ޓޫރިޒަމްގެ ބާނީންނަށް މެސެޖަކާއެކު މާރުކުރާ ގަވާއިދު ބަދަލުނުކުރައްވާނެކަން އިއުލާނުކުރައްވައިފި

ފަތުރުވެރިކަމުގެ ވިޔަފާރިތަކަށް ބޭރު ފައިސާއިން ލިބޭ އާމްދަނީގެ ތެރެއިން މިންވަރެއް މާރުކުރުން ލާޒިމުކުރާ ގަވާއިދު ބަދަލުނުކުރައްވާނެކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއުލާނު ކުރައްވައިފި އެވެ. 

މިރޭ ސޯޝަލް ސެންޓަރުގައި ކުރިއަށްދާ ސަރުކާރަށް އެއް އަހަރު ފުރުމުގެ މުނާސަބާ ފާހަގަކުރުމުގެ ޖަލްސާގައި ވާހަކަދައްކަވަމުން ރައީސްވަނީ ޓޫރިޒަމް ދާއިރާގެ ބާނީންނަށް ހާއްސަ މެސެޖެއް ދެއްވާފަ އެވެ. އެގޮތުން އެމަނިކުފާނު ވިދާޅުވީ 1970ގެ ފަހުކޮޅުން ފެށިގެން އަމިއްލަ ގޮތުން ޓޫރިޒަމް ވިޔަފާރި ފައްޓަވައި އެ ދާއިރާ ކުރިއަށްގެންދެވި ބޭފުޅުންނަށް ޝުކުރު އަދާކުރައްވާ ކަމަށެވެ. އަދި އެ ބޭފުޅުން ކިބައިން އެމަނިކުފާނު އެދިވަޑައިގަންނަވަނީ ގައުމަށާއި ރައްޔިތުންނަށް ހެވެއް ނެދޭ ސިޔާސީ ލީޑަރުން އެބޭފުޅުންގެ ނާޖައިޒު ފައިދާ ނެގުމަށް ފުރުސަތު ނުދެއްވުމަށް ކަމަށެވެ. 

"ތިބޭފުޅުންގެ ނާޖާއިޒު ފައިދާ، ސިޔާސީ ގޮތުން ގައުމަށް ލޯބިނުކުރާ ދިވެހިންގެ ފަޅީގައި ނެތް ސިޔާސީ މީހުންނަށް ތިބޭފުޅުންގެ ފައިދާ ނާޖައިޒު ގޮތުގައި ނެގިޔަނުދެއްވާށޭ. އަޅުގަނޑުމެން މިތިބީ ރައްޔިތުންގެ ފަޅީގައި ރައްޔިތުންނާއެކީގައި ތިޔަ ހިދުމަތްތެރި އިސްރަށްވެހިން އަޅުގަނޑުމެންނާއެކު ވަޑައިގަތުމަކީ ގައުމަށް އެންމެ ފައިދާހުރި ގޮތް،" ރައީސް ވިދާޅުވި އެވެ. 

ރައީސް އިތުރަށް ވިދާޅުވީ މިހާރު ސަރުކާރު ހިއްސާވާ ވަރަށް ގިނަ ކުންފުނިތަކުން މިހާރު ޑޮލަރު ގަންނަންޖެހެނީ ކަޅު ބާޒާރުގައި ބޮޑު އަގުގައި ކަމަށެވެ. އެގޮތުން ރައީސް ވިދާޅުވީ މިހާރު އެކަމުގެ ސަބަބުން ދައުލަތުން ބޮޑު ބުރައެއް އުފުލަންޖެހިފައިވާ ކަމަށެވެ. އަދި ޑޮލަރު މާރުކުރުމުގެ ގަވާއިދަށް ޖަނަވަރީ އެކެއް 2026 އިން ފެށިގެން އަމަލުކުރަން ފެށުމާއެކު، ރަސްމީ ރޭޓުގައި އެސްއޯއީތަކަށް ޑޮލަރު ގަނެވޭނެ އިންތިޒާމު ހަމަޖެހިގެންދާނެ ކަމަށެވެ. 

މި ގަވާއިދުގެ އިތުރު ފައިދާއެއްގެ ގޮތުގައި ރައީސް ފާހަގަކުރެއްވީ މިހާރު ރާއްޖެއިން ބޭރަށް ފުރާ ކޮންމެ ދިވެއްސަކަށް އެއާޕޯޓުން ދޫކުރަމުންދާ 500 ޑޮލަރު 1،000 ޑޮލަރަށް އިތުރުކުރެވުމެވެ. ގަވާއިދު ރަނގަޅަށް ތަންފީޒުކުރެވޭނަމަ 2026 ވަނަ އަހަރުގެ ފުރަތަމަ ކުއާޓާއިން ފެށިގެން ބޭރަށް ފުރާ ކޮންމެ ދިވެއްސަކަށް 1،000 ޑޮލަރު ދޫކުރެވޭނެ ކަމަށާއި، އެއީ އެކި ބޭނުންތަކަށް ރާއްޖެއިން ބޭރަށް ފުރާ ދިވެހިންނަށް ވަރަށް ބޮޑަށް ފައިދާވާނެ ކަމެއް ކަމުގައި ރައީސް ވިދާޅުވި އެވެ. 

އޭގެ އިތުރަށް އަންނަ ޖަނަވަރީން ފެށިގެން ދެމެހެއްޓެނެވި ގޮތަކަށް ޑޮލަރު މާރުކުރުމުގެ ކަންކަން ކުރެވޭނަމަ 2026 ވަނަ އަހަރުގެ ފުރަތަމަ ކުއާޓާއަށް އަންނަންވާއިރަށް ކްރެޑިޓު ކާޑުތަކުގެ ލިމިޓު 750 ޑޮލަރުން 1،400 ޑޮލަރަށް އިތުރުކުރެއްވޭނެ ކަމުގައި ރައީސް މުއިއްޒު ވިދާޅުވި އެވެ. 

"ޑޮލަރު މާރުކުރާ ގަވާއިދު ރަނގަޅަށް ތަންފީޒުވާނަމަ އަޅުގަނޑުމެން ބޭނުންވަނީ 2026 ގެ ފުރަތަމަ ކުއާޓާއަށް ދާއިރު މި 500 ޑޮލަރުގެ ބަދަލުގައި 1،000 ޑޮލަރުގެ ގަތުމުގެ ފުރުސަތު ދޭން. ދެން މިކަމަށް ހުރަސްއަޅަންވީ ކީއްވެތޯ؟،" ރައީސް ވިދާޅުވި އެވެ. 

"އަންނަ ޖަނަަވަރީން ފެށިގެންގޮސް 2026 ގެ ފުރަތަމަ ކުއާޓާގެ ނިޔަލަށް ސަސްޓައިނަބަލް ގޮތަކަށް ޑޮލަރު މާރުކުރުމުގެ ކަންތައް ކުރިއަށްދާނަަމަަ، 1،400 ޑޮލަރާ ހަމައަށް ކްރެޑިޓް ކާޑުގެ ލިމިޓު ބޮޑުކޮށްދޭނަން،" 

އިތުރަށް ރައީސް ވިދާޅުވީ ޑޮލަރު މާރުކުރުމުގެ ކަންކަން ޖަނަވަރީން ފެށިގެން ރަނގަޅަށް ކުރިއަށްދާނަމަ ހަ މަސްދުވަހުގެ މުއްދަތެއްގެ ތެރޭގައި މިހާރު ބޭންކުތަކުން ވިޔަފާރިތަކަށް މުދާ އިމްޕޯޓުކުރުމަށް ޑޮލަރު ދޫކުރާ މިންވަރު އިތުރުކޮށްދެއްވާނެ ކަމަށެވެ. 

އެކަަންކަން ފާހަގަކުރައްވައި ރައީސް ވިދާޅުވީ މިފަަދަ މަންފާތަކެއް ރައްޔިތުންނަށް ހޯދައިދިނުމަށް އެކުލަވައިލެވިފައި އޮތް ގަވާއިދެއް ބަދަލެއް ނުކުރައްވާނެ ކަމަށެވެ. އެމަނިކުފާނު ވިދާޅުވީ އެ ގަވާއިދަކީ ރާއްޖޭގެ ގާނޫނުއަސާސީއާއި ގާނޫނުތަކާ އެއްގޮތަށް އެކުލަވައިލާފައިވާ ގަވާއިދެއް ކަމަށެވެ. 

"ވަރަށް ސާފުކޮށް މިދަންނަވަނީ މި ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނޭ. ގަވާއިދަށް ތަބާވުމަކީ އެންމެންގެ މައްޗަށް ލާޒިމު ކަމެކޭ. މިކަން ކުރައްވަން ޖެހިވަޑައިގަންނަވާނޭ. މިއީ ގާނޫނުއަސާސީއާއި ގާނޫނާ އެއްގޮތަށް ކުރާ ކަމެއް.،" ރައީސް ވިދާޅުވި އެވެ. 

ރައީސް އިތުރަށް ވިދާޅުވީ އެ ގަވާއިދު ތަންފީޒުކުރަން ފަސޭހަކުރުމަށްޓަކައި ހާއްސަ ފޮރެކްސް ގާނޫނެއް އެކުލަވައިލުމުގެ މަސައްކަތް މަޖިލީހުގެ ތެރެއިން ކުރައްވާނެ ކަމަށެވެ.