްފަަ. މިއީ އޭގެ ކުރީގެ ތިން އަހަރުގެ ޖުމްލައަށްވުރެ ގިނަ އަދަދެއް. އޭގެ ކުރީ ތިން އަހަރަށްވުރެވެސް ގިނަ އަދަދެކޭ މިދެންނެވި ގޮތަށް ނުގަވާއިދުން އުޅޭ ބޭރުމީހުން ހޯދައި ބޭރުކުރި އަދަދު،" ރައީސް ވިދާޅުވި އެވެ، 

އިތުރަށް ރައީސް ވިދާޅުވީ ރާއްޖޭގައި އުޅޭ ބިދޭސީންގެ ބައޯމެޓްރިކް ޑާޓާ ނެގުމަށް ކުރެވުނު މަސައްކަތްތަކުން 12،000 އަށްވުރެ ގިނަ މީހުންގެ ބައޯމެޓްރިކް ޑޭޓާ މިހާރު ނެގިފައިވާ ކަމަށެވެ. އަދި ކުރިއަށް އޮތް އަހަރުގެ އޭޕްރީލު މަހުގެ ނިޔަލަށް ކުރަނގި އޮޕަރޭޝަނުގެ ތެރެއިން އެ މަސައްކަތް އެކީ ނިންމައިލެވޭނެ ކަމަށްވެސް ވިދާޅުވި އެވެ. 

އެއިރުން ގަވާއިދާ ހިލާފަށް އުޅޭ ބިދޭސީން ދެނެގަނެވި މާލޭގެ ކުދިކުދި ތަންކޮޅުކޮޅުގައި އެމީހުން ދިރިއުޅޭ މައްސަލަ ހައްލުކުރެވި އެމީހުންގެ ދިރިއުޅުމުގެ ކަންކަން ބަައިނަލްއަގުވާމީ މިންގަނޑަށް ގެނެވޭނެ ކަމަށްވެސް ރައީސް ވިދާޅުވި އެވެ.